د چين د کمونېست ګوند د مرکزي کمېټې د سیاسي بيورو غړي او د بهرنيو چارو وزير وانګ يي پر ځايي وخت د جنوري په اتمه نېټه په اديسه بابا کې د افريقايي ټولنې د کمېټې له رئيس یوسف سره د چين او دې ټولنې ترمنځ د نهم پړاو ستراتيژيکې خبرې اترې وکړې.
وانګ يي په خپلو خبرو کې ويلي چې افریقايي ټولنه د افريقايي يووالي او همکارۍ د رهبرۍ په برخه کې مهم رول لوبوي او د چين او افريقا ترمنځ په اړيکو کې مهم او ځانګړی ځای لري. په تېرو مسلسلو ۱۳ کلونو کې د چين د دولت رئيس شي جين پینګ د دې ټولنې سرمشريزې ته د مبارکۍ پيغامونه لېږلي او دا د دې ښکارندويي کوي چې چين له دې تولنې سره د اړيکو پرمختګ ته په درنه سترګه ګوري. روان کال د چين او افريقا ترمنځ د ديپلوماتيکو اړيکو د ټينګېدو له اويايمې کليزې سره برابر دی او هم ۳۶ م کال کېږي چې د چين د بهرنيو چارو وزير په هر نوي کال کې له افریقا څخه ليدنه کوي. د چين دغه ديپلوماتيکه عنعنه د دواړو خواوو ترمنځ د دوستۍ دوام او ورڅخه هم د افريقا پر وړاندې د چين ثابته تګلاره او د پرمختیايي هېوادونو يووالی ښکاري. د چين او افريقا عمومي نفوس څه باندې ۲ اعشاریه اته ميليارده دی. که يووالی وساتي او زيار وباسي، نو خامخا به هر ډول ستونزې لرې کړي، د عصريتوب ګامونه به چټک کړي او يوه لا معقوله، عادلانه او ثابته نړۍ به اباده کړي.
هغه زياته کړې چې اوس چين او افريقا په کليدي پرمختیايي پړاو کې دي او له ډېرو نويو همکاريزو فرصتونو سره مخ دي. چين غواړي د ځاني پرمختګ له لارې د افريقا په شمول له پراخو پرمختیايي هېوادونو سره مرستې وکړي او ورسره د عصريتوب د رامنځته کولو لپاره هلې ځلې هم وکړي او په ګډه د سراسري جنوب هېوادونو ګټې وساتي. د چین او افريقا د همکارۍ فورم د دواړو خواوو د ګډ پرمختګ لپاره مهم رول لوبولی دی او هم د دواړو خواوو ترمنځ د همکاریو د ګډو برياليتوبونو د تر لاسه کولو لپاره يې لاره هواره کړې ده. دواړه خواوې دې له دې فورم په استفادې خپلمنځي همکارۍ لا پیاوړې کړي او په ګډه د بريالۍ همکاريزې پروژې رامنځته کړي. په ورته مهال دواړه خواوې بايد په پر له پسې توګه د دوه اړخيزو اړيکو ستراتيژيک او نمونوي اهميت او اغېزه لوړه کړي او په دغو اړيکو کې دې د دې ټولنې له خوا د لارښوونکي رول د لوبولو لپاره هڅې وکړي.
چين د دې ټينګ ملاتړ کوي چې افريقايي ټولنه د افریقايي هېوادونو د خپلواکۍ او د خپلواکو پرمختیایي حقونو د ساتلو لپاره د رهبرۍ رول لوبوي، افریقايان په خپله د دې وچې په دننه کې موجودې ستونزې لرې کوي، له خپلو مشخصاتو سره سم خپله پرمختيايي لار غوره کوي او افريقايي ټولنه په سيمه ييزو چارو کې عمده رول لوبوي.
هغه هم همدارنګه ويلي چې افريقايي ټولنه په لومړي وخت کې د نړيوال مديريت په هکله د رئيس شي جين پينګ له وړانديز څخه ملاتړ څرګند کړی او داسې ښکاري چې دواړه خواوې يو د بل مفکوره مني او د نړيوال عدالت د رامنځته کولو په اړه ګډ نظر لري.
چين غواړي چې له دې ټولنې سره د څلورو لویو وړانديزونو په برخه کې دوه اړخيزې تبادلې لا پياوړې کړي، په نړيواله صحنه کې د افريقا د لا مهم رول له لوبولو څخه ملاتړ وکړي، په ګډه رښتيني څو اړخیزم پلی کړي او د نړيوال مديريت د لا معقوله او عادلانه سيستم د ابادۍ لپاره ګډې هڅې وکړي.
یوسف چين د افريقا د باور وړ همکار بولي او ویلي يې دي، د چین د بهرنيو چارو وزيرانو په تېرو مسلسلو ۳۶ کلونو کې د هر نوي کال په سفرونو کې افريقا انتخاب کړې او دا جوت کوي چې چين افریقا د ستراتيژۍ له پلوه افريقا ته په درنه سترګه ګوري. د افريقا او چين ترمنځ دوستي د متقابل درناوي او د سوله ييز پرمختګ د ګډې هيلې پر بنسټ ده او د نړۍ د سراسري جنوب هېوادونو ترمنځ د همکاريو نمونه يې جوړه کړې ده. افريقايي ټولنه له چين څخه مننه کوي چې له اوږدې مودې راهيسې يې په بېلا بېلو برخو کې له افريقايي هېوادونو سره په يوه لوري ګامونه پورته کړي، د دې وچې له پرمختګ څخه بې غرضه ملاتړ يې کړی دی. د ده په خبره افريقا د دې ستاينه کړې چې د چین او افريقا د همکارۍ فورم ډېرې لاسته راوړنې درلودلې او خلکو ته يې رښتينې ګټې رسولې دي. هغه زياته کړې چې افريقايي ټولنه د يوه چين پېژندنې د اصل مراعت کوي، د تايوان مسئلې په هکله د چين له کليدي ګټو څخه ملاتړ کوي او د چین د بېلتونپالنې له هر ډول کړنو سره مخالفت کوي. دغه ټولنه غواړي چې د یاد فورم په شمول د اړوندو ميکانيزمونو له لارې له چین سره همکارۍ لا پياوړې کړي، څو خلک ترې ګټې واخلي.