د چين دولت رئيس شي جين پينګ د سپتمبر په ۸مه نېټه د چين د پانګونې او سوداګرۍ ۲۵م نړيوال نندارتون ته د مبارکۍ پيغام واستاوه. هغه په خپل پيغام کې ويلي، چې هېواد يې غواړي له بېلابېلو خواوو سره د ګډو ګټو او ټول شموليت پر بنسټ د اقتصاد د نړيوال کېدو او د ښې راتلونکې د ابادولو لپاره ګډې هڅې وکړي. هغه د پرانيستي نړيوال اقتصاد د پرمختګ په هڅولو کې د چين د پانګونې او سوداګرۍ نړیوال نندارتون مثبت رول تایید کړی او څرګنده کړې يې ده ، چې چين د اقتصاد پر نړيوال کېدو ټينګار لري او د لوړې سویې ورخلاصون ته تزلزل ناپذیره ژمنتیا لري.
د چين د پانګونې او سوداګرۍ نړيوال نندارتون په نړۍ کې لويه اغېزه لري. دغه نندارتون د پانګونې د هڅولو، د باوري معلوماتو د خپرولو او د پانګونې د تمايل د څېړنې لپاره هڅه کوي. له دې څخه دا څرګنده شوې، چې د چين اقتصاد له نړيوال اقتصاد سره په ژوره توګه وصلېږي.
له يوې خوا، ورخلاصون د چين اساسي تګلاره ده او د بهرنيو پانګو راجلبول او کارول د ورخلاصون يوه مهمه برخه ده. بهرنيو شرکتونو د چين په صادراتو او وارداتو کې يو پر درېيمې ونډه لري او څه باندې ۳۰ ميلیونه کاري فرصتونه يې برابر کړی. د چين بازار پراخ لرليد، ثابتې تګلارې او ښه امنيت لري، چې د پانګونې او پرمختګ لپاره ګټور دی.
له بلې خوا، چين هم په نړۍ کې ډېر زياته پانګونه اچولې، له ۲۰۱۲ کال راهيسې، په بهر کې د چين د پانګونې اندازه په تېرو مسلسلو ۱۳ کلونو کې د نړۍ په لومړنیو درېیو مقامونو کې قرار لري. د ۲۰۲۴ کال تر پايه پورې په بهرنيو هېوادونو کې د چیني شرکتونو شمېر له ۵۰ زرو څخه اوښتی او په ۱۹۰ هېوادونو او سيمو کې شتون لري.
اوسمهال، يواړخيزتوب او پروټېکشنيزم لا سخت شوی، څواړخيزتوب او ازاده سوداګري له سختو چلينجونو سره مخامخ شوې، د نړيوال اقتصاد محرک ځواک کم شوی او د سوداګرۍ او پانګونې پروړاندې خنډونه د زياتېدو په حال کې دي.
شي جين پينګ څه موده مخکې د نړیوال مدیریت وړاندیز وکړ، د نړیوال اقتصاد د مدیریت د بشپړتيا، د نړيوال ورخلاصون او همکارۍ د ودې او د نړيوال اقتصاد د سمسورتيا لپاره يې لارښوونه وکړه او دا د بېلابېلو هېوادونو له هرکلي سره مخ شول.
بېلابېل هېوادونه بايد په ګډه سره د نړیوال مدیریت وړاندیز پلی کړي، ل نړیوال قوانین دې مراعات کړي، څواړخيزتوب دې تطبيق کړي، د سوداګرۍ د نړيوال سازمان تر لارښوونې لاندې دې د څواړخيزې سوداګرۍ له نظام څخه ملاتړ وکړي، د سوداګرۍ نړيوال سازمان نظريه او مقررات دې خوندي وساتي، د سوداګرۍ او پانګونې ازاۍ او اسانه کېدو ته دې وده ورکړي او د ورخلاصون له لارې دې ګډ پرمختګ زيات کړي.
شي جین پينګ وویل چې بشري ټولنه ګډ برخلیک لري، څواړخيزتوب د نړيوالو ننګونو د حل لپاره ضروري دی او هيڅوک د اقتصاد د نړیوال کېدو مخه نشي نیولای، بېلابېل هېوادونه بايد يووالی وساتي او یو له بل سره همکارۍ وکړي، څو نړیوال اقتصاد ثابت او تلپاتې پرمختګ ومومي. ده هیله ښودلې، چې نړیوال پانګوال د چين د پانګونې او سوداګرۍ د نړيوال نندارتون له لارې ژور بحثونه وکړي، ګډې موافقې ته ورسېږي او همکاريو ته وده ورکړي، څو په ګډه سره يو ښه راتلونکی جوړ کړي.