د واشنګټن دغه شعار “امریکا بیا قوي کړئ!” نړۍ ته د پخوا په پرتله ډېر غیر متوقع او نا ارام انځور وړاندې کړی دی. نړۍ اوس د امريکا په اړه ښه نظر نه لري او ورځ تر بلې ترې واټن اخلي.
د سي جي ټي اېن د يوې سروې پایله ښيي، چې د نړۍ د ګڼو هېوادونو خلک اوس امريکې ته د “غیر مسؤلانه لوی هېواد” او “د نړۍ د بې ثباتۍ تر ټولو لویه سرچینه” په نظر ګوري او دا نظر نور هم د خورېدو په حال کې دی.
د سي جي ټي اېن په دغې سروې کې د نړۍ له ۳۸ هېوادونو څخه کابو ۱۵۶۸۸ کسانو برخه اخيستې ده.
د امریکا د پیو څېړنیز مرکز د ۲۰۲۵م کال په سروې کې هم ياد نظر، چې په ۲۴ هېوادونو کې شاوخوا ۲۸ زرو خلکو ورکړی، منعکس شوی دی.
د سروې پایله ښيي، د نړۍ په ۱۵ هېوادونو کې د امریکا محبوبیت د تېر کال په پرتله ډېر کم شوی دی.
د سویډن ۷۹ سلنه وګړي اوس د امریکا په اړه منفي نظرونه لري او د جرمنيانو مثبت نظر له ۴۹ څخه ۳۳ سلنې ته راټیټ شوی دی او هم يې په مکسیکو کې د ملاتړ کچه ۳۲ سلنه ټيټه شوې ده.
د امریکا تسلط د دغه هېواد د محبوبیت د سقوط یو عمده لامل بلل کېږي.
امریکا په نړیوالو چارو کې پر ځواک کارونې ټينګار لري او همدا حقیقت بولي او ډیپلوماتیکې وسیلې يې يوازې بندیزونه، تعرفې او نظامي ګواښونه دي.
واشنګټن د “ملي امنیت” او “ډیموکراسۍ” په پلمو د لاتیني امریکا پر وینزویلا او د منځني ختيځ پر ایران سخت فشارونه اچولي او په ورته وخت کې يې د ډنمارک د ګرينلنډ ټاپو د نيولو يا خپلولو هيله ښودلې ده.
دغه کړنې د امريکا د تسلطې رویې ښکارندويي کوي.
امریکا په دې وروستیو کې له څو نړیوالو سازمانونو څخه ووتله او د یو نامسؤلانه هېواد بڼه یې ښکاره کړه.
کله چې ډونالډ ټرمپ د ۲۰۲۵م کال په جنورۍ کې سپينې ماڼۍ ته بیا ستون شو، نو ډېر ژر یې دغه هېواد د یونیسکو، د بشري چارو شورا، روغتیا نړیوال سازمان او پاریس تړون په شمول څو نړیوالو سازمانونو څخه وباسه.
امريکا څو ورځې مخکې اعلان وکړ، چې د ملګرو ملتونو له ۳۱ سازمانونو او ۳۵ نورو نړیوالو سازمانونو څخه به هم ووځي. د دغو سازمانونو چارې په اقلیم، کارګرو او کډوالو پسې تړاو لري.
له روغتیا نړیوال سازمان څخه تر وتلو وروسته امريکا دغه سازمان ته نه یوازې د نوي غړي په توګه خپل فیس نه دی ورکړی، بلکې پر نورو لویو پورونو یې هم سترګې پټې کړې دي.
روغتیا نړیوال سازمان رسنيو ته ويلي، چې امریکا دغه سازمان ته د ۲۰۲۴م او ۲۰۲۵م کالونو پیسونه، چې ټولټال شاوخوا ۲۶۰ میلیونه ډالره کېږي، هم نه دي ورکړي.
بلومبرګ د ۲۰۲۵م کال په سپتمبر کې راپور ورکړی و، چې امریکا د ملګرو ملتونو شاوخوا ۳ ميلیارډه ډالره پوروړې ده.
اوس نړۍ ته دا حقیقت روښانه شوی، چې ډونالډ ټرمپ د خپلو ګټو لپاره، د ملګرو او همکارو هېوادونو ګټې هم په اوبو لاهو کوي. همدا څو ورځې مخکې يې د افغانستان په جګړه کې د ناټو د متحدینو ونډې رد کړې او تور يې پرې ولګاوه، چې دوی په افغانستان کې د جنګ لومړۍ کرښه کې نه وو.
د نوموړي دغې څرګندونې د برېتانیا، ډنمارک او اسټرالیا په شمول د ناټو د ګڼو هېوادونو ناخوښي راوپاروله او د دغه سازمان دننه یې نور توپیرونه هم راپورته کړل.