په دې وروستیو کې په نړیوالو رسنیو کې د چین او امریکا ترمنځ د ټیک ټاک مسئلې په اړه توافق ته د رسېدو راپورونه ډېر خپاره شول.
د چین او امریکا پلاويو د سپتمبر په ۱۴مه او ۱۵مه نېټه د هسپانیې په مادرید کې د سوداګریزو او اقتصادي خبرو نوې دوره ترسره کړه .
په دې خبرو کې دواړو لوریو د چین او امریکا د مشرانو د مهمو موافقو په رڼا کې د متقابلې پاملرنې وړ اقتصادي او سوداګریزو موضوعاتو په هکله صمیمانه، ژور او رغنده بحثونه او د نظر تبادلې کړې چې په پایله کې د ټیک ټاک مسئلې، د پانګونې په برخه کې د بندیزونو د کمولو او د اړوندو همکاریو د هڅونې په اړه چوکاټي توافقات تر لاسه شوي دي.
کارپوهان په دې اند دي چې یاد چوکاټي توافقات اسانه نه دي ترلاسه شوي بلکې له ډېرو بحثونو وروسته دې نتیجې ته رسېدلي دي.
دوی وايي چې دا د توافقاتو سر دی او ور پسې به د ډېرو جزئیاتو په اړه تطبیقي ګامونه پورته شي.
د یادولو وړ ده چې دواړې خواوې د ټیکټاک شرکت پالیسۍ او د بازاري اصولو د درناوي پر بنسټ په امریکا کې د دغه اپلېکېشن استعمالوونکو د مالوماتو او د محتویاتو خوندیتوب او د ډېتاګانو اړوندو چارو په اړه موافقې ته رسېدلي دي.
د چین د بهرنیو چارو پوهنتون پروفیسور لي های دونګ په دې اړه ویلي: په دغه توافق سره د ټیک ټاک مسئلې د مناسب حل و فصل لپاره بنسټ ايښودل شوی، د چین او امریکا د تخنیکي تبادلې او د بازار ورخلاصون لپاره یې شرایط برابر کړي دي. که څه هم د چین او امریکا پر وړاندې سخت اختلافي مسائل موجود دي خو دې توافق وښوده چې که دواړه لوري په ګډو کوښښونو سره دغه ستونزې هم حلولای شي.
دا په تېرو پنځو میاشتو کې په مادرید کې د چین او امریکا د خبرو اترو څلورم پړاو دی. دواړو لوریو دا ځل د ټیکټاک په اړه مهمه موافقه تر لاسه کړې او له دې څرګندېږي چې د چین او امریکا د اقتصادي او سوداګریزو اړیکو اصلي بنسټ ګډې ګټې دي.
ټیکټاک اپلیکېشن په امریکا کې له ډېر وخته کار کوي او په دغه هېواد کې ډېر مینه وال لري. ټيکټاک په امریکا کې د خپل فعالیت پرمهال د دغه هېواد قوانین مراعات کړي دي، هلته يې د خپلو مشتریانو مالومات ټول په هماغه هېواد کې زېرمه کړي او په سينګاپور کې د ډېتاګانو د زيرمه کولو خدمت وړاندې کېږي. خو ځينو امریکايي سیاستوالو د ملي امنیت په پلمه پر ټیکټاک تورونه لګولي. د امریکا کانګرس په ۲۰۲۴ کال کې د یوې مصوبې په تصویبېدو سره پر ټیکټاک فشار وارد کړ چې یا به خپل شرکت د امریکا پر حکومت پلوري او یا به بندیز ورباندې ولګول شي. د کانګریس دا اقدام په امریکا کې د ټیکټاک د مشتریانو له پراخ مخالفت سره مخ شو.
د امریکا حکومت د دې مخالفتونو په نتیجه کې اړ شو چې د یادې مصوبې تطبیق د څلورو ځلو لپاره وځنډوي. سپینې ماڼۍ هم په دې وروستیو کې په ټیکټاک کې خپل اکونټ پرانیست.
دا د دې ښکارندويي کوي چې ټیکټاک د امریکا لپاره اهمیت لري.
چین د ټیکټاک په اړه تل ویلي چې د امریکا ناسمې کړنې د بازار او د نړیوالې سوداګرۍ له مقرراتو څخه سرغړونه ده. چین په ټینګه سره د دولت ګټې او په بهر کې د چیني تصدیو قانوني ګټې ساتي.
په داسې حال کې چې نړیوال اقتصاد کافي خوځنډه ځواک نه لري، مختلف هېوادونه دې د همکارۍ له لارې اوسنۍ ستونزې لرې کړي. د سوداګرۍ ساتنې غوښتنه هېڅ اغېزمنه پایله نه لري. سره له دې چې په اقتصاد او سوداګرۍ کې د چین او امریکا اختلافات زیات دي، خو دغه اختلافات د مشورو له لارې د حل وړ دي. چین او امریکا باید په راتلونکي ګام کې د مشرانو مهمې موافقې په جدي ډول تطبیق کړي، په تېره بیا امریکا باید د ټیکټاک په شمول د چیني تصدیو لپاره پرانیستی، د عدالت او برابرۍ پر بنسټ ولاړ او له سپکاوي پاک سوداګریز چاپېریال برابر کړي، له چین سره دې د خبرو اترو لاسته راوړنې په ښه توګه وساتي څو د دواړو لوریو سوداګریزې اړیکې په سالم، ثابت او دوامدار ډول ټینګې شي.