پرون نیویارک ټایمز ورځپانې لیکلي وو چې اشرفغني او ملګري یې د سولې په لاره کې خنډونه جوړوي. ورځپاڼه وايي چې په دوحه کې د افغان حکومت د پلاوي او طالبانو ترمنځ په کړنلاره توافق شوی، خو دا توافق د ولسمشر غني له مخالفت سره مخ شوی دی. اشرفغني او ملګري یې پرله پسې هڅې کوي چې د سولې په لاره کې خنډونه جوړ کړي او تر هغو دا پروسه وځنډوي، چې بایډن واک اخلي.
څو ورځې وړاندې په دوحه کې د حکومت او طالبانو ترمنځ پر کړنلاره توافق وشو، وروسته د دواړو لورو په عمومي غونډه کې هم دا کړنلاره نهايي شوه او په ټیته کچه لاسلیک یا په نښه شوه. وروسته د دې هوکړې د نهايي کېدو په اړه کوربه هېواد هم خبر شو او یوه کاپي یې قطري چارواکو ته وسپارل شوه. دا پرمختګ د جینوا تر کنفرانس وړاندې وشو او حکومت هم داسې ښودله چې پرمختګ شوی، څو د جینوا کنفرانس ته وښيي چې حکومت د سولې په پروسه کې انعطاف ښيي، خو همدا چې کنفرانس تېر شو، ارګ بېرته پخواني حالت ته ور وګرځېد او پر کړنلاره شوې هوکړه یې رد کړه. دا چاره آن د دې سبب شوه چې د مذاکراتي ټیم په منځ کې اختلاف پیدا شي او خبره یې تر دې ورسیده چې یوه غړي یې په علني ډول د اشرفغني دریځ رد کړ او ویې ویل چې دوی پر کړنلاره هوکړه کړې ده.
ارګ په ښکاره نه وايي چې د سولې مخالف دی، چارواکي بیا بیا وايي چې دوی سوله غواړي او د سولې لپاره جدي اراده لري، خو ستونزه دا ده چې د حکومت دریځ د سولې مخه نیسي. د اشرفغني او ملګرو دریځ یې دا دی چې اشرفغني مشروع ولسمشر دی او پینځه کاله باید په واک کې وي. دوی واضح وايي چې طالبان دې راشي، وسله دې پر ځمکه کېږدي، جمهوریت او د تېرو شلو کلونو لاسته راوړنې باید ومني، اساسي قانون دې ومني، د یوه سیاسي ګوند په توګه دې کار پیل کړي، که اړتیا وه چې په اساسي قانون کې بدلون راشي، هغه به هم خپله د همدغه قانون پر اساس بدلېږي. دوی وايي چې طالبان دې بیا په راتلونکو ټاکنو کې برخه واخلي او که یې ټاکنې وکټلې، واک دې واخلي او که نه، خپل سیاسي ګوند دې وچلوي.
د ارګ دا دریځ په واضح ډول د سولې مخالف دی. په دې ډول سوله هېڅ ممکنه نه ده، دا د جګړې د دوام مانا لري. نه یوازې طالبان، بلکې آن یوه کمزورې ډله به هم په دې شرایطو له اشرفغني او ملګرو سره یې سولې ته زړه ښه نه کړي. اوس چې دوی په خوله سوله غواړي، یا ځیني واړه ګامونه یادوي، دا یوازې د خلکو په سترګو کې د خاورې شیندلو لپاره دي. په واقعیت کې اشرفغني او ملګري یې د خپل واک لپاره د سولې پر ضد ولاړ دي. له هرې لارې کار اخلي چې د سولې مخالفت وکړي او د خپل واک دوام ته لاره برابره کړي.