امريکا په دې وروستيو کې د نېشه يي توکو د مخنيوي په پلمه په ونيزويلا کې پوځي عمليات کړي او د دغه هېواد ولسمشر نیکولاس مادورو او د ده مېرمن يې نيولي. نړيوالې ټولنې د امريکا د دغې کړنې غندنه کړې او د غندنې په اوازونو کې د افريقا غږ جدي او تېز دی. د افريقايي ټولنې او د لوېديځې افريقا د هېوادونو اقتصادي ټولنې په شمول افريقايي سازمانونو سمدستي خپل دريځ څرګند کړی، د جنوبي افريقا په شمول څه باندې لسو افريقايي هېوادونو د امريکا له دغې کړنې سره د مخالفت اعلاميې خپرې کړې او مختلفو اکاډميو د امريکا د زورواکې کړنې غندنه کړې ده. افريقا نه يوازې د امريکا له پوځي عملياتو سره مخالفت ښودلی، بلکې د نړيوالو قوانينو، تاريخي حافظې او راتلونکي امنيت د ساتنې لپاره يې د ګډې مبارزې دريځ په ډاګه کړی دی.
پر نړيوالو قوانينو ټينګار کول د افريقا د همدغه غبرګون لومړی لامل دی.
د ملګرو ملتونو په منشور کې ټاکل شوي، چې له ملي دفاع او يا د ملګرو ملتونو له امنیت شورا څخه د صلاحيت د تر لاسه کولو پرته، هېڅ هېواد له زور نه په استفادې د نورو هېوادونو پر ملي حاکميت او ځمکنۍ بشپړتيا تېری نه شي کولی.
پر ونيزويلا د امريکا پوځي عمليات، چې له قوانینو سره سمون نه لري او د نشه يي توکو د مخنيوي په پلمه يې په مستقيمه توګه د دغه هېواد برحال ولسمشر نيولی، له نړيوالو قوانينو څخه څرګنده سرغړونه ده.
د جنوبي افريقا ولسمشر ماتاميلا سيريل رامافوسا ويلي، چې د امريکا دغه کړنې د ملګرو ملتونو د غړي هېواد ځمکنۍ بشپړتيا او ملي حاکميت ته زيانونه رسولي دي. د ګانا حکومت د امريکا دغه کړنه ” د نړيوال نظام د ويجاړولو لپاره خطرناک ساری “ بللی. افريقايي هېوادونه په دې نظر دي، چې نړيوال قوانين د زور او بادارۍ غوښتنې پر وړاندې د لږ پرمختللو هېوادونو د دفاع وروستۍ کرښه ده، که امريکا په خپله خوښه د ونيزويلا ملي حاکميت پايمالولی شي، افريقايي هېوادونه ښايي په راتلونکي کې هم د دغه بادارۍ قرباني شي.
د استعمار د زيانمن شويو په توګه تاريخي حافظه د افريقا د غوسې او کرکې سرچينه ده.
د امريکا ولسمشر ډونالډ ټرمپ له پوځي عملياتو وروسته اعلان کړی، چې هېواد به يې د ونيزويلا د چارو اداره پر غاړه واخلي او د دغه هېواد د نفتو صادرات به کنټرول کړي. د ټرمپ دغه خبرې په افريقا کې د عامه افکارو څپه راپارولې. افريقايانو د ټرمپ څرګندونې د استعمارګرو نمونه يي بڼه بللې او له دې لارې يې هغه زمانه بيا ياده کړې، چې د امپرياليستي هېوادونو په زور د نورو هېوادونو سرچينې چور او تالان کړې دي.
افريقايي وچه په تېرې يوې اوږدې موده کې په استعماري ظلم ځپلې شوې وه. پر ونيزويلا د امريکا د پوځي مداخلي موخه په زور د بل هېواد د حکومت ړنګول او د دغه هېواد د طبيعي سرچينو کنټرول دي او اصلي بڼه له تاريخي استعماري تالان سره ورته ده.
پر امريکا د افريقا غندنه نه يوازې د ونيزويلا د ملاتړ غږ دی، بلکې په نوې بڼه د استعمار د بېرته رامنځته کېدو د مخنيوي هڅه هم ده. تاريخي ټپي افريقايي هېوادونه دې ته متوجه کوي، چې که زور غوښتنه موخې ته ورسېږي، لږ پرمختللي هېوادونه به هېڅ د ژوند خوندي فضا ونه لري.
خپلې ګټې پر امريکا د افريقا د نيوکې لامل هم دی.
پر ونيزويلا د امريکا د پوځي مداخلې رښتينې موخه له نفتو سره نژدې تړاو لري. ټرمپ په اړونده خبري ناسته کې ۲۶ ځله ((نفت)) ياد کړی دی. افريقايي هېوادونه اندېښنه لري، چې د امنيت او د نشه يي توکو د مخنيوي په پلمه مداخله د سرچينو د کنټرول نوی ماډل ګرځي.
د افريقايي هېوادونو دغه ډله ييز غږونه نه يوازې د امريکا د ناوړو پوځي کړنو غندنه ده، بلکې پر نړيوالو قوانينو او بشري عدالت د ټینګار کولو څرګندونه کوي. دغه ډول مخالف غږونه د زور غوښتونکي سیاست د پورته کولو پر وړاندې ډېر ارزښتناک دي. دا نړۍ ته پيغام ورکوي، چې د رښتينې سولې ترلاسه کول د هر هېواد ملي حاکميت ته د برابر درناوي پر ورکولو تکيه کوي، نه دا چې کومې خوا لا پياوړی زور لري. د دغې هيلې پوره کول د نړيوالې ټولنې په تېره بيا د سراسري جنوب هېوادونو ګډو هڅو ته اړتيا لري.