په ملګرو ملتونو کې د چين دايمي استازي ګنګ شوانګ د جولای په اوومه نېټه د ملګرو ملتونو د عمومي اسامبلې په غونډه کې چې د افغانستان مسئلې په اړه جوړه شوې وه، پر نړيوالې ټولنې غږ کړی چې په هر اړخيزه او عیني توګه د افغانستان وضعيت ته وګوري.
ګنګ شوانګ وويل چې افغانستان د بيا رغونې په کليدي پړاو کې دی، هلته ثبات حاکم شوی، اقتصاد يې ګام په ګام ښه شوی او له نړۍ سره يې راشه درشه ورځ تل بلې فعاله شوې ده.
هغه وايي چې له دې ټولو سره سره دغه هېواد لا هم د بشردوستۍ، پرمختګ، بشري حقونو، له ترهګرۍ سره د مبارزې او د ښځو حقونو په برخو کې له ډېرو ننګونو سره مخ دی. ده ویلي چې چين هيله لري چې نړيواله ټولنه د افغانستان وضعیت ته په عیني او هر اړخيزه توګه وګوري او په نړيواله کورنۍ کې د افغانستان د ژر تر ژره بيا شاملېدو او د دوی د خلکو د ارام او امن ژوند لپاره رغنده رول ولوبوي.
نوموړي دا هم ویلي چې هېواد يې پر تميلوونکو په تېره بيا پر هغو هېوادونو چې د افغانستان د اوسني وضعيت پړه پر غاړه لري، غږ کړی چې په دې هېواد کې پانګونه زياته او د دوی د ستونزو په لرې کولو کې رول ولوبوي.
نوموړي دغه راز ویلي چې چين له بېلا بېلو خواوو څخه غوښتنه کړې چې د دوه او يا څو اړخيز او سيمه ييز همکاريز ميکانيزم له لارې د دې هېواد د پرمختیایي بهیر د لا پياوړتيا او د سيمې او نړۍ له اقتصاد سره د يو ځای کېدو په برخه کې له دې هېواد سره مرسته وکړي.
ده دا هم ویلي چې هېواد يې پر هغو هېوادونو چې د افغانستان شتمنۍ يې کنګل کړې او پر دغه هېواد يې یو اړخیز بندیزونه لګولي، غږ کړی چې سمدلاسه پر افغانستان يو اړخيز غير قانوني بنديزونه لغوه کړي او له شرايطو پرته د دې هېواد شتمني بېرته ور کړي او افغانستان ته دې زمینه برابره کړي چې خپل مالي سيستم بيا ورغوي او اقتصاد او د خلکو ژوند ته پرمختګ ورکړي.
د ملګرو ملتونو عمومي اسامبلې د روانې میاشتې په اوومه نېټه د افغانستان د وضعيت په هکله پرېکړه ليک تصويب کړ. چين، روسيې، هند او ايران په شمول دوولسو هېوادونو له رايي ورکولو څخه ډډه وکړه. ګنګ شوانګ په خپله وينا کې ويلي چې دغه مسوده نوره هم ښه کېدای شي او د ځينو لوريو مهم نظرونه نه دي پکې منعکس شوي.