سره له دې چې په قطر کې د سولې مذاکراتي ټیم د اوربند په رامنځ ته کولو ټینګار کوي، خو په کابل او ولایتونو کې خونړۍ جګړې د افغانانو ژوند تریخ کړی دی. په کابل کې بیا د جګړو تر څنګ وسله والې غلاوې او مافیايي کړۍ نور هغه عوامل دي چې پر خلکو یې لاره ورکه کړې او د ژوند نظم یې ور ګډوډ کړی دی. بلخوا امنیتي ادارې په تشو ژمنو د خلکو د ارامولو هڅه کوي او ځانونه بریالي ښيي. د بشري حقونو خپلواک کمېسیون هم پر زیاتېدونکې نا امنۍ او هدفي بریدونو اندېښنه ښيي.
په تېرو ۲۴ ساعتونو کې په پلازمېنه کابل کې درې بریدونه وشول او یو ځای پر ځای شوی ماین هم د امنیتي ځواکونو له لوري خنثی کړل شوی دی. د راپورونو له مخې، د کابل ښار د ۱۶مې حوزې د چکري د تېل ټانک ته څېرمه ناپېژانده وسله والو د لویې څارنوالۍ پر دوو کارکوونکو برید وکړ او ویې وژل. وسله وال له برید وروسته په تېښته بریالي شول، خو د سیمې خلکو د دې پېښې په غبرګون کې لاریون وکړ. خلک وایي، چې حکومت یې د امنیت په تامین کې ناکام دی او ژمنې یې تش په نامه دي. له دې سره هممهاله د کابل ښار د اتمې حوزې اړوند له هېوادوال بلاکونو سره څېرمه پر یوه موټر د چسپکي ماین چاودنه وشوه چې یو کس پکې ووژل شو او دوه نور ټپیان شول. تېر ماښام بیا د کابل ښار د میرویس میدان په سیمه کې هم درنه چاودنه وشوه چې په اړه نور معلومات ور نه کړل شول.
د دې ټولو مسایلو تر څنګ د کابل ښار کوڅې د وسله والو غلو او مافیاوو په محاصره کې وي. کابل ښاریان په ډاډه زړه تګ راتګ نه شي کولی او دا ډلې هره ورځ خلکو ته تلفات اړوي. تېره ورځ د کابل ښار په بګرامیو کې وسله والو غلو د محصلینو موټر درولی و او د نغدو پیسو په ګډون یې ټول توکي ترې وړي وو. دا ټول هغه څه دي چې د کابل د پولیسو په کمزورۍ دلالت کوي.
له دې سره جوخت د بشري حقونو خپلواک کمېسیون بیا په هېواد کې زیاتېدونکی تاوتریخوالی د جدي اندېښنې وړ بولي. دغه کمېسیون تېره ورځ په یوه خپره کړې اعلامیه کې ویلي چې د روان کال په لومړیو شپږو میاشتو کې ۹۴۵ ملکي کسان د هدفي وژنو قرباني شوي چې له دې ډلې ۵۳۳ یې وژل شوي او ۴۱۲ نور ټپیان دي. د بشري حقونو خپلواک کمېسیون وایي چې د ملکي وګړو وژل او د دوی په نښه کول ستر بشري جنایت دی او دواړو لورو ته په کار ده چې د ملکي وګړو ژوند ته متوجه خطرونه له منځه یوسي. د سرچینې په خبره: ((د تاوتریخوالي دوام، د ملکي وګړو په نښه کول، هدفي بریدونه او خونړۍ جګړې د سولې له روانو هڅو سره په ټکر کې کړنې دي چې له دې سره هممهاله هدفي بریدونه هم ډېر شوي او کمېسیون یې په کلکو ټکو غندي)).
د بشري حقونو خپلواک کمېسیون د جګړې له ښکېلو لورو غوښتي چې ټولو نړیوالو بشردوستانه اصولو ته درناوی وکړي او د کمېسیون هغه غوښتنې ته پام وکړي چې له مخې یې اوربند او د تاوتریخوالي کمول باید کم کړل شي.
یاد کمېسیون دغه راز له حکومت هم غوښتي چې د خپلو خلکو د خوندیتوب لپاره دې هڅې ډېرې کړي. د دغه کمېسیون په اعلامیه کې راغلي چې حکومت د خپلو وګړو په ساتلو مکلف دی او دوی باید د عامو وګړو، مذهبي اقلیتونو، دیني علماوو او بشري حقونو د مدافعانو امنیت تامین کړي.
بلخوا د کورنیو چارو وزارت امنیتي مرستیال بیا تېره ورځ د کابل ولایت له امنیتي مسوولینو او د حوزو له آمرینو سره په لیدنه کې له دوی غوښتي چې ژر تر ژره دې د خلکو د امنیت لپاره خپل اقدامات لا ډېر کړي. امنیتي معین ویلي چې خلک د کابل له ناوړه امنیتي وضعیت شکایت کوي او د حوزو د آمرینو دنده ده چې په دې برخه کې خپل فعالیتونه همغږي او پراخ کړي.