د جګړې دوام او دوه زیانونه

د غور په مرکز کې په یوه موټر بم چاودنه کې ۱۵ کسان وژل شوي او تر سلو ډېر ټپیان دي. وژل شوي او ټپیانو ډېری ملکي وګړي دي. موټر بم چاودنه امنیه قوماندانۍ ته څېرمه شوې ده. کومې ډلې د دغه برید پړه پر غاړه نه ده اخیستې او طالبانو هم په دغه برید کې د لاس لرلو یا نه لرلو په اړه څه نه دي ویلي. له دې سره په ډېرو ولایتونو کې د پولیسو پر پوستو د طالبانو د بریدونو خبرونه ورکړل شوي دي. طالب ویاند ذبیح الله مجاهد هم پر خپل ټویټر د پولیسو پر ځینو پوستو د بریدونو او د امنیتي ځواکونو د وژلو ادعاوې کړي دي.

تمه وه او داسې ژمنې هم کېدلې چې د امریکا او طالبانو تر هوکړې وروسته به تاوتریخوالی بند او یا هم کم شي. وروسته بیا ویل کېدل چې د بین الافغاني خبرو له پیل سره به تاوتریخوالی کم شي، خو له بده مرغه ونه شول. که څه هم طالبانو ویل چې پر لویو ښارونو بریدونه او هلته چاودنې نه کوي، خو له بده مرغه د ناامنۍ پېښې لا هم خورا زیاتې دي. پر لویو ښارونو هم بریدونه کېږي، لویې چاودنې کېږي، موټر بم بریدونه کېږي، پر پوستو بریدونه کېږي او ګڼې نورې پېښې هم شته. طالبان په شدید یرغلیز حالت کې دي او دا له هغه څه سره توپیر لري چې طالبانو یې ژمنه کړې وه او یا یې اوس وايي. حکومت هم له بده مرغه تحریک کوونکې کړنې کوي، دوی چې د جګړې زور هم نه لري او آن نه شي کولی چې خپلو امنیتي ځواکونو ته پر وخت مرستې ور ورسوي، د جګړې خبرې کوي او د سولې پر ځای جګړې ته تمایل لري.

د جګړې او تاوتریخوالي دوام دوه لوی زیانونه لري: لومړی دا چې د دې جګړې او تاوتریخوالي قربانیان تر ډېره ملکي وګړي او په ټوله کې افغانان دي. دا جګړه چې یوازې افغانان پکې وژل کېږي او نور ټول بهرنیان پکې خوندي دي، په هېڅ ډول د توجیه وړ نه ده. د غور د پرونۍ او نورو پېښو تصویرونه زړه بوږنوونکي دي او د هر افغان زړه په هغو ښځو، ماشومانو او بې ګناه کسانو دردېږي چې په هلمند، غور او نورو پېښو کې زیانمن شوي، ټپي شوي، وژل شوي او بې کوره شوي دي. دویم دا چې د جګړې او تاوتریخوالي دوام به د سولې پر خبرو منفي اغېز وکړي. دا سمه ده چې د سولې روانې خبرې د دې پر ځای چې د دواړو اړخونو په خوښه او رضا روانې وي، تر ډېره د امریکا په خوښه او فشار مخ ته ځي، خو چې کله د سولې خبرې وي، نو طبیعي ده چې تاوتریخوالی باید کم شي. که دا جګړه او تاوتریخوالی یو مخ د سولې خبرې له خنډ سره مخ نه کړي، نو لږ تر لږه پر سوله‌ییزه فضا به منفي اغېز وکړي، خبرې به سختې، اوږدې او لانجمنې کړي.

دواړو اړخونو ته پکار ده چې پر افغان ولس، پر خپلو خلکو او هېوادوالو رحم وکړي. دوی باید جګړې او اور دا څپه ختمه کړي. پکار ده چې پر سوله تمرکز وکړي او پرې نه ږدي چې لا زیات افغانان د دې جګړې په اور کې وسوځیږي.