د چين او جرمني صدراعظمانو د فبرورۍ د ۲۵مې نېټې په ماسپښين د بېجينګ د خلکو لوی تالار کې د دواړو هېوادونو د اقتصادي مشورتي کمېټې په ناسته کې ګډون او ويناوې کړې دي. په دغه ناسته کې د چين او جرمني د تصديو شاوخوا ۶۰ استازو هم ګډون کړی و.
د چين صدراعظم لي چيانګ يادې ناستې ته په وينا کې ويلي، نړيوال اقتصاد لا هم له لویو ننګونو سره مخ دی، په ځينو هېوادونو او سيمو کې د يو اړخيزم او محافظت پالنې څپې مخ په پورته کېدو دي او حتی ډېرې غوړېدلې هم دي، چې له امله یې نړيوال اقتصاد او سوداګريز سیسټم ته سخت زيانونه رسيدلي دي.
لي چيانګ د هېوادونو ترمنځ همکارۍ د خطرونو د لرې کولو لپاره تر ټولو غوره حللاره او پرمختګ د امنيت د تامين لپاره يوازينی عملي انتخاب ياد کړی دی او د چين او جرمني د همکاريو په اړه يې درې وړانديزونه کړې دي.
لومړی، چين او جرمني دې موجودې همکارۍ پراخې او پياوړې کړي. دويم، دواړه هېوادونه دې د راتلونکي پرمختګ فرصتونه ونيسي او ګټې ترې پورته کړي. درېیم، دواړه خواوې دې د پانګونې او سوداګرۍ لپاره مناسب چاپېريال رامنځته کړي.
د جرمني صدراعظم فریدریش میرز يادې ناستې ته په وينا کې جرمني او چین مهم اقتصادي او سوداګریز شریکان یاد کړي او ويلي يې دي، چې د دواړو هېوادونو اړيکو له ډېرو کلونو راهیسې په لوړې کچې وده موندلې او خپل اقتصادونه یې پياوړي کړي دي.
نوموړي ويلي، جرمني به له چین څخه زده کړه وکړي، د موټرو، کیمیاوي موادو، ماشینونو او تجهیزاتو، نوي کیدونکې انرژۍ او ډیجیټل اقتصاد په برخو کې به ورسره دوه اړخیزې ګټورې همکارۍ پیاوړې او ګډه سمسورتيا به ومومي او خپلمنځي اړيکو ته به یې دايمي او ثابت پرمختګ ورکړي.