په دوحه کې د مذاکراتو له درېدو سره هممهاله ویل کېږي چې د افغان حکومت د مذاکراتي پلاوي ځینې غړي کابل ته راغلي دي. باوري سرچینې ویلي چې په راغلو غړو کې ځینې یې په جبري توګه رابلل شوي او ځینې یې بیا د ارګ له لوري را غوښتل شوي دي. له دې سره هممهاله به کور د ننه وضعیت ترینګلی دی. هدفي بریدونه ډېر شوي او دواړه خواوې یو بل ته د شدیدو جګړو خبرداری ورکوي. د ملي مصالحې عالي شورا بیا له طالبانو غواړي چې ژر تر ژره بېرته د خبرو مېز ته ستانه شي.
په وروستیو کې داسې ګنګوسې خپرې شوې چې ګواکي افغان حکومت ښایي د بین الافغاني مذاکراتو لپاره د ټاکل شوي پلاوي ځینې غړي کابل ته راوغواړي. اوس تازه د دغه پلاوي ځینې غړي کابل ته راغلي دي. سره له دې چې د سولې په چارو کې د دولت وزارت د دغو کسانو راتګ تاییدوي، خو دا نه وایي چې دوی ګواکي د حکومت په غوښتنه راغلي دي. یوې باوري سرچینې ویلي چې په یوه تازه اقدام کې د بین الافغاني مذاکراتو لپاره د افغان حکومت پنځه غړي کابل ته رابلل شوي دي. په دې کسانو کې امین احمدي، رسول طالب، کلیم الله نقیبي، متین بیک او حبیبه سرابي شامل دي. سرچینې ویلي چې له دې ډلې د امین احمدي راتګ جبري ګڼل شوی؛ ځکه هغه په یوه غږي پیغام کې د موقت حکومت مسئله له رسنیو سره شریکه کړې وه. سرچینه وايي: «له دې ډلې دا نور ارګ ښايي رابللي وي، خو د امین احمدي راتګ اجباري و؛ ځکه هغه په یوه غږيز پیغام کې د موقت حکومت له جوړېدو او په دې تړاو احتمالي مسایل له رسنیو سره شریک کړي وو».
د سولې په چارو کې د دولت وزارت هم د یادو کسانو راتګ مني، خو په دې اړه نور جزیات نه ورکوي. د دغه وزارت ویانده ناجیه انوري وایي، چې د افغان مذاکراتي پلاوي راتګ یوه عادي مسئله ده او د پلاوي غړي تګ راتګ کولی شي. سرچینه بیا وایي، د مذاکراتي پلاوي په اړه پرېکړه کول او یا د دوی رابلل د ملي مصالحې عالي شورا صلاحیت دی، خو اوس دغه کسان ولسمشرۍ ماڼۍ رابللي دي. د سرچینې په خبره: «د ملي مصالحې عالي شورا د بین الافغاني مذاکراتو پلاوي رابللی شي، خو اوس دا کسان ارګ رابللي دي».
د بین الافغاني مذاکراتو پلاوی داسې مهال کابل ته راځي، چې په دوحه کې مذاکرات په ټپه ولاړ دي. د ملي مصالحې عالي شورا رییس ډاکتر عبدالله عبدالله هم تېره ورځ په یوه غونډه کې وویل چې طالبانو بېخي د مذاکراتو مېز پرې اېښي دی او خبرو ته نه حاضرېږي. د ده په خبره، سره له دې چې طالبانو په رسمي توګه د مذاکراتو ځنډېدل نه دي منلي، خو ډېره موده کېږي چې ان د تماس ډلو ترمنځ هم ناسته نه ده شوې. د ده په خبره، طالبان په دې توګه مذاکرات ځنډوي او د سولې لپاره د افغانانو هیلې له منځه وړي. عبدالله زیاته کړې: «طالبان د مذاکراتو له مېز په شا شوي دي. دوی په بین الافغاني خبرو کې د ځنډ لامل دي. زموږ پلاوی له بشپړ صلاحیت سره په دوحه کې دی او طالبانو ته په کار ده چې بېرته خبرو ته را ستانه شي».
ډاکتر عبدالله عبدالله همدا راز له نړیوالې ټولنې وغوښتل چې په بین الافغاني خبرو کې همکاري وکړي او په دې توګه دلته روانه جګړه پای ته ورسوي. نوموړي ټینګار وکړ چې افغان جګړه یوازې د خبرو له لارې د ختمېدو وړ ده او طالبانو ته په کار ده چې دا مهم فرصت ضایع نه کړي.
له دې سره جوخت د امریکايي پوځ د مرکزي قوماندانۍ قوماندان جنرال کینت مک کینزي هم ویلي چې امریکايي حکومت په ډيپلوماتیکه او نظامي توګه په افغانستان کې اوسنی وضعیت ارزوي او همدا راز هڅه کوي دا واضح کړي چې طالبانو پر ژمنو عمل کړی دی کنه. هغه ویلي شواهد ښيي چې طالبانو خپل بریدونه او هدفي وژنې ډېرې کړې دي او دا د منلو وړ نه دي.