عروج د لوړو زده کړو موسسه چې په کابل ښار کې موقعیت لري، په ۱۳۸۶ کال کې یې د نیمه زده کړو په چوکاټ کې پر فعالیت پیل وکړ، چې د پیل پر مهال یې یوازې ښځينه محصلینې درلودې. د یادې موسسې د اجرایوي رییس نورالرحمن طاهري په وینا، عروج د لوړو زده کړو موسسې په ۱۳۹۰ کال کې د لوړو زده کړو موسسې ته ارتقاع وکړه او د پيل پر مهال یې د حقوقو او سیاسي علومو، اقتصاد او نړیوالو اړیکو پوهنځي درلودل.
د ښاغلي طاهري په وینا، عروج د لوړو زده کړو موسسه اوسمهال هم په همدغو پوهنځیو کې فعالیت لري، خو له پخوا سره یې توپیر دا دی چې اوسمهال نارینه او ښځینه دواړه طبقې محصلین پکې پر زده کړو بوخت دي. نوموړی وایي چې د خلکو غوښتنو ته په کتو یې د نارینه او ښځینه محصلینو لپاره ځانګړي ټولګي په پام کې ونیول او په بېلو درسي ټایمونو کې یې ورته د زده کړو زمینه برابره کړه.
د عروج د لوړو زده کړو موسسې اجرایوي رییس نورالرحمن طاهري همدا راز وایي، دوی په حقوقو پوهنځي کې د قضا او څارنوالۍ او ادارې او ډیپلوماسۍ ډېپارټمنټونه لري او په اقتصاد پوهنځي کې د ادارې او تجارت، منجمېنټ او بانکدارۍ ډېپارټمنټونه لري.
ښاغلي طاهري زیاته کړه، عروج د لوړو زده کړو موسسه اوسمهال ټول ۱۲۰۰ محصلین لري چې له دې ډلې یې ۴۰۰ ښځينه او پاتې نور یې نارینه محصلین دي.
د ښاغلي نورالرحمن طاهري په وینا، عروج د لوړو زده کړو موسسې له مختلفو پوهنځیو څخه تر دې دمه په پنځو دورو کې محصلین فارغ کړي دي، چې په دې کې څلور دورې ښځینه محصلینې او په پنځمه دوره فارغینو کې یې نارینه او ښځینه دواړه طبقې شاملې دي.
د عروج د لوړو زده کړو موسسې د اجرایوي رییس ښاغلي نورالرحمن طاهري په خبره، یاده موسسه دوه ډوله استادان لري چې یوه ډله یې دایمي او پاتې نور یې په قراردادي بڼه تدریسي چارې پر مخ بیایي. د ښاغلي طاهري په خبره، د یادې موسسې د دایمي استادانو شمېر ۲۰ او د قراردادي استادانو شمېر یې بیا د ۶۰ په شاوخوا کې دی.
ښاغلي طاهري همدا راز وویل، عروج د لوړو زده کړو موسسه د ځينو ځانګړو موخو په بنسټ لکه حقوقي اړیکې، کتابتون، عدلي طب او کلینیک، د استادانو د علمي تجربو او نظریاتو د شریکولو او ډېرو نورو عملي موخو د لا پیاوړتیا لپاره په هېواد کې دننه او له هېواده د باندې له ډېرو پوهنتونونو او علمي مرکزونو سره اړیکې لري.
د ښاغلي طاهري په خبره، عروج د لوړو زده کړو موسسه د خپلو محصلینو لپاره د موسسې دننه کتابتون لري او پر دې سربېره یې د نورو پوهنتونونو او د ښار له ډېرو کتابتونونو سره تفاهم لیکونه لاسلیک کړي دي، چې پر بنسټ به یې د دوی محصلین د خپلو معلوماتو د لاسته راوړلو او مطالعې لپاره مراجعه ورته کوي. هغه زیاتوي، له دې ډلې په کابل ښار کې د اکسوس په نوم تر ټولو لوی کتابتون ته اشاره کولای شو چې د یادې موسسې محصلین کولای شي په پام وړ تخفیف سره ترې کتابونه تر لاسه کړي، مطالعه یې کړي او بېرته یې ورته وسپاري.
ښاغلی طاهري وایي، عروج د لوړو زده کړو موسسه د خپلو محصلینو لپاره ډېرې اسانتیاوې لري، چې له دې ډلې کولای شو ښځینه محصلینو ته وړیا ترانسپورټ، نارینه او ښځينه محصلینو ته په موسسه کې د ننه وړیا انټرنېټ او د لرې پرتو سیمو محصلینو ته د لیلیې خدمتونو ته اشاره وکړو.
د یادې موسسې اجرایوي رییس ښاغلي نورالرحمن طاهري همدا راز زیاته کړه، عروج د لوړو زده کړو موسسه د محصلینو هرې طبقې ته ځانګړی تخفیف په پام کې لري، د بېلګې په توګه، د دولت برحاله کارکوونکو ته چې په عروج د لوړو زده کړو موسسه کې زده کړې کوي، له ۲۰ تر ۳۰ سلنه پورې تخفیف په پام کې لري او همدا راز هغه ډله محصلین چې اقتصادي وضعیت یې ښه نه دی، تر ۵۰ سلنه پورې تخفیف ورکول کېږي او درېیمه هغه ډله محصلین دي چې وړتیا او لیاقت لري؛ خو د کمزوري اقتصادي وضعیت له امله خپلو لوړو زده کړو ته دوام نشي ورکولای، عروج د لوړو زده کړو موسسه په خپل هر سمیستر کې تر ۲۰ پورې دا ډول محصلین په وړیا توګه جذبوي، څو وکولای شي چې خپلو لوړو زده کړو ته دوام ورکړي.
ښاغلی نورالرحمن طاهري وایي، که څه هم په لوړو زده کړو وزارت کې د فارغ شوو محصلینو د اسنادو پروسه له یو څه ځنډ سره مخ کېږي، خو عروج د لوړو زده کړو موسسې تر دې دمه خپلو ټولو فارغ شوو محصلینو ته په لوړو زده کړو وزارت کې ثبت او راجستر شوي اسناد ورکړي دي.
د عروج د لوړو زده کړو موسسې اجرایوي رییس ښاغلي نورالرحمن طاهري وویل، د دولتي او خصوصي پوهنتونونو تر منځ کوم ځانګړی توپیر نه لیدل کېږي، ځکه هغه لایحه چې د لوړو زده کړو وزارت لخوا دولتي پوهنتونونو ته ورکول کېږي، همغه لایحه په خصوصو پوهنتونونو کې هم پلې کېږي او د همدې لایحې له مخې درسي چارې پر مخ وړل کېږي. یانې د لایحې او قانون له مخې دولتي او خصوصي دواړه پوهنتونونه يه یوه سطحه کې دي او یاد قانون او لایحه چې یو ډول نصاب او درسي بهیر پکې شامل دی، په دواړو کې په ورته ډول عملي کېږي.
ښاغلی طاهري وایي، عروج د لوړو زده کړو موسسه د راتلونکي لپاره ځينې ځانګړي پلانونه په پام کې لري، د بېلګې په توګه، د هغو پوهنځیو تاسیس چې په بازار کې یې فعالیت او تجربې ته اړتیا ده، د ماسټرۍ پروګرام رامنځته کول او د شته پوهنځیو د درسي نصاب بیا کتنه چې له اړتیا سره سم به د پام وړ بدلونونه پکې راوستل شي.
د عروج د لوړو زده کړو موسسې اجرایوي رییس ښاغلي نورالرحمن طاهري زیاته کړه، دوی له دولت او لوړو زده کړو وزارت څخه د نورو خصوصي پوهنتونونو په څېر یوه عمده غوښتنه لري، چې هغه په هېواد کې د لوړو زده کړو لپاره د پام وړ شرایطو نه چمتو کول دي، چې باید جدي پاملرنه ورته وشي. د هېواد علمي مرکزونه د لوړو زده کړو لپاره د بهرنیو هېوادونو په څېر اسانتیاوې او امکانات نه لري، محصلین په پوره غور او ذهني فوکس سره درسي مطالب نه شي اخذ کولای او له اړتیا او غوښتنې سره سم درسي اسانتیاوې نه دي ورته برابرې شوې.
ښاغلي طاهري زیاته کړه، له لوړو زده کړو وزارت څخه یې غوښتنه دا ده چې د یاد وزارت لخوا خصوصي پوهنتونونو ته جوړ شوی قانون پر ټولو پوهنتونونو باندې په یو شان پلی کړي، لا ډېرې اسانتیاوې پکې رامنځته شي، نصاب ته یې پاملرنه وشي او په پوره غور سره یې څارنه وکړي، څو خصوصي پوهنتونونه له توپيري چلند څخه خوندي وي او ټولنې ته لا غوره خدمتونه وړاندې کړي.