پخوانی ولسمشر حامد کرزی وايي چې افغانان د سولې د بهیر ننګه کوي خو « د افغانستان په اړه د پاکستان او امریکا معامله نه منو او په وړاندې به یې مقاومت کوو.» ولسمشر کرزي له امریکا غږ سره ځانګړې مرکه کې وویل: «د سولې بهیر چې امریکا رامنځ ته کړی، موږ وینو چې د پاکستان سره په عالي هماهنګۍ سره روان دی. موږ د سولې په بهیر کې د پاکستان رول درک کوو. خو موږ ته سوله بل څه ده او د امریکا او پاکستان ترمنځ موافقه یوه بله متفاوته موضوع ده.»
نوموړي وویل چې دا ډول معاملې له افغانستان څخه د پخواني شوروي اتحاد له وتلو وروسته هم شوې وې چې افغانان یې له بدبختیو سره مخامخ کړل.
ښاغلي کرزي وویل چې د چین او روسیې په ګډون باید د افغانستان ټول ګاونډیان له امریکا سره په تفاهم او همکارۍ سره د افغانستان د سولې ننګه وکړي.
کرزي زیاته کړې چې،د پردې تر شا باید هېڅ معامله او برنامه نه وي. موږ شفافیت غواړو. موږ نغواړو چې افغانستان د نورو هېوادونو د ګټو د تضاد ځای وي. حامد کرزی وایي چې افغانستان باید د رقابتونو ځای نه وي، موږ رنځ ګاللی دی. موږ غواړو چې افغانستان د همکارۍ ځای وي. کرزی وایي افغانان د بهرنیو هدفونو لپاره وژل کیږي.»
او که امریکا او پاکستان په رښتیا هم وغواړي په افغانستان کې به سوله راشي او په خبره یې افغانان به یې هم هرکلی وکړي.
حامد کرزی:د افغانستان پر سر د امریکا او پاکستان معامله نه منو
