په دې وروستیو کې د امریکا او طالبانو ترمنځ د ملګرتیا یو شمېر راپورونه ورکړل شوي دي او طالبانو امریکا ته له داعش ډلې سره د مبارزې ډاډ ورکړی دی. په همدې حال کې انټیل نیوز راپور ورکړی دی چې د امریکا متحده ایالات هغه وسلې چې تر دې مخکې یې د طالبانو پر ضد کارولې اوس یې د طالبانو په ملاتړ د داعش ډلې پر وړاندې کاروي. په راپور کې دا نه ده روښانه شوې چې دا وسلې طالبانو ته ورکړل شوې دي او که څنګه. راپور کاږي، له طالبانو سره د امریکا د نوې ملګرتیا خبره تازه نه ده ځکه چې د روان کال په مارچ میاشت کې د امریکا د مرکزي قومندانۍ قومندان جنرال فرانک مککېنزي د امریکا کانګرس ته د معلوماتو ورکولو پر مهال اعتراف کړی و چې طالبانو د دوی څه ناڅه ملاتړ ترلاسه کړی دی خو په دې اړه یې نور جزیات نه وو ورکړي. راپور کې د نظامي چارو د یو مخکښ خبریال وسلي مورګان له قوله ویل شوي، مککېنزي په ختیځ کې خپلو پوځیانو ته سپارښتنه کړې وه چې باید له داعش ډلې سره جګړه کې د طالبانو هوایي ملاتړ وکړي. مورګان ویلي، په ختیځ کې د امریکایي اډې یو پوځي چارواکي ورته دا مسئله تایید کړې او په خندا یې ویلي، ځینې ملګري یې هغه ټیم چې د طالبانو لپاره هوایي ملاتړ برابروي د طالبانو د هوایي ځواک په نامه یادوي. د راپور په پای کې راغلي، تر اوسه معلومه نه ده چې افغان حکومت له دې مسئلې خبر دی او کنه.
