د چين کمونېست ګوند د مرکزي کمېټې عمومي منشي، د دولت رئيس او د مرکزي پوځي کمېسيون رئيس شي جين پينګ د دغه ګوند د مرکزي کمېټې د پلاوي په مشرۍ د شينجيانګ د اويغور کورواکې سيمې د جوړېدو د ۷۰مې کليزې په لمانځغونډه کې د ګډون لپاره د سپتمبر په ۲۳مه نېټه شينجيانګ ته ورسېد او د سپتمبر په ۲۴مه نېټه يې د دغې کورواکې سيمې د ګوندي کمېسيون او ځايي حکومت کاري راپورونه واورېدل.
شي جين پينګ په خپله وينا کې پر دې ټينګار وکړ، چې د شينجيانګ اړوندې څانګې بايد په نوې زمانه کې د دې سيمې د ادارې په اړه د چين کمونېست ګوند ستراتيژي په پوره، دقيقه او هراړخيزه توګه عملي کړي، په کارونو کې دې د ثبات د تامينولو پر بنسټ د پرمختګ د موندلو د اصل پيروي وکړي، پرمختګ او امنيت دې برابر کړي او د ټولنيز ثبات او دايمي امنيت پر عمومي موخې دې ټينګار وکړي.
شي جين پينګ دې ته اشاره وکړه، چې شيجيانګ بايد د چيني ملت د ګډې ټولنې اراده تقويه کړي او د دې ټولنې ابادۍ ته دې وده ورکړي. شي جين پينګ له اړوندو څانګو څخه غوښتنه وکړه، چې د مرکزي کمېټې له خوا د شينجيانګ په اړه پنځه رولونه دې وځلوي، خلک دې يو موټی کړي او د يوه سوسياليستي، متحد، همغږي، سمسور، شتمن، متمدن، هوسا، ښه ایکولوژيکي چاپېریال لرونکي او عصري شينجيانګ د ابادۍ لپاره دې نه ستومانه کېدونکې هڅې وکړي .
شي جين پينګ دغه راز وویل، چې د شينجيانګ د اويغور کورواکې سيمې ګوندي کمېسيون او حکومت د دې سيمې د جوړېدو له ۷۰ کلونو راهيسې د ګوند د مرکزي کمېټې تر ځواکمنې رهبرۍ او د خلکو تر ټينګ ملاتړ لاندې د بېلا بېلو قومونو د مامورينو او ولس په مشرۍ د هېواد او قومونو يوموټي توب، ټولنيز ثبات ، اقتصاد او ټولنې ته دوامداره پرمختګ او دې سيمې ته يې نوې بڼه ورکړې ده. ده زیاته کړه چې شينجيانګ د چين له نورو سيمو سره پر ټاکلي وخت د شتمنې ټولنې د جوړېدو موخې ته رسیدلی او په ګډه يې د سوسياليستي او عصري هېواد د هراړخيزې ابادۍ نوی مزل پيل کړی دی. شي جين پينګ د چين کمونېست ګوند د مرکزي کمېټې په استازيتوب د شينجيانګ د بېلا بېلو قومونو مامورينو او خلکو ته مبارکي او نيکې هيلې وړاندې کړې.
د شي جين پينګ په خبره، شينجيانګ بايد د خپلو سرچينو او صنايعو پر بنسټ د باکيفيته پرمختګ د هغې لارې د پيلولو لپاره هڅې وکړي، چې له خپلو ځانګړتياوو سره يې سمون لري. ده وویل چې شينجيانګ بايد ځانګړو او پياوړو صنعتي چارو ته پرمختګ ورکړي او د سيالۍ قوت لرونکي صنعتي ډلې دې وروزي. هغه وايي چې شيجيانګ بايد د ساينس او ټېکنالوژۍ نوښتونه د صنعتي چارو له نوښتونو سره وصل کړي او د خپل وضعيت له مخې دې د نوي کيفيت توليدي قوتونه ځواکمن کړي. نوموړی وايي چې شينجيانګ بايد د کلتور او سيلانۍ پيوستون پياوړی کړي او سلانيزو چارو ته دې پرمختګ ورکړي. دی دغه راز وايي چې په دې سیمه کې دې د ايکولوژيک سيسټم ساتنه او بيارغونې چارې پياوړې شي او د اقتصادي او ټولنيز پرمختګ په هره برخه کې دې زرغون اصلاحات وهڅول شي.
شي جین پينګ وايي چې د ورېښمو لارې د اقتصادي کمربند د مرکزي سيمې ابادۍ ته دې وده ورکول شي، تر څو دغه سيمه د چين په کورني او بهرني اقتصادي دوران کې لا مهم رول ولوبوي.
دی وايي چې په شينجيانګ کې دې د خلکو د ژوند تضمين او ښه والي ته لومړيتوب ورکول شي، د بېوزلۍ د له منځه وړلو په برخه کې شوې لاسته راوړنې دې نه یوازې وساتل شي، بلکې لا دې زیاتې شي، ټولنيزې چارې دې پياوړې شي او د پرمختګ په بهير کې دې د بېلا بېلو قومونو د خلکو ګډون او ګټې ډاډمنې شي.
شي جين پينګ دا روښانه کړه، چې د شينجيانګ د ټولنيز ثبات د تامينولو لپاره دې هره هڅه تر سره شي او په خلکو کې دې د ترهګرۍ ضد مبارزې او ثبات د ساتنې لپاره دفاعي کرښه ټينګه شي. دی همدارنګه وايي چې د چيني ملت د ګډې ټولنې اراده دې ټينګه شي او د دې ټولنې ابادي دې چټکه شي. نوموړی زیاتوي چې د کلتوري چارو پرمختګ او لارښوونکی رول دې پياوړی شي او د دولت، تاريخ، قومونو، کلتور او مذهب په اړه دې د بېلا بېلو قومونو د مامورينو او خلکو د سمې پېژندنې لارښوونه وشي.
شي جين پينګ دغه راز پر دې ټينګار وکړ، چې د ګوند د رهبرۍ او ابادۍ پياوړتيا د شينجيانګ د عصري کېدو اصلي ضامن دی.