په ملګرو ملتونو کې د چين دايمي مرستیال استازي ګنګ شوانګ د اکتوبر په ۶مه نېټه د «نړیوالې ترهګرۍ ختمولو لپاره اقدامات» په عنوان د ملګرو ملتونو د اتيايمې عمومي اسامبلې د شپږمې کمېټې په ناسته کې د وینا پرمهال وويل، چين د نړیوال امنیت او مدیریت ابتکاري وړاندیزونه کړي او له نړيوالې ټولنې غواړي چې د نړيوال مديريت په اړه دې د ګډو مشورو، ګډې ابادۍ او ګډو ګټو مفکوره عملي کړي او په ګډه دې د ترهګرۍ په شمول له نړيوالو ننګونو سره مقابله وکړي. د دې مفهوم له مخې چين له لاندې مواردو ملاتړ کوي:
لومړۍ: نړيواله ټولنه بايد له واحدو معيارونو ملاتړ وکړي او له ترهګرۍ سره د مقابلې لپاره نړیوالې هڅې متحدې کړي. چين له دې سره مخالفت کوي، چې ترهګري له يو ځانګړي هېواد، قوم او مذهب سره تړي او د ترهګرۍ ضد مسئلې د سياست او وسلې په توګه وکارول شي.
دويم: نړيواله ټولنه بايد د نړيوال قانون له مخې د ترهګرۍ معضله حل کړي او د ترهګرۍ ضد قانوني چوکاټ دې بشپړ کړي. بېلا بېلې خواوې بايد له دې کړنو سره مخالفت وکړي، چې له ترهګرۍ سره د مبارزې په پلمه د نورو پرضد له زور څخه ناوړه ګټه واخلي، د نورو هېوادونو پر ملي حاکميت، د خاورو بشپړتيا او بنسټيزو بشري حقونو يرغل وکړي.
درېيم: نړيواله ټولنه بايد پر سيستماتيکې نظريې ټينګار وکړي او د ترهګرۍ ضد جامع لارې استفاده وکړي. بايد په سوله ايزه توګه شخړې حل شي، پرمختګ ته دې په درنه سترګه وکتل شي او د بېوزلۍ له امله د ترهګرۍ د رامنځته کولو مخه دې ونيول شي.
ښاغلي ګنګ شوانګ زياته کړه، چين د ترهګرۍ قرباني دی. د ختيځ ترکستان اسلامي غورځنګ د ملګرو ملتونو لخوا د نړيوالو تروريستي ډلو په لېست کې شامل دی او دې ډلې د چين په دننه کې ګن شمېر تروريستي بريدونه تر سره کړي او غړي يې لاهم د سوريې او افغانستان په شمول ځینو ځايونو کې فعال دي. چين له بېلا بېلو خواوو څخه غوښتنه کوي، چې د دغې ډلې په شمول د ترهګرو ځواکونو له منځه وړلو لپاره اغيزمن فعاليتونه ترسره کړي، په ځانګړې توګه بلوڅ ازادي غوښتونکی پوځ او د دې ډلې اړوند مجيد لوا دې د بنديزونو په لېست کې شامل شي.