چين په کوردننه ټېکنالوژیکي او صنعتي پرمختګ چټک کړی او د مصنوعي ځیرکتیا او کوانټم ټېکنالوژۍ په شمول ګڼ شمېر نوې ټېکنالوژۍ، نوي صنعتونه او نوي سوداګریز ماډلونه يې رامنځته کړي دي.
د چین د پرمختګ لوړپوړی فورم د ۲۰۲۶م کال دوه ورځنۍ غونډه د مارچ په ۲۳مې نېټې په پلازمېنې بیجینګ کې پای ته ورسېده.
په دغه غونډه کې”راتلونکي صنعتونه” د چیني او بهرنیو مېلمنو ترمنځ د بحث ګرمه موضوع وه، چې ډېرو يې په اړه نظرونه ورکړي دي.
د علي بابا ګروپ مشر جوسف تسای رسنيو ته ويلي، چې په مختلفو برخو کې په پراخه کچه د ځېرکې ټکنالوژۍ يا اې ايي (AI) کارول به د بازار لوی فرصتونه رامنځته کړي او دوامدار نوښتونه به د ټولو لپاره مناسبې لارې برابرې کړي.
د شیاو مي شرکت مشر لي جون رسنيو ته ويلي، چې شرکت يې په تېرو ۵ کلونو کې د ډيزاین او څېړنې په برخه کې شاوخوا ۱۰۰ ميلیارډه یوانه پانګونه کړې او اوس پلان لري چې په راتلونکو ۵ کلونو کې له ۲۰۰ ميلیارډو یوانو څخه ډېره پانګونه وکړي.
نوموړي ويلي، شرکت به یې د چین د ۱۵م پنځه کلن پلان په موده کې په اصلي ټېکنالوژیو کې پانګونه وکړي او د راتلونکو صنعتونو د سمسورتیا لپاره به خدمتونه وکړي.
د لي جون په نظر، د راتلونکي صنعتي ایکوسیسټم جوړونه له نړیوالو سرچینو ګټې اخیستنې او په نړیواله کچه د خلاصون او پایلو شریکولو ته اړتیا لري.
ټېکنالوژیک پرمختګ یوه نړیواله او اوسنۍ ګرمه مسئله ده.
په يادې غونډې کې “پرانيستې همکاري” هم د چیني او بهرنیو مېلمنو په خبرو کې په مکرر ډول یاده شوې ده.
د چین د صنعت او معلوماتي ټېکنالوژۍ وزیر لي له چنګ رسنيو ته ويلي، چې چین د نړۍ له بېلا بېلو هېوادونو سره د ټېکنالوژیک نوښت لاسته راوړنې شریکوي، د راتلونکو چارو پرمختګ ته وده ورکوي او ټول انسانیت ته د ګټو رسولو لپاره کار کوي.
د ویکر کیمي اې جي (AG) شرکت مشر هه دا د راتلونکو چارو پرمختګ په تړلو دروازو پسې نه، بلکې په همکاريو پسې تړلی بللی دی.
نوموړي ويلي اوسني بریالي نوښتونه د شرکتونو او هېوادونو ترمنځ د متقابلو همکاريو په رڼا کې رامنځته شوي دي.
د چین د ټي سي اېل (TCL) شرکت مشر لي دونګ شنګ رسنيو ته ويلي، چې چين به نړۍ ته دروازه نوره هم پرانيزي، څو شرکتونه يې په نړیوال بازار کې لازیات فرصتونه ومومي.