په ۲۰۲۵ کال کې د موټرو نړیوال بازار له بېلابېلو اقتصادي او تخنیکي بدلونونو سره مخ دی. د نړۍ سترو بازارونو لکه چین، اروپا، امریکا او روسیې کې د موټرو د پلور او تولید وضعیت بېلابېل حالتونه لري، چې د شرکتونو د ستراتیژیو پر بدلون یې هم اغېز کړی دی. د مرسدس بنز د مسافر وړونکو موټرو خرڅلاو د ۲۰۲۵ کال په دویمه ربع کې په آسیا کې ۱۶ سلنه او په شمالي امریکا کې ۱۴ سلنه راټیټ شوی دی.
په امریکا کې یوازې ۷۴،۶۰۰ موټرونه پلورل شوي. برعکس، په اروپا کې د دغه شرکت پلور یو سلنه زیات شوی، چې دا له ورایه د بازار باثباتي ښيي. په آلمان کې د ۲۰۲۵ کال د لومړۍ نیمایي لپاره د موټرو پلور نږدې ۴.۷٪ راټیټ شوی او د کرونا وبا له مخکې کچې په پرتله لا هم ۲۴٪ کم دی. سره له دې، برقي او پلاګان هایبرډ موټرو وده کړې؛ یوازې د جون په میاشت کې د برقي موټرو پلور ۸.۶٪ او د پلاګان هایبرډ موټرو پلور ۶۶.۴٪ زیات شوی.
خو چین لا هم په دې برخه کې په نړیواله کچه مخکښ دی. د ۲۰۲۵ کال په جون کې، په دغه هېواد کې د مسافر وړونکو موټرو پلور ۲.۰۸ میلیونه ته رسېدلی، چې له دې جملې یې ۵۳٪ د نوې انرژۍ موټرونه (برقي او هایبرډ) دي. د نوې انرژۍ موټرو کلنۍ وده ۱۹.۷٪ ثبت شوې ده. بلخوا د تسلا چینایي څانګې له مرکزي دفتر څخه غوښتي چې د چین بازار لپاره ځانګړې محلي اپلیکیشنونه او خدمات په موټرو کې شامل کړل شي، خو دا غوښتنه د امریکا له خوا رد شوې او دا موضوع د نړیوالو بازارونو ترمنځ د لیدلوري د توپیر څرګندویي کوي.
فولکسواګن د کال په لومړۍ نیمایي کې ۴.۴۱ میلیونه موټرونه نړېوال بازار ته وړاندې کړي دي، چې ۱.۳٪ زیاتوالی ښيي. په چین کې یې ۲.۸٪ وده کړې، خو په شمالي امریکا کې یې پلور ۱۶.۲٪ راکم شوی.
دغه راز له جاپاني شرکتونو، تویوتا او نیسان د پام وړ وده کړې، خو هوندا له ۱۵٪ زیات کمښت سره مخ ده. بلخوا په روسیه کې د موټرو ثبت په جون میاشت کې ۲۷.۶٪ راکم شوی. که څه هم لادا تر ټولو مخکښ برانډ دی، خو ۲۹٪ کمښت لري. چینایي شرکتونه لکه چانګان، چري او جیلي هم له ۳۰٪ زیات کمښت تجربه کړی، خو ګډ برانډ Belgee د ۲۵.۵٪ ودې او Solaris د ۵۵.۹٪ لوړتیا سره بازار ته نوی خوځنده ځواک ورکړی دی.