د اقتصادي چارو په تړاو د چين د کمونېست ګوند د مرکزي کمېټې کلنۍ غونډه د ډسمبر له لسمې نېټې څخه تر يوولسمې نېټې پورې په بیجینګ کې ترسره شوه. د چين د کمونېست ګوند د مرکزي کمېټې عمومي منشي، دولت رئيس او د مرکزي پوځي کمېسيون رئیس شي جین پينګ په دغه غونډه کې د هېواد د ۲۰۲۵م کال اقتصادي چارې په لنډو کې بیان کړې او د ۲۰۲۶م کال لپاره يې د اقتصادي چارو سپارښتنه وکړه.
په دې غونډه کې ویل شوي،چې د چین د روان کال د اقتصادي او ټولنیز پرمختګ عمده موخې به سالمې پوره شي، اقتصاد يې نوی او ښه پرمختګ موندلی او ۱۴م پنځه کلن پلان به په بريالیتوب پای ته ورسېږي.
په غونډه کې دې ته اشاره شوې، چې د چين د اقتصاد پر وړاندې پخوانۍ ستونزې موجودې دي او د دې ترڅنګ له نويو ننګونو سره هم مخ دی، خو د اوږدمهالې او مثبتې ودې تمايل يې نه دی بدل شوی. په راتلونکي کال کې باید د اقتصاد د ثابتې ودې لپاره هڅو ته دوام ورکړل شي، د ماکرو يا لوی اقتصاد فعالې او اغېزمنې تګلارې به عملي شي، راتلونکي ته په کتو به همغږي پیاوړې ، کورنۍ تقاضا به پراخه او عرضه به اصلاح شي. دغه راز به نوي با کيفیته توليدي ځواک ته وده ورکړل شي، د ممکنو خطرونو مخه به ونیول شي، د ټولنې همغږي او ثبات به وساتل شي، څو د ۱۵ م پنځه کلن پلان لپاره ښه پیلامه رامنځته شي.
په دې غونډه کې څو مهمې دندې ټاکل شوې دي، مثلاً د کورنۍ تقاضا له لارې به پیاوړی کورنی بازار جوړ شي. د نوښت له لارې به نوی خوځنده ځواک وروزل شي، اصلاحاتو او ورخلاصون ته به دوام ورکړل شي او حياتي ځواک به تقویه شي. پر همغږي پرمختګ به ټينګار وشي او د ښاري او کليوالو سیمو د اتصال لپاره هڅې به ګړندۍ شي. د زرغون بدلون او د خلکو د ژوند تضمين لپاره به هڅو ته دوام ورکړل شي، اساس به وساتل شي او په مهمو برخو کې به د خطرونو مخه ونيول شي.
غونډې له ټول ګوند او ټولې ټولنې څخه غوښتي، چې په يووالي سره د راتلونکي کال د اقتصادي او ټولنیزې ودې د موخو او دندو د پوره کولو لپاره زيارونه وباسي.