د بريکس هېوادونو ۱۷مه سرمشريزه د جولای له شپږمې نېټې څخه تر اوومې نېټې پورې د برازيل په ريودي جينرو ښار کې تر سره شوه. دا تر هغه وروسته چې د روان کال په جنورۍ کې اندونيزيا د بريکس هېوادونو د همکارۍ په ميکانيزم کې شامل شوی او د جون په میاشت کې ويتنام د بريکس همکار هېواد ګرځېدلی دی، د بريکس د يوولسو غړو هېوادونو او لسو همکارو هېوادونو لومړی سرمشريزه وه. که څه هم نړۍ د يو اړخيزم له ننګونې سره مخ ده، خو د بريکس د پراخې همکارۍ ماډل د يووالي او همکارۍ روحيه منعکس کړې چې دې کار د نړۍ د سراسري جنوب هېوادونو د خپلواک پرمختګ لپاره نوې لاره هواره کړې ده.
تېر کال ايران په رسمي توګه د بريکس د همکارۍ په ميکانيزم کې شامل شو. که څه هم له څه باندې يو کال راهيسې په دې هېواد کې امنيتي وضعيت ښه نه دی، خو د بريکس له غړو هېوادونو سره يې همکارۍ لاهم په ثابت ډول روانې دي چې د مساواتو او ګډو ګټو پر بنسټ د همکارۍ دغه ماډل پر دې هېواد د امريکا د بنديزونو د اغېزو په کمولو کې رول لوبولی دی. په سرمشريزې کې ګډونوالو د ريودي جنيرو اعلاميې په خپرولو سره هم پر ایران او غزې د اسرائيل پر بريدونو نيوکه کړې او پر نړيوالې ټولنې يې غږ کړی چې د سولې د پرمخ بېولو له لارې عادلانه نړيوال نظم چې ټول پکې ځانونه وویني جوړ کړي تر څو د بريکس هېوادونه له شخړو او سوداګريزو جګړو څخه خوندي او څو اړخیز ډيپلوماتيک بندر وګرځي. اعلاميه وايي چې د ایران پر پوځي او اټومي تاسیساتو او نورو هدفونو بريدونه له نړیوالو قوانينو څخه سرغړونه ده. که څه هم په دې اعلامیه کې د اسرائيل او امريکا نوم نه دی یاد شوی خو دغه اعلامیه د ايران لپاره يوه ډيپلوماتيکه بريا ګڼل کېږي.
چین د بريکس د پراخې همکارۍ د ميکانيزم د پرمخبېولو په جريان کې تل د مساواتو او خبرو اترو پر اصولو ټينګار لري او د پرمختيايي لارې د انتخابولو په برخه کې د بېلا بېلو هېوادونو خپلواکو حقونو ته درناوی لري.د چین صدراعظم لي چيانګ هم په ريو دي جنيرو ښار کې په خپله وينا کې اعلان کړی چې هېواد به يې روان کال د چین او بريکس هېوادونو د نوي باکيفيته تولیدي ځواک څېړنيز مرکز جوړ کړي او اړوندو شخصيتونو ته به د جین لو په نوم د بريکس هېوادونو د نويو صنايعو سکالرشيپ ورکړي تر څو د دغو هېوادونو په صنعتي او مخابراتي برخو کې د دوی کادرونه وروزل شي. دغه اقدامات به ايران ته چې اوس د صنعتي جوړښت د تنظيمېدو په کليدي پړاو کې دی، ښه فرصتونه برابر کړي.
که څه هم اوس د نړيوال اقتصاد بيا سمسورتيا سوکه ده، خو بريکس هېوادونه لاهم د اقتصاد انعطاف پذيري ښيي چې عمومي نفوس يې د نړۍ نيمه برخه نيسي،عمومي اقتصادي اندازه يې د نړۍ په سلو کې له دېرشو څخه زياته ده او د نړیوال اقتصادي پرمختګ لپاره خدمتي انډول يې له ۵۰ سلنې څخه هم زیات دی او د توليداتو توان يې د اوو صنعتي هېوادونو د ګروپ د توان په پرتله لا پیاوړی دی. دغه پرمختیايي ځواک د ورخلاصون، ټول شموليت، همکارۍ او ګډو برياليتوبونو د کليدي مفکورې په رڼا کې نه يوازې نوي سمسور او لوی بازار لرونکي هېوادونه بلکې د ایران په شان سيمه ييز اغيز لرونکي هېوادونه هم راجلب کړي او يوه ګډه پرمختيايي ټولنه يې جوړه کړې ده.
له دې سرمشريزې نه مخکې کولمبيا او ازبکستان چې د بريکس غړیتوب نه لري، د نوي پرمختيايي بانک د غړو په توګه ټاکل شوي چې دا هم د بريکس د پراخې همکارۍ د ماډل جذابيت ښيي. تر اوسه پورې نوی پرمختیایي بانک د بريکس هېوادونو د همکارۍ لپاره د ملا تېر رول لوبولی او د روغتیا، ټرانسپورټ او انرژۍ په برخو کې يې څه باندې ۱۲۰ پروژې يې منظور کړې دي.
د بريکس هېوادونو ترمنځ له بریالیو همکاريو څخه دا ثابتوي چې بېلا بېل تمدنونه په سوله او همغږۍ کې پایښت موندلای شي.راتلونکې ته په کتو سره به بريکس هېوادونه د بريکس د روحيې په رڼا کې په بېلا بېلو برخو کې خپلمنځي همکارۍ لا پياوړې کړي، نړيوال اداري سيستم ته به وده ورکړي او د نړيوالې سولې او پرمختګ لپاره به لا مهم او زيات خدمتونه وکړي.