د چين دولت رئيس شي جين پينګ او د روسیې ولسمشر ولادیمیر پوتین د ۲۰۲۵م کال د ډسمبر په ۳۱مې نېټې يو بل ته د نوي کال د مبارکۍ پيغامونه لېږلي دي.
رئيس شي جين پينګ د چین د حکومت او خلکو په استازیتوب ولسمشر پوتین او روسانو ته د زړه له کومي مبارکي او نیکې هیلې وړاندې کړې دي.
نوموړي په پيغام کې ويلي، چې ۲۰۲۵م کال د ملګرو ملتونو د تاسیس، د جاپاني يرغلرو پر وړاندې د چینايانو د مقاومت جګړې، د لوی شوروي د وطنپالنې جګړې او د فاشیزم ضد نړیوالې جګړې د بري له ۸۰مې کلیزې سره برابر و او په همدې کال کې د چین او روسیې هر اړخيزې ستراتیژیکې اړيکې مخ پر وړاندې تللې دي.
شي جين پينګ په پيغام کې له روسي سیال سره لیدنو ته هم اشاره کړې او ويلي يې دي، چې هغه په ۲۰۲۵م کال کې له ولسمشر پوتین سره دوه ځلې په بېجينګ او مسکو کې لیدلي او د ګډو اندېښنو وړ مسئلو په اړه يې ورسره ژورې تبادلې کړې دي.
نوموړي ويلي، چین او روسیې د ویزو د معافیت دوه اړخیزه پالیسي پلې کړې، د انرژۍ دهلیزونو جوړونې ته يې ثابت پرمختګ ورکړی او په نویو ساينسي او ټکنالوژيکو چارو کې يې همکارۍ کړې دي. دواړو هېوادونو په ملګرو ملتونو او نورو څو اړخیزو نړيوالو چوکاټونو کې یو له بله ملاتړ کړی او د نړیوال مديريت د اصلاح او ښه والي لپاره یې ځواک برابر کړی دی.
رئيس شي ويلي، چې ۲۰۲۶م کال د چین او روسیې د هر اړخيزو ستراتيژيکو اړيکو د تاسیس ۳۰مې او د دواړو هېوادونو د ښه ګاونډیتوب او دوستانه همکاريو تړون د لاسلیک له ۲۵مې کلیزې سره برابر دی. دواړه هېوادونه به په نوي کال کې “د چین او روسیې ښوونيز کال” تر عنوان لاندې فعاليت ترسره کړي.
نوموړي زیاته کړې، چې هغه به له ولسمشر پوتین سره نږدې اړیکې وساتي او د دواړو هېوادونو د اړيکو د لا نږدېوالي لپاره به هڅې وکړي او ښې لاسته رواړونې به ولري.
ولسمشر پوتین په پيغام کې ويلي، چې په ۲۰۲۵م کال کې د روسیې او چین ترمنځ هر اړخيزو ستراتیژیکو اړيکو ښه پرمختګ موندلی دی.
نوموړي ويلي، چې هغه به په راتلونکي ۲۰۲۶م کال کې د روسیې او چين د دوه اړخیزو اړیکو او لویو نړیوالو مسئلو په بحثونو کې له رئيس شي جين پينګ سره همغږي وساتي او نږدې اړیکو ته به ورسره دوام ورکړي.