د اقلیمې بدلون په اړه د ملګرو ملتونو د چوکاټي تړون ۳۰مه سرمشریزه (COP30) د نومبر په ۲۲مه نېټه د برازیل په بېلېم کې پای ته ورسېده. امريکا په دغه سرمشريزه کې نه دی ګډون کړی او اروپا او کاڼادا د امريکا د غياب تر اغېزې لاندې سخته اندېښنه ښودلې ده.
نړیوالې اقلیمي حکومتدارۍ ته د یو اړخیزم او د جیوپولیتیک تاوتریخوالي د زیاتوالي له امله رامنځته شوې ننګونې روښانه شوې.
که څه هم د سراسري جنوب هېوادونه د پانګونې له کمښت او تخنیکي ستونزو سره مخامخ دي، دوی لاهم په دوامداره توګه د انرژۍ جوړښت د اصلاح په لاره کې پرمختګ کړی دی. په یاده سرمشریزه کې د چین غږ د ډېرو ګډونوالو ملاتړ ترلاسه کړ.
روان کال د اقلیمي بدلون په اړه د پاریس تړون د لاسلیکېدو له ۱۰مې کلیزې سره برابر او د چین له خوا د هغو هدفونو د وړاندې کولو له ۵مې کلیزې سره برابر دی، کوم چې له ۲۰۳۰م کال مخکې به د کاربن د ايستلو اندازه اوج ته ورسوي او له ۲۰۶۰م کال مخکې به کاربن نيوټرال رامنځته کړي. له اوږدې مودې راهیسې، چین د یوه مسؤلانه پرمختيايي هېواد په توګه په فعاله توګه له اقلیمي بدلون سره د مقابلې لپاره پر خپلې ملي ستراتیژۍ ټینګار کړی او خپل ټاکل شوي هدفونه يې پلی کړي.
د اقلیمي عمل په اړه د ملګرو ملتونو د سرمنشي ځانګړي سلاکار سیلوین هارټ په ۲۰۱۰ کال کې چین ته د خپل لومړي سفر د یادونې په وخت کې وویل، په تېرو ۱۵ کلونو کې چین نه یوازې د پاکې انرژۍ پرمختګ ګړندی کړی، بلکې نړۍ ته يې ښودلی چې پاکه انرژي څنګه د خلکو ژوند په رېښتیا بدلولی شي. هغه باور لري چې د شنه انرژۍ د پرمختګ په لاره کې د چین مشرتابه به کیلیدي رول ولوبوي.
چین په وروستیو کلونو کې د انسانانو او طبیعت ترمنځ د همغږۍ ګډ ژوند مفکورې پلې کړي او د خپل اقتصادي او ټولنیز پرمختګ په بهیر کې شنه بدلون ګړندی کړی چې د نړۍ ترټولو لوی او بشپړ نوي انرژۍ صنعت سلسله یې جوړه کړې او د شنه او ټیټ کاربن په چارو کې يې دوامداره نوي برياليتوبونه ترلاسه کړې.
د یو پرمختیايي هېواد په توګه، چین د نړیوالې انرژۍ او صنعت د شنه او ټیټ کاربن د بدلون د هڅولو لپاره ستر خدمتونه کړي دي.
د بيا کاريدونکې انرژۍ د نړیوالې ادارې عمومي مدیر فرانسیسکو لاکامیلا وویل چې چین په نړۍ کې ترټولو لوی د بيا کاريدونکې انرژۍ سیسټم جوړ کړی، په دوامداره توګه يې د انرژۍ د بنسټیزو تاسیساتو د ابادۍ لپاره پانګونه زیاته کړې او د انرژۍ سیسټم ډیجیټل کول او ځیرکتیا یې ښه کړي چې د نړۍ لپاره ارزښتناکه بېلګه برابروي.
د اقلیمي بدلون ننګونې ورځ تر بلې سختېږي چې د هغوی د حل لپاره پراخې نړیوالې همکارۍ ته اړتیا ده. چین ژمن دی چې د اقلیمي بدلون په برخه کې به د پرمختيايي هېوادونو همکارۍ ته وده ورکړي، له نورو پرمختيايي هېوادونو سره به په ګډه د اقلیمي بدلون له ننګونو سره مقابله وکړي او د شنه پرمختګ پایلې به شریکې کړي.