چين د ۲۰۲۶م کال د جنورۍ له لومړۍ نېټې څخه پر ۹۳۵ ډوله وارداتي توکو تعرفې ټيټې کړې دي. د شنونکو په اند، د چين دغه ګام په پيچلي نړيوال چاپېريال کې د ورخلاصون د پراخولو او باکیفته پرمختيا ته د دغه هېواد د ژمنتيا ښکارندوي کوي.
چين په داسې حال کې تعرفې کمې کړي، چې نړۍ کې د ځاني سوداګرۍ د حمايت غوښتنې څپې پورته شوي او هم نړيوال اکمالاتي ځنځير د بيا جوړېدو په حال کې دی او دغه هېواد د خپلې دروازې د لا خلاصولو ژمنه پوره کړې ده.
د يادو ۹۳۵ ډوله تجارتي توکو په لېست کې د توليدي سکتور څخه د ژوند تر تضمين پورې د بېلا بېلو برخو محصولات شامل دي او د چين دغه ګام دا پيغام ورکوي، چې دغه هېواد د خپل بازار د ورخلاصون له لارې نړيوالو همکاريو ته وده ورکوي.
په دغه لېست کې د عصري تجهیزاتو کليدي پرزې او عصري مواد شامل دي، چې پرې د تعرفو کموالی به د حقيقي اقتصاد د تصديو د تخنيکي نوښت لګښت کم کړي.
په ياد لېست کې د زرغون پرمختګ لپاره ځينې محصولات هم شامل دي، چې په همدې برخې کې د چين د هڅو ښکارندويي کوي. د بېلګې په توګه، چين پر هغو تورو پوډرو، چې د لیتیم ایون بېټریو لپاره کارول کېږي، وارداتي تعرفې ډېرې کمې کړې دي.
د يادونې ده، په دغه لېست کې طبي محصولات هم شامل دي، چې له مخې يې د مصنوعي رګونو، د ساري ناروغيو د ټېسټ کیټونو او پر يو شمېر هغو طبي توليداتو وارداتي تعرفې کمې شوي، چې د ناروغانو د اقتصادي بارونو په کمولو کې مرسته کوي. دغه مفصيل اقدامات د چين د هغې فکورې ښکارندويي کوي، چې وايي، پرمختګ باید د خلک پر محور ترسره شي.
د تعرفې پر ټيټوالي سربېره، چين له خپلو ۳۴ سوداګريزو همکارانو سره د ازادې سوداګرۍ ۲۴ تړونونه هم لاسليک کړي، ۴۳ ډېرو لږو پرمختللو هېوادونو ته يې د صفر تعرفې امتياز ورکړی او د اسيا او ارام سمندر سيمې د سوداګرۍ تړون کې شامل شوی دی.
د چين دغه سوداګریزې تګلارې په نړيوالې اقتصادي او سوداګريزې حکومتوالۍ کې د دغه هېواد د ښکېلېدو ښکارندويي کوي. چين نه يوازې پرمختللو اقتصادونو ته د تعرفو متقابل امتيازونه ترتیب کړي، بلکې مخ پر ودې هېوادونو ته يې هم د تعرفې امتيازونه ورکړي او د نړيوالې ګډې ودې لپاره يې پوره خدمتونه کړي دي.
چين په داسې حال کې، چې د نړيوال اقتصاد بيا سمسورتيا کمزورې شوې او د پروټېکشنيزم څپه پورته شوې، د ورخلاصون اقداماتو ته بيا دوام ورکړی او پدې سره يې څو اړخيز سوداګريز سیسټم ته خوځنده ځواک ورکړی دی. د چين دغه ګام نه يوازې چيني مشتريانو او تصديو ته ګټې رسوي، بلکې د نړيوال اکمالاتي ځنځير د ثبات او هم د موثريت په لوړولو کې ډېره مرسته کوي.