د امريکا ولسمشر ډونالډ ټرمپ د نومبر په لسمه نېټه په سپينې ماڼۍ کې د سوريې رژیم له مشر احمد شرع سره لیدلي او پټې خبرې یې ورسره کړې دي.
دا د سوریې له خپلواکۍ (۱۹۴۶م کال) راهیسې لومړی ځل و، چې د دغه هېواد مشر امريکا ته سفر کړی او امريکايي مشر سره یې لیدلي دي.
د امريکا ولسمشر ډونالډ ټرمپ پر سوريې د بنديزونو معافيت غځولی او په بدل کې احمد شرع ورسره ژمنه کړې، چې هېواد به یې د داعش پر ضد د مبارزې په برخه کې له امريکا سره پوره همکارۍ وکړي.
شنونکي وايي، پر سوريې د امريکا د بنديزونو معافيت غځول به تر يوې اندازې د دغه هېواد اقتصاد په خوځښت راولي او هم به یې د اوسني رژيم د چارو لپاره ګټور وي. په ورته وخت کې، امريکا هم په منځني ختیځ کې د سوريې د اوسني رژيم پرمټ خپلې ستراتيژيکې ګټې ساتلی شي. خو بیا هم د دواړو هېوادونو په دوه اړخيزو اړيکو کې ناثابت عوامل زيات تر سترګو کېږي، نو امکان شته سوریه له امریکا سره په ژمنو کې پاتې راشي.
سوريه د ډيپلوماتيکې پراختيا لار لټوي
احمد شرع په داسې حال کې سپینې ماڼۍ ته داخل شو، چې پر موټر يې د سوریې ملي بیرغ نه و ځړېدلی او ډونالډ ټرمپ د نورو هېوادونو د مشرانو د هرکلي برخلاف، د سپينې ماڼۍ په دروازه کې ورته ښه راغلاست ونه وایه.
ډونالډ ټرمپ له احمد شرع سره له خبرو وروسته رسنيو ته ويلي، چې هغه يو قوي او ځواکمن مشر دی او امريکا به د سياسي انتقال په بهير کې ورسره مرسته وکړي.
د امريکا ماليې وزارت په همدې ورځ اعلان کړی، د ټرمپ هغه اجرايوي فرمان چې په مې مياشت کې يې پر سوريې د بنديزونو د معافيت لپاره صادر کړی و، ۱۸۰ ورځې نور هم غځولی دی.
احمد شرع امريکا ته د سفر عمده هدف دا و، چې واشګنټن پر دمشق لګیدلي بندیزونه لرې کړي، اقتصاد يې وغوړېږي او نړيوالې ټولنې کې يې حکومت رسميت پیدا او بېرته نړيوال ډګر ته ستون شي.
د دواړو خواوو خبرو ته په کتو، ښايي سوریه خپل هدف ته ورسېږي.
سوريې د امريکا په لارښوونې او نظارت د ترهګرۍ ضد همکارۍ کې مثبته رویه ښودلې ده.
د سوريې رژیم د مطبوعاتي ادارې مسئول مصطفی رسنيو ته ويلي، چې هېواد یې په وروستيو کې له نړيوالې ټولنې سره د داعش ضد همکاريو اعلاميه لاسلیک کړې او د ترهګرۍ ضد مبارزه او د سيمه ييز ثبات د ساتلو په چارو کې يې د ملګرتيا رول ثابت کړی دی.
د سوريې رژیم په وروستيو کې د دغه هېواد په ګڼ شمېر سیمو کې پر داعشيانو عمليات کړي او څه باندې اويا مشکوک کسان يې نيولي دي.
د سوريې د سياسي چارو شنونکی احمد اشکر په دې اند دی، چې سوريه په نړيوالې ټولنې کې د رسميت پېژندنې، نظامي روزنې او لوجستيک ملاتړ ترلاسه کولی شي او ښايي د سوريې رژیم ته پراخه ډيپلوماتيکه فضا هم برابره کړي او ګټې ورته ورسوي.
امريکا ته د احمد شرع سفر ښايي د سوريې او لوېديځو هېوادونو ترمنځ د اړيکو نوی باب پرانېزي.
دا سفر ممکن د سوريې په اړه د امريکا د پاليسۍ د بدلون او په منځني ختيځ کې د امريکايي ځواکونو د بيا ځای پر ځای کېدو لپاره يو مهم ګام وي
د سوريې مخکیني ولسمشر بشارلاسد له روسیې سره نږدې اړيکې درلودې او امريکا او اسرائيل پخوا سوريه د ايران په مشرۍ د مقاومتي ډلې د غړي په توګه بللې ده.
کله چې د تېر کال په ډسمبر کې د بشارلاسد واک وشړېده او حکومت يې چپه شو، نو د احمد شرع په مشرۍ وسله والې ډلې پر دغه هېواد ولکه ټينګه کړه.
احمد شرع واک ته له رسیدو سره سم له امريکا بیا بیا غوښتي چې پر سوریې لګیدلي بندیزونه لغوه کړي.
د امريکا دواړه ګوندونه دا نظر لري، چې پر سوريې د بنديزونو د لغوه کولو له لارې د شرع رژيم سره مرسته کول پر دغې سيمې د ايران د نفوذ په کمزورتيا او د داعش د بيا فعالېدو په مخنيوي کې مهم رول لوبولی شي او هم په سوريې او سيمه کې د روسیې او ايران اغېزه محدودولی شي.