چین ته د امریکا د عوامو مجلس د پلاوي سفر د سپتمبر په ۲۵مه نېټه پای ته رسېدلی، چې دا د ۲۰۱۹ میلادي کال له مارچ وروسته چین ته د امریکا د عوامو مجلس د پلاوي لومړی سفر دی او د نړیوالې ټولنې پراخ پام يې جلب کړی دی.
د يادولو وړ خبره دا ده، چې چین ته د امریکا پلاوي د دې سفر څخه مخکې، د چین او امریکا مشرانو ټېلیفوني اړیکه ونیوله. دواړو خواوو د چین او امریکا د اوسنیو اړیکو او د متقابلې اندیښنې وړ مسئلو په اړه د نظریو ژوره تبادله وکړه او په راتلونکي پړاو کې د چین او امریکا د اړیکو د باثباته پرمختګ ستراتيژيک لوری يې روښانه کړی دی. چین ته د امریکا د پلاوي یاد سفر د دواړو هېوادونو د مشرانو د ستراتيژيکې لارښوونې يوه لاسته راوړنه بلل کيږي. دغه سفر په دې وروستيو کې د چین او امریکا ترمنځ د لوړې کچې د تبادلې او تګ راتګ د پياوړتيا تمايل ساتلی او د دواړو خواوو ترمنځ د اړیکو د ثبات لپاره یو مثبت ګام دی.
څېړنې ښيي چې تقنين د چین په اړه د امریکا پر سیاست د دغه هېواد د کانګریس د غړو د اغیز لرلو اصلي وسیله ده.
برسېره پر دې، د امریکا کانګرس کولی شي پر منظمو پالیسیو د بیا کتنو او د اجرائیوي څانګو د راپورونو د غوښتنو له لارې د چین په اړه پالیسي هم جوړه کړي. له تاریخي پلوه د امریکا کانګرس د چین او امریکا د اړیکو د پرمختګ لپاره رغنده رول لوبولی و. خو په وروستیو کلونو کې د امریکا د کانګرس غړو په مکرر ډول د چین پرضد د منفي قوانینو وړاندیزونه کړي کوم چې د تایوان، هانکانګ، شینجیانګ مسئلې او سوداګریزې او اقتصادي مسئلې پکې شاملې دي. ځینې دا وړاندیزونه په پای کې د امریکا د ولسمشر لخوا تصویب او په قانون کې لاسلیک شول چې د چین ګټې یې په جدي توګه زیانمنې کړې.
د امریکا د یاد پلاوي مشر او د امریکا د عوامو مجلس د پوځي کمیټې لوړ پوړي غړي ادم سمیت وویل: د امریکا د عوامو مجلس د غړو سفر باید په هرو ۶ یا ۷ کلونو کې یو ځل نه وي، موږ ژر ژر داسې نورو تبادلو ته اړتیا لرو.
د چین او امریکا اړیکې په نړۍ کې ترټولو مهمې دوه اړخیزې اړیکې دي. دواړه هېوادونه کولی شي او باید ملګري او دوستان شي. د چین او امریکا په اړیکو کې اوسنی ثبات په سختۍ سره ګټل شوی او د ارزښت وړ دی.
چین ته د امریکا د عوامو مجلس د پلاوي د سفر په ترڅ کې، چیني لوري هيله څرګنده کړه، چې له امریکا سره یو ځای د مساواتو، درناوي او متقابلو ګټو پر بنسټ د مشورې له لارې د متقابلو اندیښنو د حل لپاره کوښښ وکړي. چین دغه راز د خپل ملي حاکمیت، امنیت او پراختیایي ګټو د دفاع په اړه خپل کلک دریځ بیا تکرار کړ.
د امریکا لوري څرګنده کړه چې دواړه هېوادونه باید د همکارۍ د پياوړتیا او په سوله ییزه توګه د توپیرونو د حل لپاره په ډېرو خبرو اترو کې ښکیل شي. د چین د بهرنیو چارو پوهنتون پروفیسور لي های دونګ په دې باور دی چې د همکارۍ د غوښتلو لپاره د امریکا اراده روښانه ده او په راتلونکي کې د چین او امریکا ترمنځ تګ راتګ ممکن ډېر ژور شي. هغه هیله لري چې د امریکا د عوامو مجلس پلاوی به په چین کې د خپلو مشاهدو او تجربو په اړه راپورونه امریکا ته وړاندې کړي او د امریکا کانګرس به وهڅوي چې د چین او امریکا ترمنځ د مثبتې تبادلې په برخه کې فعال رول ولوبوي.