ایا کله مو داسې فکر کړی چې خپل ځان درنه ورک وي او یا مو هم په ژوند کې یوڅه کم دي؟ ممکن تاسو وغواړی چې په خپل ځان او ژوند کې پراخ بدلون رامنځته کړی، خو دغه بدلون څه ډول رامنځته کولی شو؟ ډېری کسان په ژوند کې له بېلابېلو څیزونو سره ډېره مینه او علاقه لري، خو کله چې ورته رسیدلی نشي، نو بیا ناهیلي شي او ژوند ورته ستونزمن شي.
ستاسو په ژوند کې تر ټولو ښې ورځې ستاسو د پيدایښت او بله هغه ورځ ده چې پوه شی له ژونده مو موخه څه ده، خو که په دې پوه نشی چې موخه مو څه ده او د څه لپاره دې دنیا ته راغلي يی؛ بیا ژوند کیدای شي درته سخت شي.
په دې لیکنه کې مو همدې ټکو ته اشاره کړې چې څنګه کولی شو په ژوند کې خپلې موخې وپيژنو.
زه دا احساس ښه پيژنم. په ډېرې سختۍ سره مې دا هڅه کوله څو خپله موخه پیدا او وپيژنم، خو په وجود کې مې یو ډول شور دننه ځورولم، ځینې کارونه وو چې له هغو مې کرکه درلوده، د بېلګې په ډول، له خاورو او دوړو ډکه هوا او د خلکو زیاته ګڼه ګوڼه! خو هغه څه مې چې غوښتل، هغه له ژوند او کار سره زیاته مینه وه.
ما هره ورځ له ځان سره د خپلې موخې موندلو لپاره مبارزه کوله، خو کله مې چې یو ګام وروسته واخیست او پوه شوم چې زما هدف هغه څه نه و چې په خپل ذهن او فکر کې مې لټوو؛ فکر مې وکړ کیدای شي اصلي ستونزه دا نه وي چې زه نه پوهیږم موخه مې څه ده؛ اصلي خبره دا ده چې څنکه پوه شم چې دا زما اصلي موخه ده.
موږ نشو کولی هغه څه چې غواړو یوازې په خپل ذهن کې رسم کړو، څو چې لاس پکار نشو موخو ته رسېدل ستونزمن کار دی، یانې هغه څه چې غواړو باید د لاسته راوړلو لپاره یې قدم واخلو او هغه څه چې مو نه خوښیږي؛ له خپلې مخې یې لرې کړو. که د موخې په لټه کې یاست، دا خبرې پرېږدئ چې غواړم دا کار سبا او یا هم کله چې وخت پيدا کړم بیا به یې وکړم؛ ښه ده چې همغه شیبه لاس پکار شئ.
۱ـ لاس پکار شئ
دا په یاد ولرئ هر څومره ژر چې اقدام وکړی، هغومره ژر به خپلې موخې ته ورسیږی، نو دا کړنلاره له دې غوره نه ده چې خپل وخت په بېځایه ناسته ولاړه تیروو؟ ایا دې ته اړتیا نه لری چې خپل فکر عملي کړئ؟
ځینې وخت له ځان سره وایو، که له فلان شي سره مینه ونه لرم، نو څه؟ که هغه پيسې مې لاسته رانه وړې، نو څه به وشي؟ دا فکرونه مو له سره وباسئ. پيل وکړئ، د خپلې موخې د لاسته راوړلو لپاره قدم واخلئ او په ژوند کې مو نوي شیان تجربه کړئ. دا له تاسو سره مرسته کوي، څو مو یو اړخیز ژوند ته د پای ټکی کیږدی. زه له ډېر پخوا د خپلې موخې پيدا کېدو په لټه کې وم او له ډېر پخوا مې د همدې لپاره مبارزه کوله؛ خو دا یوازې فکر و او لوړې او ژورې به مې په ذهن کې انځورولې، کله مې چې په عمل لاس پورې کړ، هر څه بدلون وکړ. ما لیکل پيل کړل او د ذهن د ارامښت لپاره مې د چرګ له غوښې او نورو موادو له یوځای کیدو د سوپ جوړېدو په اړه یوه لنډه کیسه ولیکه، تر هغه وروسته مې د مینې په اړه یوه مقاله ولیکه، بالاخره هماغه وو چې مینې زما په زړه کې په حرکت پیل وکړ او ما احساس کړه چې دا هغه څه دي چې باید زما په ژوند کې پېښ شي. زه باید لیکل وکړم، څو پوه شم چې په ژوند کې زما تر ټولو لویه جذبه لیکل دي. دا هرڅه د پرلهپسې عمل په پایله کې هم پېښ شوي دي. تجربه هغه انعام دی چې موږ یې تر لاسه کوو او عمل هغه څه دی چې موږ یې خوږه پایله وینو.
۲- د خپل زړه خبرې واورئ
ستاسو زړه ستاسو د رښتینې موخې او لېوالتیا تر لاسه کولو لپاره تر ټولو غوره وسیله ده. له ځانه وپوښتئ، څه شی چې تاسو خوښوی، د هغه په لور مو قدم اخیستی؟ کله چې تاسو خپل داخلي تحرک او د زړه خوښۍ ومومی، الهام او انګېزه به ستاسو زړه او روح ته در وګرځي. کله چې تاسو له خپل زړه څخه امر اخلی، نو طبیعي ده چې ډېر خوندونه اخلی او د هڅولو لپاره مو انګېزه ډېره قوي کېږي. د هغه کار په تر سره کولو چې له هغه سره ډېره مینه لری، ستاسو په وجود کې د هغه د تر سره کولو لپاره انګېزه لا پياوړې کېږي او تاسو به د هغه څه په اړه پوه شی چې تاسو ته ډېره خوښي درکوي.
۳- یوازې د یوه کار په لټه کې مه اوسئ
ډېری خلک په دې فکر کې دي، چې یوازې یو کار تر سره کړي یا د یوه کوچني هدف لپاره کار کوي، دا د دې لامل کیږي چې بیا له ځان سره فکر کوي، چې څه خو به یې ورک کړي نه وي؟ دا فکر چې یو ځانګړی کار دی او دا باید تر سره کړم، موږ د خپلو موخو د تر لاسه کولو له مینې وروسته پرېږدي. زه به د خپلو کارونو په اړه ووایم، په ژوند کې اووه بېلابېل کارونه تر سره کوم، د بېلګې په توګه، مشاور، لیکوال، ویاند، ښوونکی، ډیزاینر او د کلي مشر؛ هر کار چې تر سره کوم، خوند ترې اخلم او خوښي رابښي؛ دا هر کار زه په زور او نه زړه نه تر سره کوم؛ بلکې دا زما ډېر شوق او مینه ده چې تر سره کوم یې. نو بهتره ده چې هر کار په ډېره مینه سرته ورسوئ، کله مو چې ژوند له مینې او خوښیو سره مل و، هماغه ده چې خپلو موخو ته به ګام په ګام نږدې کېږی. دا فکر له ځان لرې کړئ چې یوازې د یوې موخې لپاره کار کوی، دا باور ولرئ چې د ښه ژوند لپاره باید ښې موخې ولری او نوي شیان باید تجربه کړئ او هغه څه چې ورسره نابلده یاست، مبارزه وکړئ، خپله موخه او احساسات وڅارئ، څو یو ښه ژوند ولری.