د مصالحې د عالي شورا د رهبرۍ کمېټې له لومړنۍ غونډې وروسته د افغان سولې لپاره د امریکا ځانګړي استازي د دې چارې د هرکلي ترڅنګ ویلي، چې دا کمېټه به د سولې د تړون د شرطونو، د واک د وېش او د اوربند په تړاو یو واکمن بنسټ وي. ګڼو نورو اړخونو هم د دې شورا د جوړېدو هرکلی کړی او پر دې یې خوښي ښودلې چې د سولې په تړاو یوه اجماع رامنځته شوې ده.
د مصالحې د عالي شورا د رهبرۍ له جوړېدو سره سم د امریکا له خوا د پیغام ورکول چې دا کمېته به د سولې په تړاو په مهمو مسایلو کې واکمن بنسټ وي، په ښکاره د سولې په چاره کې د ولسمشر غني د واکونو د کمولو هڅه ده. تر اوسه پورې د سولې په تړاو د افغانستان د حکومت دریځ یوازې د ولسمشر غني په لاس کې و او بدلون پکې د امریکا له مخامخ او سخت فشار وروسته راغلی دی. که څه هم ولسمشر غني له عبدالله سره ژمنه کړې وه چې د مصالحې عالی شورا به جوړوي، خو دا شورا په واضح ډول د دې لپاره ځنډول کېده چې د سولې په تړاو د تصمیم نیونې واک یوازې له ولسمشر غني سره پاتې شي. د مصالحې د عالي شوار جوړېدل هم اسانه نه وو، د کورنیو اړخونو په بیا بیا غوښتنه او د بهرنیانو په زیات فشار سره ولسمشر غني حاضر شو چې دا شورا جوړه شي. دا چې بهرنیانو او په خاص ډول امریکا د شورا د جوړېدو لپاره فشار راوړ، دلیل یې واضح و، ځکه چې غوښتل یې د سولې په تړاو د پرېکړو واک د ولسمشر غني له انحصاره وباسي. امریکایان د سولې په پروسه کې د ځنډ او خنډ له امله ناهیلي شوي وو او پر اشرف غني له بیا بیا فشارونو راوړلو هم ستړي وو، نو ځکه یې غوره ګڼله چې د مصالحې د عالي شورا په جوړولو سره یو مخ دا ستونزه حل کړي او په دې شورا سره د ولسمشر غني لاسونه او پښې ور وتړي.
اوس چې امریکایان وايي چې د مصالحې عالی شورا رهبري کمېته د سولې په تړاو او آن د واک د وېش په تړاو واکمن بنسټ دی، نو په واضح ډول ورسره ولسمشر غني څنګ ته کېږي. ولسمشر غني او ملګري به یې هڅه وکړي چې د دې چارې مخه ونیسي او د مصالحې عالي شورا تر ډېره سمبولیکه او بې صلاحیته کړي، خو دا چاره به ځکه ستونزمنه وي چې له یوه اړخه به له کورني غبرګون او فشار سره مخ شي او له بله اړخه به د بهرنیانو غوښتنې یو مخ رد نه شي کړلی. له دې وروسته به د سولې په چاره کې د ولسمشر غني مخالفتونه او خنډونه ځکه ډېر کارنده نه وي چې هم ورسره د مصالحې په عالي شورا کې مخالفت کېږي او هم به بهرنیان د مصالحې د عالي شورا د دریځونو ملاتړ کوي. دا چاره به آن ولسمشر غني پر مذاکره کوونکي ټیم له برلاسی وغورځوي او هغوی به یې هم هرې خبرې ته سر نه خوځوي. له همدې امله د سولې په پروسه کې د ولسمشر غني لاسونه او پښې تړل کېږي او نور به د مصالحې شورا رهبرۍ کمېټه پرېکړه کوي، خو هغوی به هم تل د امریکا شنه څراغ او خوښې ته ګوري.