د وجهي نړيوال صندوق د ډسمبر په ۱۰مه نېټه په بېجينګ کې اعلان وکړ، چې د ۲۰۲۵ کال لپاره د چيني اقتصاد پرمختيايي وړاندوينه يې ۵ سلنې ته لوړه کړې او ويلي يې دي، سره له دې چې د چين پر وړاندې رنګا رنګ ننګونې موجودې دي، خو بیا هم اقتصاد يې انعطاف پزيره ښکاري.
د وجهي نړيوال صندوق له دې اعلان يوه ورځ وړاندې، په ”۱+۱۰“ ډيالوګ کې د ګډون په پار چين ته راغلو د څو نړيوالو اقتصادي سازمانونو مسؤلينو هم څرګنده کړې، چې د دغه هېواد اقتصاد له تېر يو کال راهيسې ثابت پرمختګ موندلی او د نړيوال اقتصاد زياتوالي ته يې مهم او ستر خدمتونه کړي دي.
د چين د اقتصاد بنسټ نور هم ټينګ شوی
د شانګهای بندر مسئولينو د نومبر په ۲۶مه نېټه رسنيو ته ويلي، چې دغه بندر د روان کال تر دې نېټې پورې ۵۰ ميليونه کانټينرونه بار او خالي کړي او دغې موخې ته د رسېدو وخت يې د تېر کال په پرتله ۲۶ ورځې کم شوی دی. دا د دغه بندر د کانټينرونو د لېږد رالېږد د کلنۍ اندازې د پر له پسې زياتوالي څرګندويي کوي.
له تېرو څو کلونو راهيسې د نړيوال اقتصاد په زياتوالي کې د چين خدمتي کچه شاوخوا ۳۰ سلنه ساتل شوې ده. د روان کال په تېرو درېيو ربعو کې د چين ناخالص کورني توليد د تېر کال د همدې مودې په مقايسه ۵.۲ سلنه زياتوالی ښودلی، چې دا کچه د نړۍ په ټولو عمده اقتصادونو کې مخکښ ځای نيسي. دغه راز په روان کال کې د چين اقتصادي حجم ممکن ۱۴۰ ټريليونو يوانو ته ورسېږي.
د ۲۰۲۵ کال په تېرو ۱۱ مياشتو کې د چين د توکو صادارتو او وارداتو اندازه د ۲۰۲۴م کال د همدې مودې په پرتله ۳.۶ سلنه زياتوالی موندلی او عمومي پيمانه يې له ۴۱ ټريليونو یوانو اوښتې او نوی تاريخي ريکارډ يې جوړ کړی دی.
له يادو اقتصادي شمېرو څخه د چيني اقتصاد ثابت او انعطاف پزيره پرمختګ معلومېږي او د نړيوال اقتصاد ترقۍ ته يې زیات باور ورکړی دی.
د امريکا د ګولډمان ساکس ډلې په شمول څو نړيوالو پولي ارګانونو په وار سره د چين د اقتصاد په اړه خپلې وړاندوينې لوړې کړې دي.
چين لوی بازار او څه باندې ۱.۴ ميليارډه نفوس لري، چې په دې کې څه دپاسه ۴۰۰ ميليونه يې منځني عايد لرونکي دي. چين د نړۍ دوهم لوی مصرفي بازار او د انټرنېټي پرچون لومړی لوی او دوهم لوی وارداتي هېواد بلل کېږي.
د چين مصرفي بازار په روان کال کې خپل قوي بالقوه توان ښکاره کړی او د ټولنې د مصرفي توکو د پرچون عمومي ارزښت يې ممکن له ۵۰ ټريليونو يوانو واوړي.
چين خورا قوي صنعتي او اکمالاتي ځنځيرونه لري.
چين د نړۍ لومړی لوی توليدونکی هېواد دی، بشپړ صنعتي ځنځير او اقتصادي سيسټم لري او په يو شمېر مهمو او کليدي ساحو کې يې د سيالۍ وړ تفاوق لرونکې چارې رامنځته کړي دي.
په چين کې اغېزمنې پاليسۍ او تګلارې پلې کېږي. لنډې مودې ته په کتو، د چين د کمونېست ګوند د مرکزي کمېټې د اقتصادي چارو غونډه، چې معمولاً د هر کال په پای کې ترسره کېږي، د هېواد د اقتصادي چارو غورچاڼ راټولوي او د راتلونکي کال د اقتصادي پراختيا لوری ټاکي. منځنۍ مودې ته په کتو، چين تراوسه ۱۴ پنځه کلن پلانونه پلي کړي او دا ډول مسلسل پلانونه یې د لړيزو تګلارو دوامدار تطبيق تضمينوي. راتلونکی کال د چين د اقتصادي او ټولنيز پرمختګ ۱۵م پنځه کلن پلان تطبيق پيلېږي، چې د چين د اړوندو تګلارو او اقتصادي پرمختګ ثبات ترې ښکاري.