د تایلنډ سرپرست لومړي وزیر پومتام ویچایاچای او د کمبوډیا لومړي وزیر هون مانیت د جولای په ۲۸مې نېټې په مالیزیا کې درې ساعته ليدنه کړې او لږ خبرو اترو وروسته يې د “غیر مشروط” اوربند اعلان کړی دی.
د سیمه ییزو کارپوهانو په اند، تایلنډ او کمبوډیا د خبرو اترو له لارې د شخړې د هواري لېوالتيا درلوده او هم نړیوالې ټولنې ورته د منځګړیتوب ښه فضا برابره کړې وه، نو ځکه دواړه هېوادونه ډېر ژر پر اوربند سلا شول او بېړنۍ هوکړه یې وکړه. خو د دواړو هېوادونو ترمنځ ځمکنۍ شخړه لا هم پر ځای ده. کارپوهان د هوکړې پلي کول او د توپيرونو اداره د دواړو هېوادونو د سرحدي سیمې د سولې او ثبات لپاره کليدي ټکي بولي.
د تایلنډ او کمبوډیا صدراعظمانو د روانې میاشتې د ۲۸مې نېټې په ماسپښین د لوړ پوړو پلاويو په مشرۍ په مالیزیا کې د دواړو هېوادونو د سرحدي وضعیت په اړه ځانګړې غونډه کړې ده.
د مالیزیا لومړي وزیر انور ابراهيم، چې د يادې غونډې مشري یې کوله، رسنيو ته ويلي « تایلنډ او کمبوډیا هوکړه کړې، چې پر ځايي وخت د جولای د ۲۸مې نېټې د شپې له ۱۲ بجو څخه “سمدستي او غیر مشروط” اوربند وکړي. دغه هوکړه د تایلنډ او کمبوډیا د سرحدي وضعيت د ارامتیا او د سولې او امنیت لپاره لومړی ګام دی.
د انور ابراهيم په وینا، دواړو خواوو د اوربند د پروسې د تطبیق لپاره ترتیبات نیولي او هوکړه يې کړې، چې د روانې مياشتې په ۲۹مې نېټې د سهار په ۷ بجو به د سیمه ییزو قوماندانانو غیر رسمي غونډه وکړي او کمبوډیا به د اګست په ۴مه نېټه د سرحدي ګډې کمیټې د غونډې کوربتوب وکړي.
تایلنډ او کمبوډیا هوکړه کړې، چې د صدراعظمانو، بهرنیو چارو وزیرانو او دفاع وزیرانو په کچه مستقیمې اړیکې به بیا پیل کړي او له مالیزیا سره به د اوربند د پلي کولو، څار او راپور ورکولو میکانیزم جوړ کړي.
مالیزیا به د ډاډ لپاره د اسیان له نورو غړو هېوادونو سره په ګډې مشورې سیمې ته د څار ډله ولېږي، څو دواړه خواوې د اوربند او سولې ژمنې پوره پلي کړي.
د کمبوډیا او تایلنډ مشرانو د يادو خبرو او د هغوی د پایلو مثبته ارزونه کړې ده.
د کمبوډیا لومړي وزیر هون مانیت ويلي، چې يادې ځانګړې غونډې ښې پایلې درلودې او د دواړو هېوادونو د عادي اړیکو د بیا جوړولو لپاره یې ښه شرایط برابر کړي دي.
د تایلنډ سرپرست لومړي وزیر پومتام ویچایاچای ويلي، چې دواړو خواوو په صميميت خبرې کړي او پايلې کې يې د مسئلې د سوله ییز حل لپاره د تایلنډ غوښتنې منعکس شوې دي.
د دواړو هېوادونو ترمنځ يادې خبرې په څه کم ۳ ساعتونو کې ترسره شوي او ښه پايله یې ورکړې ده.
د تایلینډ او کمبوډیا کارپوهان ۳ لاملونه په لنډ وخت کې د يادې هوکړې د رامنځته کېدو سبب بولي.
۱. تایلنډ او کمبوډیا پوهېږي، چې د دواړو خواوو ترمنځ ځمکنۍ شخړه د زور له لارې نشي حل کېدای.
۲. دواړه هېوادونه په تېر کې هم د خبرو اترو له لارې د شخړو د هواري تجربه لري.
۳. نړیوالې ټولنې د دواړو هېوادونو ترمنځ د سولې فعال منځګړیتوب کړی دی.
د تایلینډ او کمبوډیا کارپوهانو ویلي، چې د شخړې دوام نه یوازې د دواړو خواوو له ګټو سره سمون نه لري، بلکې د سیمې او نړیوالې ټولنې د ګډو ګټو لپاره هم ګټور نه دی. دوی په دواړو هېوادونو غږ کړی، چې د اوربند تړون ښه پلی کړي او د خبرو اترو له لارې دې د تلپاتې سولې په لټه شي.