د بین الافغاني مذاکراتو له نامعلوم برخلیک سره هممهاله افغان سیاستوال پر دې باور دي چې د روانې کشالې د حل یوازینۍ لار د موقت حکومت جوړول دي. د حزب اسلامي مشر ګلبدین حکمتیار چې تازه له پاکستان راستون شوی، وایي چې طالبان اوسنی حکومت نه مني او د موقت حکومت غوښتونکي دي. بلخوا د ولسمشر ویاند د حزب اسلامي د مشر پر څرګندونو غبرګون ښودلی او هغه یې غندلې دي. له دې سره هممهاله په دوحه کې بین الافغاني مذاکرات په ټپه ولاړ دي او په افغانستان کې بیا روانه خونړۍ جګړه هره ورځ د لسګونو افغانانو ژوند اخلي.
سره له دې چې د بین الافغاني مذاکراتو پيل ته افغانان هیله من وو، خو د څه باندې یوې میاشتې په تېرېدو د دغو خبرو پایلې نه لرلو خلک ناهیلي کړي دي. تازه افغان سیاسیونو د سیمې هېوادونو ته سفرونه هم پیل کړي دي، څو د افغان سولې په تړاو سیمهییزه اجماع پیاوړې کړي. په همدې لړ کې څو ورځې وړاندې د حزب اسلامي مشر ګلبدین حکمتیار هم پاکستان ته تللی و او هلته یې له پاکستاني چارواکو سره د افغان سولې تر څنګ پر نورو مسایلو خبرې کړې دي.
حکمتیار کابل ته له راتګ سره سم خبري کنفرانس درلود او په دې خبري کنفرانس کې یې رسنیو ته د خپل سفر په اړه وضاحتونه ورکړل. هغه په همدې لړ کې وویل چې د سولې ملاتړی دی، خو طالبان له اوسني حکومت سره خبرو یا سولې ته تیار نه دي. د ګلبدین حکمتیار په وینا، د ستونزې د حل یوازینۍ لار دا ده چې په افغانستان کې موقت حکومت جوړ شي او طالبان به له هغه وروسته خبرو او مذاکراتو ته ادامه ورکوي. د ده په وینا، د سولې غوښتونکی دی او په دې برخه کې به هر راز هڅې کوي، خو تر هغه چې اوسني چارواکي په خپله خوښه د حکومت د ادامې غوښتونکي وي، طالبان هم ښايي تاوتریخوالی کم نه کړي او له جګړو لاس په سر نه شي.
نوموړي د سولې پر روان بهیر هم نیوکه کړې ده. هغه ویلي، په دوحه کې روان مذاکرات د ارګ او طالبانو ترمنځ دي او په افغانستان کې یې د جګړې پر ډګر هېڅ راز اغېز نه دی کړی او افغانان یې خپلو هيلو ته نه دي نږدې کړي.
حکمتیار دغه راز په دې خبري غونډه کې د حکومت پر بې کفایتۍ هم نیوکې وکړې او په خبره یې د حکومت د کمزوري مدیریت له امله په هېواد کې نا امني ډېره شوې او هره ورځ جنایي پېښې او ورانکاره ډلې د افغانانو ژوند اخلي. د ده په خبره، حکومت خپل مسوولیتونه په سمه توګه سر ته نه شي رسولی او یا یې وړتیا نه لري، نو ښه به وي چې واک ولس ته پرېږدي.
له دې څرګندونو څو دقیقې وروسته د ولسمشر ویاند صدیق صدیقي غبرګون ښودلی دی. نوموړي ویلي، حکومت د بیان ازادۍ ته درناوی لري، خو ګلبدین حکمتیار په تېرو څلوېښتو کلونو کې تل د هر حکومت مخالفت کړی او په خبره یې، د نوموړي له خبرو سره اوس افغانان عادت شوي دي. د صدیقي په وینا: ((موږ د بیان ازادي لرو. د هر سیاسي جهت خبرو ته ارزښت ورکوو، خو ښاغلی حکمتیار په تېرو څلوېښتو کلونو کې بل څه نه لري، یوازې د حکومتونو مخالفت کوي او اوس یې خلک هم له خبرو سره بلد شوي دي)).
په افغانستان کې سیاسي فضا داسې مهال له ناندریو ډکېږي چې په دوحه کې هم افغان مذاکرات له نامعلوم برخلیک سره مخ دي. دلته په هېواد کې د جګړې ډګر تود دی، خو هلته مذاکرات لا تر اوسه پر تګلاره توافق ته نه دي نږدې شوي. د نړیوالې ټولنې او ګڼو هېوادونو له غوښتنو سره سره تاوتریخوالی نه دی کم شوی، مذاکرات مخ ته نه ځي او جګړې بیا هره ورځ د ملکي افغانانو ژوند اخلي چې دې هر څه لویې اندېښنې پیدا کړې دي. ش