د نړیوال اقتصادي فورم کلنۍ غونډه د جنوري له ۱۹مې نېټې څخه تر ۲۳مې نېټې پورې د سویس په داوس کې تر سره شوه او د چين اقتصاد په دې غوندې کې د پاملرنې وړ ګرځېدلی دی. کورنيو او بهرنيو شخصيتونو رسنيو ته د چين باکيفيته پرمختګ د نړۍ د صنعتي پرمختګ، تخنيکي همکاريو او له اقليمي بدلون سره د مقابلې لپاره ښه زيری بللی دی.
د مصنوعي ځيرکتيا د نړيوالې ټولنې رئيس دای ژوي ويلي چې په اوسني پېچلي نړيوال چاپيريال کې چين د بشپړ صنعتي سيستم، ثابتو تګلارو او پراخو بازاري اړتياوو په لرلو سره نړيوال اقتصادي پرمختګ ته ثابت عوامل برابر کړي دي.
د نوښت په اتکا پرمختګ د چين اقتصاد ته حياتي ځواک ورکوي. د ښاغلي دای ژوي په اند چين نه يوازې پر تخنيکي پرمختګ تمرکز کوي، بلکې په توليدي او ټولنيزو چارو کې د تخنيکونو کارونې سيستم د جوړولو لپاره يې هم ډېرې هڅې کړې او کوي يې. په بېلا بېلو برخو کې د تکنالوژۍ کارونه او غني انساني سرچينې د چين د بازار ځانګړتيا ده.
د جنوبي افريقا د دولتي برېښنايي شرکت عمومي مدير ماتيو نيټو چين د باور وړ ملګری او همکار بللی او هېله يې ښودلې چې د تخنيکي همکارۍ او توليدي وړتيا د لا پياوړتيا په شمول ځينو برخو کې له چين سره همکارۍ لا ژورې کړي. د ده په خپره همدا به د افريقا د دواملرونکي صنعتي کېدو د تر سره کولو لپاره ګټوره وي. هغه زياته کړې چې نړيواله ټولنه د چين د صنعتي جوړښت غوره والي او له دې امله د نوي ډول نړيوال ارزښت د ځنځير اغيزې څاري.
په دې فورم کې له اقليمي بدلون سره د مقابلې لپاره د چين اقدامات او خدمتونه هم د پاملرنې وړ دي. د هند د اکشې پاترا صندوق مسؤل ټاګاس په دې اړه ويلي چې چين د زرغون پرمختګ په تېره بيا د دواملرونکې انرژۍ د کارونې او د توليدي چارو د غوره والي په برخو کې د ليدو وړ لاسته راوړنې درلودلې او د نورو هېوادونو لپاره يې نمونه جوړه کړې ده.
هغه هم هېله ښودلې چې چين د ځيرکې برېښنايي شبکې او په لويې پيمانې سره د انرژۍ د زيرمې په برخو کې له نورو هېوادونو سره بريالۍ تجربې شريکې کړي په تېره بیا د کمربند او لارې په اوږدو کې له پرتو هېوادونو سره د همکاريو له لارې له نورو هېوادونو سره دغه تجربې شريکولی شي چې دا به د نړۍ پر زرغون پرمختګ ژوره اغيزه وکړي. د ده په اند چین د بادي برېښنا د توليد په برخو کې خپل صنعتي غوره والی لري، په پر له پسې توګه يې د برېښنا توليدي لګښت کم کړی او د رېښتنو ګټو د اخيستلو له لارې يې د پاکو انرژيو د کارونې په هکله د نړيوالې ټولنې اندېښنې ته ځواب ورکړی چې د نړيوالو انرژیو د جوړښت د بدلولو لپاره يې يوه عملي کېدونکې لايحه برابره کړې ده.
د چين د اقتصادي پرمختګ او د خلکو د ژوند د سويې په لوړوالي سره د اوسېدونکو مصرفي جوړښت هم بدل شوی دی. د اسرائيل د روغتيايي ساينس او تخنيک بنسټ ايښودونکي ميان ميټيزل ويلي: چين د بازار ستر بالقوه ځواک لري په تېره بيا د روغتيا په برخه کې. مونږ د چين د بازار پر پرانيستي راتلونکې باور لرو او هم ور سره د همکاريزو فرصتونو په لټه يو.
زياتره کارپوهان په دې اند دي، په يوه داسې نړۍ کې چې يو پر بل تکيه کوي، د اقتصادي جوړښت د بدلولو په بهير کې د چين له خوا پيدا کړې تجربې له ګډو ننګونو سره د مقابلې او د ټولشمول پرمختګ د پرمخبېولو په برخه کې مختلفو هېوادونو ته ښکاره ارزښتمند بصیرتونه او همکاريز فرصتونه برابر کړي دي.