د چین د ښارونو په تړاو د دغه هېواد د واکمن کمونېست ګوند وروستۍ کاري غونډه څو ورځې مخکې په پلازمېنې بېجینګ کې ترسره شوه او د دغه هېواد دولت رئیس شي جين پينګ پکې د عصري ښار مفکوره وړاندې کړې ده.
د چين کمونېست ګوند څو ځلې د ښارونو په تړاو کاري غونډې ترسره کړي، چې هره يوه يې د دغه هېواد د ښارونو د ابادۍ نوې پيلامه بلل شوې او د ښارونو د پراختيا نوې طریقه او لاره پکې روښانه شوې ده.
تېره غونډه يې په ۲۰۱۵م کال کې ترسره کړې وه. هغه وخت په چين کې د کاري کېدو بهیر د چټک پرمختګ په حال کې و، خو په عین وخت کې د چاپېريال ککړتيا، ترافيکي ګڼه ګوڼه او ځينې نورې ستونزې، چې د ښارونو په پراختيا سره رامنځته شوې وې، ډېرې سختې وې. په همدې غونډه کې چې د ښارونو د کارونو لپاره ځانګړې شوې وه، د دغو ستونزو د هواري تدبیرونه ټاکل شوي وو.
پر يادې غونډې لس کاله تېر شوي او د چين د واکمن کمونېست ګوند مرکزي کمېټه له څېړنو وروسته دې نتيجې ته رسېدلې، چې د هېواد د ښاري کېدو بهیر د چټک پرمختګ پړاو څخه د ثابت پرمختګ پړاو ته داخل شوی، چې پدې برخه کې زياته توجو باید له کمي لحاظه کيفي بدلون ته وګرځي.
د چين د واکمن کمونېست ګوند مرکزي کمېټه موخه لري، چې په هېواد کې نوښتګر، د ژوند لپاره مناسب، ښکلي، پیاوړي، متمدن او ځيرک عصري ښارونه جوړ کړي او خپله اصلي دنده يې د ښارونو زياتول نه، بلکې د موجودو ښارونو ښه مديريت، د ښارونو د جوړښت اصلاح، د ډېرو پخوانيو کورونو ترميم او د تاریخي اثارو ساتنه بللې ده.
په همدې غونډه کې پر دې ټينګار شوی، چې ښارونو ته باید ثابت پرمختګ ورکړل شي، څو د کارونو کيفيت لا لوړ او د خلکو ژوند لا ښه شي.
ترافيکي ګڼه ګوڼه تر ډېره په لويو ښارونو کې رامنځته کېږي. د چين مشرتابه د عصري ښار مفکورې په رڼا کې د دغې ستونزې د حل لپاره سیسټماتيک او ډيالکتيک ماترياليستي لاره موندلې، چې له مخې يې لوی، منځني او کوچني ښارونه، ولسوالۍ او ښارګوټي باید په ګروپي يا ډله ييزه توګه پرمختګ ومومي. لوی او کوچني ښارونه باید دندې وويشي او په ګډې همکارۍ يې باید بشپړې کړي او يو د بل له برتريو او ځانګړتياوو څخه باید ګټې پورته او لوی صنعتي ګروپ رامنځته کړي، چې دغه چاره یې نه يوازې د لويو کارونو لپاره د ترافيک او ککړتيا ستونزې هوارولای شي، بلکې د ګردې سيمې ظرفيت هم اوچتولی شي. د دې ترڅنګ د ولسواليو او ښارګوټو په ابادۍ سره خلک په خپلو سيمو کې ښه ژوند کولی شي او دې ته به بیا نه اړ کېږي، چې د ښه ژوند لپاره ګڼ نفوسه ښارونو ته کډه شي.
د چين د ښارونو د عمومي کيفيت د لوړېدو رمز په هغې ستراتېژۍ ((د سيمو د همغږي پرمختګ ستراتېژي)) کې نغښتی، چې د دغه هېواد د دولت رئيس شي جين پينګ لخوا وړاندې شوې ده.
ښارونه څنګه ښه اداره کېدای شي؟
د مديريت او ازادۍ ترمنځ بېلانس ډېر مهم دی، نو د توليد امنيت او د چاپېريال ساتنې په څېر د ځينو برخو کارونه باید تر جدي مدیريت لاندې ترسره شي او ځينو نورو برخو، د بېلګې په توګه د کمپنيو د راجيسټر او کاروبار په برخو کې باید اسانتياوې رامنځته شي.
د ځينو لوېديځو هېوادونو د ښاري کېدو په بهیر کې د بېوزله او بډای ترمنځ لوی واټن رامنځته شوی دی. چين د دې ستونزې د مخنيوي لپاره پلان جوړ کړی، چې له مخې يې په ښارونو کې وروسته پاتې سيمې بیارغولي او د دغو سیمو د چاپېريال د ښه کولو ترڅنګ يې هڅه کړې، چې د سيمو ځانګړې فضا او کلتور وساتي.
په لوېديځ کې پانګه عموماً په ګټو پسې ګرځي او همدا د هغو ستونزو سبب کېږي، چې د عامه خدماتو په برخه کې پانګې کمې وي او کمزوري خلک سرچېنو ته لاسرسی نه لري. چين بيا داسې لاره پيدا کړې، چې له مخې يې په ښارونو کې د عصري دنګو ودانيو د جوړولو ترڅنګ د خلکو د ژوند کيفيت هم تامين وي.