افغان رسنیز او څېړنیز مرکز د شیخ حمد د ژباړې او تفاهم نړیواله جائزه تر لاسه کړه، دغه جائزه د نړۍ په کچه د ژباړې او فرهنگونو د ودې او پرمختگ په موخه د (شیخ حَمَد) د جائزې د بنسټ له لوري له عربي ژبې څخه او عربي ژبې ته د معیاري ژباړو او علمي خدمتونو په برخه کې ورکول کېږي.
افغان رسنیز او څېړنیز مرکز، چې موسس او مشر یې عبد الجبار بهیر دی د عربي او پښتو ژبو تر منځ لس گونه کتابونه، علمی او ښوونیز اثار ژباړلي دي. له دې سربېره نوموړی مرکز د عربي نړۍ په کچه د مطبوعاتو په ډگر کې د یو خپلواک افغان څېړنیز او مطبوعاتي مرکز په توگه منل شوی او پېژندل شوی بنسټ بلل کېږي، چې د هېواد د علمي، ښوونیز او ټولنیز وضعیت په تړاو يې رغنده رول وړاندې کړی دی او په نړیوالو علمي او اکاډیمیکو کانفرانسونو کې يې د افغانستان استازولي کړې ده.
نوموړې جائزه هر کال د نړۍ په کچه د ژباړې او علمي پرمختگ په برخه کې ورکول کېږي او روان کال د یادې سیالۍ د شپږمې دورې په لړ کې له 42 هېوادونو څخه تر 300 زیات بنسټونه او کسان نوماندان وو او د پښتو او عربي ژبو د ژباړو په برخه کې له افغانستان او پاکستان څخه بېلابېلو ژباړنو او علمي ادارو خپل اثار وړاندې کړي وو، چې له افغانستان څخه افغان رسنیز او څېړنیز مرکز ته دا نړیواله جائزه ورکړل شوه. د یادې جائزې په تېرو پنځو دورو کې د انگلیسي، ترکي، هسپانوي، فرانسوي، الماني، چینايي، جاپاني، روسي ژبو ژباړې د دې جائزې لپاره غوره شوې وې.
د (شیخ حَمَد) د ژباړې او تفاهم نړیواله جائزه په 2015 کال کې د قطر د پخواني پاچا شیخ حَمَد په نوم رامنځ ته شوه، چې له عربي ژبې او یا عربي ژبې ته د ژباړل شوو علمي اثارو او تالیفونو د ستاینې او ویاړنې په برخه کې فعالیت لري او د دوو مېلیونو امریکايي ډالرو په ارزښت د نړۍ تر ټولو لوړه جائزه بلل کېږي.
د (شیخ حَمَد) د ژباړې نړیواله جاېزه د هر میلادي کال په پای کې په لاندې دریو برخو کې غوره شوو ژباړو ته ورکول کېږي:
لومړی: د عربي او انگليسي سربېره د یوې بلې نړیوالې ژبې تر منځ ژباړې، چې د هرې ژبې لپاره دوه سوه زره امریکايي ډالر ځانگړي شوي دي. له دې سربېره د یادو غوره شوو دوو ژبو د ژباړو په برخه کې د پرمختگ او لاسته راوړونکو اشخاصو او ادارو لپاره، دوه سوه زره امریکایي ډالر ټاکل شوي دي.
همدا راز په کلنۍ توگه د عربي او پنځو غوره شوو ژبو تر منځ د ژباړو او ژباړونکو ادارو لپاره، یو میلیون ډالر جائزه غوره شوې ده، چې په روان 2020 کال کې د فارسي، کوریايي، هوساوي، سویډني، بنگالي تر څنگ پښتو ژبه هم دې جائزې ته غوره شوې وه.