د اکټوبر اوومه، ۱۹ کاله وروسته امریکا خپله جګړه موږ ته پرېږدي؟

له نن څخه پوره 19 کاله وړاندې د اکټوبر په اوومه امریکا پر افغانستان یرغل وکړ او ۱۹ کاله یې دلته جګړه وکړه. دا برید ظاهراً د سپټمبر د یوولسمې په پلمه شوی و، خو وروسته وروسته ښکارېدله چې امریکا د خپلو سترو موخو لپاره د سپټمبر یوولسمه پلمه کړه او پر افغانستان یې یرغل وکړ. د سپټمبر د یوولسمې په پېښه کې هېڅ افغان ښکېل نه و، خو امریکا پر افغانستان یرغل وکړ. په هغه پېښه کې شاوخوا درې زره امریکایان ووژل شول، خو امریکا یې غچ زموږ له بې ګناه وګړو واخیست. نولس کاله کېږي چې موږ له امریکايي وحشت سره مخ یو، سلګونه زره افغانان وژل شوي، سلګونه زره نور ټپیان شوي دي او لسګونه زره معیوب شوي دي. امریکا ۱۹کاله خپلې نوې او ممنوعه وسلې پر افغانانو استعمال کړې او ویې ازمویلې. د بمونو مور یې وکاروله، سرتېرو یې د خلکو په وژلو کې نوې تجربې وکړې او پر خلکو یې نښه ویشتل زده کړل. امریکايي وحشیانو ۱۹ کاله د افغانستان په کلي کلي او کور کور کې غم خپور کړ، وحشت یې وکړ او لوټه لوټه او کاڼی کاڼی یې په وینو رنګ کړ.

دا دی ۱۹ کاله وروسته امریکا له طالبان سره د سولې هوکړه کړې، خپل ځواکونه وباسي، خو په افغانستان کې جګړه روانه ده. دا اوس جدي اندېښنه او پوښتنه ده چې امریکا ځي، خو ایا خپله جګړه موږ ته پرېږدي؟

د امریکا او طالبانو له هوکړې وروسته امریکايي ځواکونه، امریکايي موخې او امریکایي وګړي په افغانستان کې خوندي شوي، د سرتېرو وتلو ته خوندي لاره برابره شوې او د امریکا په لګښتونو کې میلیاردونه ډالره کمښت راغلی دی، خو د افغانانو وژنه لا هم هغسې روانه ده. امریکايي چارواکي بیا بیا دا خبره کوي چې دوی په افغانستان کې خپله جګړه ختمه کړې ده، د جګړې بار یې له اوږو ښکته کړی او دا د افغانانو مسوولیت دی چې خپله ستونزه پخپله حل کړي. امریکايي چارواکي په دې خبرو سره نړۍ ته دا پيغام ورکوي چې د افغانستان د جګړې لامل دوی نه وو او نه هم دا جګړه د دوی په ورتګ او تلو پورې تړلې ده، خو امریکا په دغه کار سره نه د جګړې د وحشتونو له مسوولیته ځان خلاصولی شي او نه هم دا رښتیا ده چې امریکا وځي او نور په افغانستان کې ښکېله نه ده. امریکا اوس هم په جګړه کې ښکېله ده او هم د سولې خبرې د دوی د پلان او اجنډا له مخې له ستونزو او خنډونه سره مخ دي او واقعي مدیریت یې د دوی په لاس کې دی.

لا هم معلومه نه ده چې امریکا رښتیا هم جګړه ختموي او که غواړي چې دا جګړه د افغانانو ترمنځ همداسې دوام وکړي، خو دا زموږ افغانانو مسوولیت دی چې خپله جګړه ختمه کړو او پرې نه ږدو چې زموږ دښمنان بریالي شي. اوس وخت دی چې ټول افغانان د سولې لپاره واقعي کار وکړي، خنډونه ختم کړي او په خپله یو بل ته لاسونه ورکړي، څو دا نولس کاله وړاندې د اکټوبر په اوومه پیل شوې امریکايي جګړه ختمه شي او افغانستان ته سوله او ثبات را وګرځي.