د چين د کمونېست ګوند مرکزي کمېټې د ۲۰۲۰ کال د ډسمبر له ۲۸مې تر ۲۹مې نېټې پورې په بېجینګ کې د دغه هېواد د زراعتي چارو په اړه يوه غونډه تر سره کړه. د چين رهبر شي جين پينګ په دغه غونډه کې اړوندو ادارو ته د بېوزلۍ د له منځه وړلو په برخه کې د حکومت د لاسته راوړنو د ساتلو او پراخولو، د کليوالو سيمو د هر اړخيزې احيا ستراتېژۍ د پلي کولو او د زراعت او کليوالو سيمو د عصري کېدو په ګډون، د بېلابېلو چارو لارښوونې وکړې.
چين زراعت ته ډېر اهميت ورکوي، يوه چيني اصطلاح ده چې وايي، زراعت د هېواد بنسټ دی، که بنسټ ټينګ وي، نو هېواد به ثابت پرمختګ ومومي.
چين يو زراعتي هېواد دی او چينايان له زمانو راهیسې بزګرو ته ځانګړی درناوی لري او زراعتي چارو ته په ډېره درنه سترګه ګوري. د چيني ملت په کلتور کې کرونده ډېر مهم ځای لري. چينايان له زرګونو کلونو راهیسې د کرکیلې د اغېزې په نتيجه کې د انسانانو او طبيعت تر منځ همغږۍ ته ډېره پاملرنه کوي او کار او سپما ښه سيرت بولي. بزګر، کليوالې سيمې او زراعتي چارې د خلکو له خوراک او څښاک سره مستقيمې اړيکې لري، که د خوراک او څښاک ستونزه هواره نه شي، نو ثبات او پرمختګ به نه وي.
د چين حکومت د بزګرو، کليوالو سيمو او زراعت چارې د خپل هېواد پرمختګ ته ډېرې مهمې بولي. چين ډېر پراخوالی او غني محصولات لري او د کروندو مساحت يې ۱۲۰ ميليونو هکټارو ته رسيږي، خو د نفوس شمېر يې هم يو ميليارد او ۴۰۰ ميليونو ته رسېدلی دی، نو د هر تن په سر د کروندې مساحت يې کم دی او د نړۍ تر منځنۍ کچې هم ټيټ دی. په تېره پېړۍ کې يو امريکايي کارپوه پوښتنه کړې وه، چې څوک چين روزي؟
اوس په چين کې ډېری خلک پر زراعتي چارو لګيا دي او د چينايانو د هر تن پر سر د غلودانو او څو مهمو کرنيزو توليداتو اندازې د نړۍ له منځنۍ سويې سره برابرې دي او ځينې يې آن د نړۍ له منځنۍ سويې څخه هم پورته دي. دغه وضعيت ته په کتو، د ياد امریکايي کارپوه پوښتنې ته ځواب اسانه موندل کيږي. د چين زراعتي پرمختګ نه يوازې د چينايانو د خوراک او څښاک اړتياوې پوره کړې، بلکې د دغه هېواد د ټولنيز پرمختګ لپاره يې ټينګ اقتصادي ملاتړ هم برابر کړی دی او دغه برياليتوب د چینايانو د ډېر زیار ایستلو ښودنه کوي او په نړۍ کې يوه ښه نمونه هم بلل کيږي.
اوس په چين کې د بزګرو، کليوالو سيمو او زراعتي چارو پرمختګ نوي پړاو ته داخل شوی او حکومت د کليوالو سيمو د هر اړخيزې بيا سمسورتيا د ستراتېژۍ د پلي کولو په هڅه کې دی. د چين حکومت موخه درلوده، چې تر ۲۰۲۰ کال کال مخکې په خپل هېواد کې يوه نسبتاً شتمنه ټولنه اباده کړي او په دغه هېواد کې په بشپړه توګه بېوزلي له منځه يوسي. د چين ګوی جو ولايت د همدې کال د نومبر په ۲۳مه اعلان وکړ، چې وروستۍ ۹ بېوزلې ولسوالۍ يې له بېوزلۍ څخه ووتلې، چې په دې سره په دغه هېواد کې ۸۳۲ بېوزلو ولسواليو له بېوزلۍ سره مخه ښه وکړه.
د چين د دولت ریيس شي جين پینګ په ياده غونډه کې په دې اړه، چې دولت په راتلونکي کې څنګه د هېواد زراعتي چارې پرمخ بوځي؟ وويل، که چیني ملت بيا سمسورتيا غواړي، نو هرومرو بايد کليوالې سيمې بيا سمسورې کړي او د دې لپاره اړتيا ده، چې په دغه هېواد کې د بېوزلۍ له منځه وړلو لاسته راوړنې ښې وساتل شي، د غلو دانو خوندیتوب تضمين او د کليوالو سيمو د بيا سمسورولو چارې په ښه توګه تر سره شي.
په دغه غونډه کې د دغه هېواد د زراعت او کليوالو سيمو د عصري کېدو بهير د چټکتيا په اړه د حکومت يو سند هم وارزول شو او ښايي ژر تایید او پلی شي. چينايان هيلهمن دي چې دغه سند په چين کې د بزګرو، کليوالو سيمو او زراعتي چارو پرمختګ ته نوره هم لاره هواره کړي.
افغانستان يو زراعتي او مالداريیز هېواد دی. د چين او افغانستان تر منځ د کرنيزو تخنيکونو د پرمختګ، د کرنيزو زېربناوو د جوړولو او د کرنيزو پيداوارو د تجارت په برخو کې د همکارۍ ډېر ظرفيت لري. ځينو چيني شرکتونو په افغانستان کې د زعفران د کرلو لپاره نوي تخنيکونه مروج کړي او ډېرې ښې لاسته راوړنې لري. د افغانستان ځانګړي کرنيز محصولات د چين او افغانستان تر منځ د هوايي دهليز او د مال وړونکو اورګاډو له لارې چين ته صادريږي او ډېرو افغان تصديو په چین کې د وارداتو او صادراتو په نندارتون، نړيوال وارداتي نندارتون او د چين او جنوبي اسيا نندارتون کې ګډون کړی دی. د چين رهبر ډېر ځله ويلي، چې چين د افغانستان په ګډون د بېلابېلو هېوادونو هرکلی کوي، چې د دغه هېواد د پرمختګ ”ګړندي موټر“ ته ځانونه پورته کړي. هيله ده چې د چين او افغانستان تر منځ متقابلې ګټورې همکارۍ افغان بزګرو او د بېلابېلو ټولنو خلکو ته ډېرې رښتينې ګټې ورسوي.