د چین له پسرلني اختر څخه لږ وروسته، د جرمني د فدرالي جمهوریت صدراعظم فریدریش میرز د فبرورۍ په ۲۵مې نېټې چین ته په رسمي سفر راغلی دی. په حقیقت کې، د فرانسې، بریتانیا او نورو هېوادونو مشرانو له پسرلني اختر څخه دمخه چین ته سفر کړی و. نو ولې د میرز سفر په ځانګړي ډول د پام وړ دی؟ یو مهم دلیل دا دی چې جرمني د اروپا د اقتصاد سرخېل ګڼل کېږي او هر عمل يې پر ټولې اروپا اغیزه کوي. بل دلیل دا دی چې میرز د چین ضد سخت دریځ سره پېژندل کېږي. خو د روان سفر په ترڅ کې د میرز رویه بدل شوې ده. چین ته د رسېدو دمخه، هغه په ځانګړي ډول له چیني کارپوهانو څخه مشوره وغوښته، د پسرلني اختر په وخت کې هغه چینایانو ته مبارکي وویله او د دې سفر لپاره هغه د جرمني د ۳۰ مخکښو تصدیو مشرانو په ګډون یو لوړ پوړی پلاوی له ځان سره راوست.
د جرمني صدراعظم فریدریش میرز وویل: ((موږ باید له چین سره خپلې اړیکې نورې هم پیاوړې کړو، په هر حالت کې زه هوډمن یم))، له چین څخه د وتلو دمخه میرز د خپل سفر ارزونه وکړه چې چین ته دا سفر ډېر ارزښتناک دی. کومو دلایلو هغه دې ته هڅولی چې دومره مهم بدلونونه راولي او د میرز سفر به د چین او جرمني او د چین او اروپا په راتلونکو اړیکو څه اغیزه ولري؟
چین ته د میرز سفر یوازې ۳۰ ساعته دوام وکړ. هغه په وار سره له بېجینګ او هانګ جو ۲ ښارونو څخه لیدنه وکړه. هغه له امپراتورۍ ماڼۍ څخه د لیدنې په وخت کې د میلمنو په کتاب کې لیکلي: هيله ده چې مونږ په اس کال کې مخکښ او د ښامار او اس په څېر فعال او پياوړي واوسو. هيله ده روان کال د جرمني او چین د همکاريو او پرمختګ کال وګرځي.))
میرز د چین له تصدیو څخه د لیدنې په وخت کې د چین او جرمني د تصدیو لخوا په ګډه جوړ شوی د موټر چلوونکي مرستندویه سیسټم له نږدې ليدلی دی. هغه وویل، دا د جرمني د موټرو جوړونکو او د چین د ټېکنالوژۍ ترمنځ همکاري ده. دا حیرانونکې ده.
د رسنیو په اند، د دې سفر په ترڅ کې د میرز رويه بدله شوې. د بېلګې په توګه، هغه د چین او جرمني د شرکتونو د همکارۍ ډېره ستاینه وکړه چې د هغه له پخوانیو چلندونو سره په بشپړ ډول توپیر لري. د تیر کال په پیل کې، میرز لا هم د جرمني د صدراعظم لپاره نوماند و، هغه د جرمني اقتصادي استازو ته وویل چې په چین کې پانګونه له سترو خطرونو سره تړلې پرېکړه وه. د روان سفر په ترڅ کې، ډیری دا هم پوښتنه کوي چې ولې د چین په وړاندې د میرز چلند دومره د پام وړ بدل شوی؟
د میرز د دې سفر لپاره، د مرسډیز بینز او BMW په ګډون د جرمني د لویو موټرو جوړونکو شرکتونو مشران ټول چین ته راغلل. په حقیقت کې، په دې وروستیو کلونو کې په چین کې د جرمني موټرو خرڅلاو ښه نه دی شوی. ځکه چې چین نه یوازې د نړۍ ترټولو لوی موټر بازار دی، بلکې په نړیواله کچه د موټرو ټېکنالوژۍ ترټولو ګړندی پرمختګ سره ځای هم دی. نو دا ځل د دوی لومړني اندیښنې څه دي؟
د جرمني د شرکتونو مشرانو کوم انتخابونه کړي دي؟ دا په چین کې د دوی د پانګونې معلوماتو څخه لیدل کېدای شي. په چین کې د جرمني د سوداګرۍ ټولنې لخوا د یوې سروې له مخې چې درې میاشتې دمخه ترسره شوې وه، د ۹۳ سلنې ځواب ویونکو جرمني شرکتونو په راتلونکو ۲ کلونو کې له چیني بازار څخه د وتلو هېڅ اراده نه لري او له نیمایي څخه ډېر پلان لري چې په چین کې به خپلې پانګونې ته دوام ورکړي.