د چین اتم وارداتي نړیوال نندارتون د نومبر په ۵مې نېټې په شانګهای ښار کې پرانيستل شو، چې تر ۱۰مې نېټې پورې به دوام ولري. په سږني نندارتون کې د ګډونوالو تصدیو عمومي شمېر او د نندارځيانو پراخوالي بیا نوي ریکارډونه جوړ کړي دي.
افغان سوداګر صفي الله امینزي په دغه نندارتون کې پنځه ځلې برخه اخیستې او په سږني نندارتون کې يې هم افغان تولیدات نندارې ته وړاندې کړي دي.
نوموړي رسنيو ته ويلي، چې د افغانستان وچې مېوې او لاسي تولیداتو د همدغه نندارتون له لارې په چين کې شهرت موندلی او په خبره يې، په سږني نندارتون کې يې نور ځانګړي تولیدات پلور او نندارې ته وړاندې کړي دي.
د چین وارداتي نړیوال نندارتون په نړۍ کې يوازینی وارداتي نندارتون دی، چې د دولت له لوري ترسره کېږي او د نړۍ ګڼې تصدۍ پکې خپل تولیدات نندارې ته وړاندې کوي.
په سږني نندارتون کې په لومړي ځل د لږ پرمختیايي هېوادونو د تولیداتو لپاره ځانګړی نندارځی برابر شوی، چې د يادو هېوادونو ۱۶۳ تصديو پکې برخه اخیستې او دا شمېر د تېر کال د ورته شمېر په پرتله ۲۳ اعشاریه ۵ سلنه زیاتوالی ښيي.
چین یو میلیارډ او ۴ سوه ميلیونه نفوس او لوی بازار لري او د دې ترڅنګ د چینایانو د مصرف سویه هم مخ په لوړېدو ده، نو دغه نندارتون د پرمختيايي هېوادونو د تولیداتو لپاره ارزښتناک فرصتونه برابر کړي دي.
په دغه نندارتون کې د چیني مشتریانو د اړتیا وړ زرغون، روغتیايي او ځانګړي تولیدات د يادو هېوادونو له اکمالاتي ځنځیر سره پیوست شوي دي.
دغه نندارتون د افغانستان لپاره يو ښه سوداګریز فرصت دی او هم د دغه هېواد لپاره، چې خپل اقتصاد په نړيوال دوران کې راولي، يو پل دی.
افغانستان اوږدمهالې جګړې ځپلی او اوس په دې هڅه کې دي، چې خپل تولیدات، جلغوزي، لاسي غالۍ، زعفران او لاجورد او نور ګرانبیه توکي نړيوال بازار ته ورسوي.
د افغانستان توکو د دې نندارتون له لارې چیني بازار ته لاره موندلې او دا به د دغه هېواد له اقتصاد سره ډېره مرسته وکړي، د ځايي وګړیو لپاره به یې د روزګار فرصتونه او د ټولنې د ثبات لپاره به يې اقتصادي رېښې برابرې کړي.
د یادولو ده، چین په دغه نندارتون کې د لږ پرمختیايي هېوادونو لپاره مالیات لغوه کړي، د نندارځيانو د جوړولو په برخه کې يې ورته یو لړ امتیازي تګلارې غوره کړي او په دغه نندارتون کې د يادو هېوادونو د تصدیو د ګډون لپاره يې لاره هواره کړې ده.
د چين دغه ګامونه نه یوازې يو اقتصادي او سوداګريز اقدام دی، بلکې د چین د کمونېست ګوند د شملې مرکزي کمېټې په څلورمې عمومي غونډې کې د وړاندې شوې موخې په چوکاټ کې (د چیني شکله عصري کېدو جریان کې د چیني ملت بیاسمسورتيا) او (د چین ځانګړتیا لرونکي سوسیالیزم منظمه بشپړتيا)، د نړیوال مدیریت سیسټم په اصلاحاتو کې د چین فعال ګډون او هم د انسانانو د ګډ برخلیک ټولنې په جوړونه کې د دغه هېواد اغېزمن تدبیر دی.
چین په داسې حال کې، چې په لوېديځو هېوادونو کې د ځاني سوداګرۍ ساتنې نظریې پیاوړې شوي، په ټینګ هوډ وارداتي چارې زیاتې کړي او په تېره بیا لږ پرمختیايي هېوادونو ته يې ډېر ګټور فرصتونه برابر کړي دي.
د چین د ورخلاصون تګلاره د نړۍ په کړکېچن وضعیت کې ډېره ارزښتناکه بلل کېږي.
د چین د پرمختګ نظریې د دې ښکارندويي کوي، چې په نړۍ کې اوس د زيرو- سم لوبه هيڅ ارزښت نه لري او ټول هېوادونه باید ګډ پرمختګ ومومي. دغه لاره ښايي ډېره اوږده وي، خو لوری یې روښانه دی.
که نړیواله ټولنه ګډ پرمختګ ومومي، نو د هېوادونو دایمي سمسورتیا او د انسانانو ګډ برخلیک ټولنه به رامنځته شي.