وړمه شپه د کندهار په ارغنداب کې په یوه هوايي برید کې یوولس ملکي وګړي شهیدان شوي دي. په دوی کې لویه برخه ښځې او ماشومان دي. معلومه نه ده چې برید بهرنیو او که افغان ځواکونو کړی، خو حکومتي اداري یې په اړه متفاوت دریځونه لري. ملي امنیت ادعا کړې چې په کندهار کې یې طالبان وژلي، خو دفاع وزارت بیا وايي چې په دې اړه څېړنې کوي. هاخوا د کندهار امنیه قومانداني بیا وايي چې هېڅ هوايي برید نه دی شوی، بلکې د طالبانو یو موټربم هدف ته له رسېدو مخکی انفجار کړی او دا مرګژوبله یې اړولې ده. سیمهییز خلک بیا وايي چې برید د شپې په لسو بجو الوتکو په داسې حال کې د ملکي وګړو پر کورونو کړی، چې په سیمه کې هېڅ جګړه هم نه وه.
څو ورځې وړاندې هم په کندهار کې په هوايي برید کې ملکي وګړو ته د مرګژوبلې په تړاو خبرونه خپاره شول. له دې سره د براون پوهنتون یوه څېړنه وايي چې د ټرمپ په واکمنۍ کې د بهرنیو او حکومتي ځواکونو په هوايي بریدونو کې د ملکي وګړو وژنه (۳۳۰) سلنه زیاته شوې ده. حکومتي ویندویان تل د ملکي وګړو مرګژوبله ردوي. دوی د ملکي مرګژوبلې په اړه ډېری وخت د سیمې د اوسېدونکو او عیني شاهدانو خبرې هم ردوي چې تازه یې همدا کار د ارغنداب په اړه هم کړی دی. که خبره بېخي ثابته هم شي چې ملکیان وژل شوي او په هوايي برید کې وژل شوي، نو بیا طالبان پړه ګڼي چې سیمه یې نا امنه کړې ده او یا یې هم د خلکو په کورونو کې سنګرونه نیولي دي.
د ملکي وګړو وژنه یو ښکاره او نه بښل کېدونکی جنایت دی. دا وحشت په هېڅ ډول نه توجیه کېږي او نه یې هم مسوولین له پړې ځان ژغورلی شي. له بده مرغه په دې وروستیو کې یو ځل بیا پر هوايي بریدونو تکیه کېږي چې په طبیعي ډول ملکي وګړو ته مرګژوبله اړوي. په تېرو ۱۹ کلونو جګړو کې هم په هوايي بریدونو کې بیا بیا ملکي وګړو ته مرګژوبله اوښتې چې دې چارې نه یوازې له امنیت سره مرسته نه ده کړې، بلکې د دولت او خلکو ترمنځ یې واټن لا زیات کړی او له کبله یې وسلهوال طالبان لا زیات پیاوړي شوي دي. له همدې امله د هوايي بریدونو تګلاره او بیا هغه هم په داسې حال کې چې په هغه سیمه کې جګړه نه وي، یوه ناکامه، ناکاره او ناسمه تګلاره ده چې نه یوازې کومه مثبته ګټه نه لري، بلکې د ملکي وګړو د مرګژوبلې سبب کېږي.
د جګړې ښکېل لوري باید درک کړي چې لومړی خو یو مخ روانه جګړه سمه نه ده او چې څومره ژر ممکنه وي، باید دا جګړه ختمه شي، خو په دې جګړه کې بیا د ملکي وګړو وژنه نه بښل کېدونکی جنایت دی. که څوک رښتیا هم د ولس خبره کوي، د ولس خوشالي او حق غواړي او ځان د ولس د ارادې ممثل ګڼي، نو نه یوازې باید ملکي وګړو ته مرګژوبله وانه ړوي، بلکې د هغوی په خوندیتوب کې باید هڅې وکړي.