د ولسي جرګې او حکومت ترمنځ د نوو کشمکشونو په دوام، تازه وکیلانو ویلي چې حکومتي چارواکي دې د بې ګټو موضوعاتو پر ځای پر سوله او د سولې پر روانه پروسه تمرکز وکړي. د ولسي جرګې غړو د تېرې ورځې په امتیازي ساعت کې د حکومت له لوري پر وکیلانو د وروستیو تورونو په اړه خبرې وکړې. دوی د ولسمشر د لومړي مرستیال امرالله صالح څرګندونې وغندلې او تېره ورځ یې هم خپل اعتراض ته ادامه ورکړ. بلخوا د ملي امنیت شورا او ولسمشر غني له ولسي جرګې سره د ښو اړیکو پر لرلو ټینګار کړی دی.
د جینوا په کنفرانس کې د ولسمشر لومړي مرستیال امرالله صالح پر وکیلانو تور پورې کړ چې دوی په فساد کې ښکېل دي. له همدې ورځې د حکومت او ولسي جرګې ترمنځ ناندرۍ لا ډېرې شوې. وکیلان وایي چې د ولسمشر لومړي مرستیال د ملت کور ته سپکاوی کړی او په دې توګه یې د خلکو د ارادې د تمثیل دا برخه بې باوره کړې ده. دوی زیاتوي، د ولسمشر لومړی مرستیال دې د هغو وکیلانو په اړه اسناد وړاندې کړي چې دوی په فساد کې ښکېل دي او له دې پرته دې پر ټولو وکیلانو د فساد تور نه پورې کوي.
د ولسي جرګې غړو له همغې ورځې راهیسې د حکومت نوماند وزیران د پروګرامونو له وړاندې کولو منع کړي او همدا راز یې ټینګار کړی، تر هغه چې د ولسمشر لومړی مرستیال دا ستونزه حل نه کړي، دوی به نوماند وزیرانو ته د باور رایه ور نه کړي. د ولسمشر لومړي مرستیال بیا د وکیلانو د دغو څرګندونو په ځواب کې ویلي وو، چې ولسي جرګې ته درناوی لري، خو وکیلان هم ملایکې نه دي او باید د فساد تورونه یې وڅېړل شي.
د ولسي جرګې غړو په پرونۍ غونډه کې همدا راز د سولې په اړه هم څرګندونې لرلې. دوی وویل، په حکومت کې په دې وروستیو کې داسې هڅې پيل شوې چې په یو ډول د سولې روان بهیر تر سیوري لاندې راولي او د خلکو پام له دې مهم هدف بلې خوا ته کړي. د ولسي جرګې غړو پر حکومت غږ وکړ چې له سولې سره مخالفت او د سولې په برخه کې د خنډونو له جوړولو ډډه وکړي. د وکیلانو په خبره، د ولسمشر غني او لومړي مرستیال امرالله صالح په ګډون هېڅوک د سولې مخالفت نه شي کولی او نه هم د خلکو د ارادې پر وړاندې درېدلی شي. په ولسي جرګه کې د هرات د خلکو استازي منور شاه بهادري وویل، که حکومتي چارواکي د ولس د ارادې او تمې خلاف کار کوي، نو دوی په حقیقت کې یو ملت برمته کوي. د ده په خبره: ((د ولسمشر غني او لومړي مرستیال امرالله صالح په ګډون، هېڅوک حق نه لري چې ملت او هېواد برمته کړي. هېڅوک د ولس د ارادې پر وړاندې نه شي درېدلی، دوی دې د سولې په لار کې خنډ نه جوړوي)).
د ولسي جرګې غړو همدا راز وویل چې د ولسمشر لومړی مرستیال دې د شپږنیمو د جلسو پر ځای پر سوله تمرکز وکړي؛ ځکه په خبره یې، که سوله راشي، هم نا امني ورکېدلی شي او هم به خلک خوندي وي. د بهادري په وینا: ((لومړیتوب سوله دی. د ولسمشر پر لومړي مرستیال هم غږ کوم، چې پر سوله تمرکز وکړي، دا خلکو ته تر هر څه مهمه ده. موږ سوله غواړو، ملت نور له جګړو ستړی دی او د سولې د راتګ تمه لري)).
بلخوا د ولسي جرګې رییس میر رحمان رحماني تېره ورځ د وروستیو ناندریو په اړه له ولسمشر غني سره کتلي دي. نوموړي هیله وښوده چې د اجرایه او مقننه قوې ترمنځ اوسنی کشمکش پای ته ورسېږي. ولسمشر بیا د دواړو لورو ترمنځ د اړیکو پر لا ټينګېدو او همکاریو پر پراختیا ټينګار کړی او په دې برخه کې پر ځینو میکانېزمونو هم توافق شوی دی.