څو ځله داسې پېښ شوي چې بیا بیا یوازې یوه رستورانت ته لاړ شی او د هماغو پخوانیو خوړو فرمایش ورکړی؟ موږ انسانان پر عاداتو پورې تړلي موجودات یو او زموږ ډېری له ناپېژندل شویو پدیدو وېرېږو. حللاره دا ده چې باید پرې نږدو چې دغه وېره موږ د نویو احتمالاتو له کشفه په شا کړي. یوازینۍ لار چې کولای شی خپل ژوند ته پرمختګ ورکړو، دا ده چې له خپلې امنې فضا ووځو او ناپېژندل شویو شیانو ته غېږه ورکړو.
له درده وېره
دا یوه طبیعي چاره ده چې هېڅ انسان درد نه خوښوي او دا کومه د حیرانتیا خبره هم نه ده، چې موږ هڅه کوو چې له درده لرې او په امن کې پاتې شو. که چېرې ستاسو افکار د درد په اړه دومره زیات وي چې ستاسو په ژوند کې د پرمختګ خنډ ګرځي، نو بیا ښه ده چې د خپل تمرکز لوري ته بدلون ورکړئ. د درد په اړه احساس درلودل، له درده ډېر سخت دي. له درده متصوره وېره کولای شي په ډېرو حالاتو کې له رښتیني درده زیاته ازار ورکوونکې و اوسي.
له نشتوالي وېره
که چېرې تاسو د خپلو نږدې کسانو له نشتوالي، د دندې، کور یا کسب د له لاسه ورکولو وېرېږی، دغه ډول خیالي وېره له ژونده د هر ډول خوند اخیستلو مانع ګرځي. پخوا خلک اړ وو چې له مالي ستونزو او سختیو سره مبارزه وکړي. دا سمه ده چې په دې ډول شرایطو کې باید د خپلو مالي ستونزو د حل په موخه لاس پکار شو، خو ډېره اندېښنه نه ده ورته پکار. ناپلیون هېل وایي، په ځان کې وېرې ته ځای ورکول، د مالي یا شغلي امنیت د له لاسه ورکولو لامل کېږي.
له پرېکړې وېره
موږ ټول غواړو چې نور زموږ ستاینه وکړي او مینه راسره ولري. غواړو چې هرو مرو د یوې ډلې یا ټولنې غړي و اوسو. همدا لامل دی چې د نورو له پرېکړې وېرېږو. موږ نه غواړو چې نور خلک زموږ په اړه د لېوني یا تېروتونکي کس په توګه فکر وکړي، ځکه چې دغه تصور او فکر د دې لامل کېږي چې هغوی موږ له خپلو ډلو سره مناسب ونه بولي. ځینې وخت له پرېکړې نه وېره په دې مانا ده چې زموږ لویې او غوره نظریې د وېرې تر انبار لاندې نا سپړلې پاتې کېږي. له دې وېرې څخه د خلاصون لپاره باید پوه شو چې د نورو نظریات د هغوی خپل عقاید او باورونه وبولو او ډېر ارزښت ورنه کړو. که چېرې مو دغه ساده کار زده کړ، نور به د دې احساس ونه کړو چې ګواکې د نورو تر پرېکړې لاندې راغلي یو.
له بریا وېره
دغه وېره یو څه حیرانوونکې ښکاري. کېدای شي وپوښتئ: «ولې باید له بریا ووېرېږو؟» باید ووایم چې دغه وېره له نورو وېرو مشهوره ده. ځینې کسان کله چې په دې پوه شي چې د بریا راتلونکی ګام د هغوی له تمې او تصوره لوړ دی، له خپلو پروژو لاس په سر کېږي او یا په ناپوهۍ کې هغه اړیکې چې له بریا سره وصل دي، له منځه وړي. دغه وېره د ناپېژندل شویو له وېرې سره مستقیمه اړیکه لري او همدارنګه پر ځان باندې له شک او تردید سره هم پیوند لري. که چېرې فکر کوو چې د بریالي کېدو وړتیا نه لرو، خپل ځان مو په لوی لاس له بریالیتوبه محروم کړی دی. باور ولرئ چې موږ د غوره او عالي لاسته راوړنو وړتیا لرو.
له ماتې وېره
بریالي انسانان تاسو ته وایي، چې له بل هر چا یې ډېرې ماتې خوړلې دي. دا هر څه له ماتې څخه ستاسو پر اخذ او فهم پورې تړلي دي. کله مو چې هره ماتې د یو نوي فرصت د زده کړې او د پرمختګ پر لور د یو نوي ګام اخیستو په توګه ومنله، له ماتې وېره خپل ځواک او توان له لاسه ورکوي. موږ ټولو پر لاره تلل همدا ډول نه دي زده کړي؟ موږ له همدې امله په دې نړۍ کې یو، چې زده کړو که چېرې له تجربو زده کړه وکړو، تېروتنې مو هغومره هم سختې او نا هیلې کوونکې نه پرېوځي.
تېروتنه او بریا د بریالیتوب د لارې یوه برخه ده. وېره د تصور او تجسم له ځواکه ناوړه ګټه اخیستل دي.
وېره ورانوونکی عامل دی چې په هر ځای کې د پرمختګ د له منځه وړو لامل کېږي، خو پرېکړه د پرمختګ لامل کېږي. کله چې د خپل ذهن او روان پلیتې وېرې کنټرول کړی او له منځه یې یوسی، ذهني ارامتیا به تر لاسه کړی او په چټکۍ سره به د خپلو هیلو د حقیقت پر لور ګام واخلی.
مشهور لیکوال او فیلسوف «شارون» وایي: «که احساس کوی چې تر فشار لاندې یاست او یا په کوم ځای کې بند پاتې یاست، پوه شی چې ژوند مو پر تاسو واکمني او برلاسي لري. اجازه مه ورکوئ چې وېره ستاسو د فلج کېدو لامل وګرځي. د خپلو وېرو زړه ته ننوځئ او د یوې زرینې موقع په توګه ګټه ترې واخلئ. یوازې مه پاتې کېږئ، له بندو قفسونو را ووځئ، له کوره بهر شئ او د ځان لپاره یو لاروی او همغږی پیدا کړئ. که چېرې مو د نورو شخصي ژوند ته ارزښت ورکړ، باور ولرئ چې دغه ارزښت به په خپل ژوند کې هم وګوری.»
پر وېرې د غلبې او برلاسي لپاره لومړنی ګام، د تر ټولو اغېزناکې وېرې په اړه پوهاوی لرل دي. تر هغو پورې چې یو شی ونه پېژنی، نشی کولای بدلون ورکړی. ځان ته یو څه وخت ورکړئ او خپل ژوند و ارزوئ. د پرېکړو، چلندونو او د خپل ژوند د راتلونکي په اړه فکر وکړئ.
په وېره څه ډول برلاسي کېدای شو؟
کولای شی زرګونه ارزښتمن کارونه وکړی او په ژوند کې خپلو غوښتنو ته ورسېږی. هېل دغه فرضیه ثابته کړې ده. اجازه مه ورکوئ چې وېرې مو د پرمختګ او لوړتیا خنډ وګرځي.
مه پرېږدئ چې د نورو عقیدې او باورونه ستاسو ذهن له وېرو او شکونو ډک کړي. مه هېروئ هغه څه چې ستاسو په ذهن کې جریان لري، ستاسو د ژوند حقیقت جوړوي. افکار مو د باور او مېړانې پر اساس ولاړ وساتئ چې ذهن مو همدغه څه په حقیقت کې ښکاره کړي. دا زده کړئ چې پر خپل ذهن واکمن شی، نه دا چې ذهن مو پر تاسو واکمن وي.
خپلو افکارو ته مو لوری او مسیر ورکړئ
په یاد ولرئ چې وېره یو ذهني حالت دی. هر هغه څه چې ټینګار پرې کوی، په اصل کې هماغه شی د ځان پر لور راکاږی. نو په پوره ځیرکتیا سره خپل افکار پر ټاکلو او د خوښې وړ موخو متمرکز کړئ او یو ښکلی او مینه ناک ژوند رامنځ ته کړئ.