د امریکا نوي ولسمشر جو بایډن یوځل بیا ویلي چې د امریکا اوږده جنګونه به ختموي، له افغانستان څخه به خپل ځواکونه وباسي او هلته به یوازې یوه وړه ډله له ترهګرۍ سره د جګړې لپاره پرېږدي. تر دې وړاندې هم بایډن همداسې څرګندونې کړې وې او له افغانستان څخه یې د خپلو ځواکونو پر ایستلو ټینګار کړی و.
لا هم له خلکو سره دا پوښتنې شته چې بایډن به د افغانستان له جګړې او سولې سره څه کوي؟ له طالبانو سره شوې هوکړه به عملي کوي، که بدلون به پکې راولي او یا به یې هم یو مخ لغوه کوي؟
د افغانستان په تړاو د جو بایډن تګلاره د ټرمپ تګلارې ته ورته ده. هغه غواړي د افغانستان جګړه ختمه کړي او آن کله چې نوموړی د اوباما مرستیال و، په سپینه ماڼۍ کې یې اوباما ته ویلي وو چې هغه حاضر نه دی چې خپل زوی د افغانستان جګړې ته ولېږي. بایډن ته د افغانستان جګړه اوږده، ستړې کوونکې او بې ځایه جګړه ښکاري چې امریکایانو ته مالي او ځاني زیان اړوي، نو ځکه باید ختمه شي. له همدې امله یوازینۍ کړنه چې بایډن به پرې له ټرمپ څخه خوشاله وي او ترې مننه به وکړي، هغه له افغانستان څخه د ټولو امریکايي ځواکونو وتلو ته لاره هوارول او په دې برخه کې شوي پرمختګونه دي.
دا چې بایډن وايي چې یوه ډله سرتیري به په افغانستان کې پرېږدي چې له ترهګرۍ سره جګړه وکړي، ځینې کسان فکر کوي چې ښايي دا چاره طالبان د هوکړې نقض وګڼي او په دې سره به د امریکا او طالبانو هوکړه له منځه ولاړه شي. دوی تېروتنه کوي، ځکه چې د امریکا او طالبانو هوکړې امریکا ته زیاته ګټه رسولې ده. د امریکايي ځواکونو مرګ ژوبله ختمه شوې، لګښتونه یې میلیاردونه ډالره راکم شوي، له افغانستان څخه اوس ورته کوم ګواښ نشته او په دې اړه ډاډ هم ورکړل شوی دی. دا همغه څه دي چې بایډن یې غواړي. اوس چې بایډن د یو ډلې پوځیانو د پرېښودلو خبره کوي، ښايي دا د ممکنه ګواښ د مخنیوي لپاره وي، خو که بایډن پوه شي چې دا ګواښ نشته او طالبان په دې اړه ډاډه او آن تضمین ورکړي، نو بیا به له دې چارې هم تېر شي او د هوکړې عملي کولو او د ځواکونو ایستلو ته به همداسې دوام ورکړي. بایډن به د افغانستان په تړاو د ټرمپ تګلاره تعقیب کړي، ځکه چې له یوه اړخه په دې تګلاره او له طالبانو سره په هوکړه کې د امریکا د مهمو بنسټونو نظر و او له بله اړخه دا هوکړه د امریکا ګټې خوندي کوي.
پر دې بنسټ بایډن د افغانستان په تړاو د ټرمپ تګلاره تعقیبوي. البته په دې تګلاره کې به ځینې واړه او شکلي بدلونونه راشي، خو لوی مسایل به یې پر ځای وي. بایډن د افغانستان جګړه د امریکا لپاره ختموي، خپل ځواکونه وباسي او په افغانستان کې د امریکا لګښتونه تر ممکنې کچې را ټیټوي. نو هغوی چې فکر کوي افغانستان به بېرته له امریکا سره د پخوا په شان اړیکې ولري، همغسې مرستې به وي او جګړه به دوام کوي، تېروتي دي. هغوی ته پکار ده چې له دې خیاله را ووځي، واقعیتونه درک کړي او د سولې لپاره کار او هڅې وکړي.