په هېواد کې د تاوتریخوالي له روان بهیر سره هممهاله په کابل کې د سولې لپاره هڅې چټکې شوې دي. تېره ورځ په کابل کې د ملي مصالحې عالي شورا د رهبرۍ کمېټې دویمه غونډه هم وشوه. ګڼو سیاسي څېرو او د سیاسي ګوندونو مشرانو په دې غونډه کې ګډون کړی و او د سولې راتګ یې مهم وباله. بلخوا پخواني ولسمشر حامد کرزي بیا په یوه تازه مرکه کې ویلي، د بین الافغاني مذاکراتو دواړه لوري باید ځانونه د پاکستان له اغېزې خلاص کړي. هغه همدا راز ټينګار کړی چې که په دوحه کې بین الافغاني مذاکرات پایلې ته ونه رسېږي، نو د دې احتمال شته چې سیاسي ناندرۍ ډېرې شي.
په بین الافغاني مذاکراتو کې د افغان حکومت پلاوی اوس په کابل کې دی او دلته له افغان حکومت سره پر بحثونو بوخت دی. تېره ورځ مذاکراتي پلاوی د ملي مصالحې عالي شورا د مشرتابه په غونډه کې هم حاضر و. په دې غونډه کې ټینګار وشو چې باید د سولې لپاره هڅې ډېرې شي او بین الافغاني مذاکرات پر خپل وخت پيل شي. په غونډه کې د ولسمشر دویم مرستیال بیا وویل چې د افغان سولې په تړاو تر داخلي بُعد بهرنی اړخ خطرناک دی. د ده په خبره، ځینې بهرنیان په دې مسئله کې مداخله کوي او دا د افغانستان لپاره خورا خطرناکه مسئله ده. په دې غونډه کې داسې خبرې هم کېدې چې له رسنیو پټې وې.
د همدې څرګندونو په تړاو تر امرالله صالح وړاندې پخواني ولسمشر حامد کرزي له عرب نیوز سره په خبرو کې ویلي چې د مذاکراتو دواړه لوري باید ځان د بهرنیانو په تېره د پاکستان له نفوذ خلاص کړي. د ده په خبره، د پاکستان یا نورو تر اثر لاندې خبرې افغانستان ته ثبات نه شي راوستلی. هغه همدا راز ویلي چې دواړه لوري باید ژر تر ژره بین الافغاني مذاکرات پیل کړي او یوې پایلې ته دې سره ورسېږي. د ده په خبره، دواړه لوري باید د امریکایي ځواکونو تر وتلو مخکې پایلې ته سره ورسېږي او جګړه دې ختمه کړي. پخواني ولسمشر حامد کرزي خبرداری ورکړی که طالبان او افغان حکومت ژر توافق ته سره ونه رسېږي، نو د دې احتمال شته چې هېواد یو ځل بیا د سیاسي ګډوډیو په ډګر بدل شي.
د ملي مصالحې عالي شورا د رهبرۍ شورا په غونډه کې هم ټینګار وشو چې د بین الافغاني مذاکراتو دویم پړاو باید ژر تر ژره پیل شي او د ځای ټاکل دې د دې سبب نه کېږي چې د مذاکراتو په پیل کې ځنډ رامنځته شي. د ملي مصالحې عالي شورا رییس ډاکټر عبدالله عبدالله وویل چې مذاکرات به بیا هم په دوحه کې پیلېږي؛ ځکه که پر ځای ناندرۍ او د نظر اختلاف پیل شي، نو ښایي مذاکرات وځنډېږي چې دا د افغانانو په ګټه کار نه دی. هغه همدا راز وویل چې د ملي مصالحې عالي شورا دروند مسوولیت پر اوږو لري او هغه دا چې باید دلته څلوېښت کلنه جګړه پای ته ورسوي. د ده په خبره: ((موږ یو مهم او دروند مسوولیت لرو، موږ باید دلته څلوېښت کلنه جګړه پای ته ورسوو. موږ باید د روانو وژنو مخه ډب کړو)).
بلخوا په بین الافغاني مذاکراتو کې د افغان حکومت د مذاکراتي پلاوي مشر معصوم ستانکزي هم وویل چې باید افغانان له زغم کار واخلي؛ ځکه د څلوېښت کلنې جګړې پای ته رسول د یوې یا دوو ورځو کار نه دی. هغه وویل چې دایمي سوله راوستل اوږدو خبرو او پراخ زغم ته اړتیا لري. ستانکزي ټینګار وکړ چې دوی به د مذاکراتو پر میز د افغانانو له حقونو دفاع کوي او لومړنی هدف یې دا دی چې دا ځل مذاکرات د اوربند سبب شي.