خلک په دې نه پوهیږي چې سبا، بله ورځ یا هم میاشت یا کال وروسته به څه پېښېږي؟؟ دا ژوند دی هرڅه پکې پېښېدونکي دي. زیاتره خلک له راتلونکې څخه په وېره کې ژوند کوي، که هرڅومره په احتیاط او د مهالوېش له مخې مخته لاړ شي هم؛ بیا هم نشي کولی چې هر څه سم او په خپل وخت تر سره کړي. هغه څه چې احتمالاً پېښېږي موږ باید له پښو ونه غورځوي. د ناڅرګنده راتلونکې د وېرې له امله ډېری خلک له مهمو پرېکړو کولو څخه ډډه کوي، دوی ممکن د لارې په اوږدو کې خورا ښه فرصتونه له لاسه ورکړي. په دې لیکنه کې موږ له راتلونکې د وېرې پر وړاندې د اغېزمنې مبارزې نهه لارې چارې په ګوته کړې دي.
۱– دا مه هیروئ، لویې پېښې کله کله رامنځته کېږي
دا حقیقت دی او موږ تجربه کړې هم ده او په اړه یې هېڅ شک هم نشته چې ډېری خلک د هغه څه په اړه فکر کوي چې ډېر کم پېښیږي. د بېلګې په ډول، کله چې موږ د خپل دفتر له رییس سره وینو او په یوه موضوع ورسره خبرې کوو، خو کله چې مو له رییس سره خبرې خلاصې شي او له دفتره یې بهر شو، له ځان سره بېلابېل فکرونه کوو او دا وایو چې زما د خبرو په اړه به يې نظر څه وي؟ دا هغه څه دي چې په ژوند کې عادي دي او باید وړې خبرې په خپل ذهن کې لویې ونه نیسو. واقعیت له خیالاتو سه ډېر توپیر لري، چې همدغه خیالات له حقیقت څخه موږ وېروي.
۲- تر ټولو سخت شرایط په نظر کې ولرئ
کله چې دا ومنئ چې لویې وېرې کمې پېښېږي، همدا وخت له خپل ځانه وپوښتئ، تر ټولو بد حالت چې ممکن پېښ شي، هغه به څه وي؟ له دې سره دا کار موږ دې ته متوجه کوي چې څومره بد حالات هم مخې ته راشي، دنیا نه ړنګېږي. د لویو پېښو په نظر کې نیولو سره موږ پوهېږو چې زموږ وېره هغومره لویه نه ده لکه څنګه مو چې فکر کاوه. دا روښانه ده چې ځینې یې ممکن زموږ پر ژوند مثبت اغېز ولري، خو له ژوند کولو څخه مو نشي بې برخې کولی.
۳- کله چې اندېښمن وی، ځانونه بوخت وساتئ
ځینې وخت د ډېرو اندېښنو له امله بې خوبه کیږو، په داسې وختونو کې تر ټولو غوره لاره دا ده چې خپل ځان بوخت وساتو. د خوښې وړ فعالیت سره د ذهن بوخت ساتل د منفي احساساتو د له منځه وړلو لپاره اغېزمنه لاره ده.
۴- پر وخت تمرکز وکړئ
زموږ د زیاتره وېرو اصل په ځینو شیانو نه پوهېدل او د راتلونکې وېرې په اړه ځان ډېر وېرول دي. اصلي خبره دا ده چې موږ لاهم په دې فکر کوو چې یوازې نن وخت لرو، ځکه چې سبا ته لا وخت پاتې دی! که نشی کولی چې په اوسنیو ستونزو ځان بر لاسه کړی، یو قدم مخته لاړ شئ او په اړه یې ښه فکر وکړئ.
۵– د وروستۍ وېرې په اړه مو فکر وکړئ
په ژوند کې مو په وروستي ځل څه پېښ شول او هغه څه چې ترې وېرېدلي وی، څه وو؟ کېدای شي په ډېر ښه یا هم بد حالت کې مو ترې ځان خلاص کړی وي، کېدای شي تاسو له هغه سره موافق نه وی، هغه کار چې تاسو غوښت په هغه ډول سره پر مخ لاړ نه، ښه فکر وکړئ، ماتې او ناکامي تل زموږ د بې کفایتۍ او نشتون مانا نه لري. کېدای شي موږ بېله لار غوره کړې وي.
۶– که اړتیا وي له راتلونکې د وېرې په اړه له نورو مرسته وغواړئ
پرته له دې چې پوه شو ډېر کله ورځې او شپې په اندېښنو او وېره کې تېروو، معمولاً موږ دومره زړور نه یو چې اعتراف وکړو چې موږ غیر معقوله وېره لرو. یوځل چې موږ د منلو جرئت ولرو، بیا موږ په ښکاره ډول هغه شیان درک کوو چې موږ ورسره مخ یو چې زموږ وېره لرې کړي؛ خو دا مه هیروئ چې ځینې وختونه موږ ممکن د نورو مرستې ته اړتیا ولرو. موږ چې په ټولنه کې ژوند کولو ته اړتیا لرو او له هغه پرته ژوند نه شو کولای، ښکاره ده چې یو د بل مرستې ته اړتیا لرو او د مرستې غوښتل هېڅ غلط کار نه دی.
۷- ښه پایله انځور کړئ
د اوسمهال لپاره مثبت فکر کول ستونزمن دي، خو کولی شو چې د مطلوبې موخې او پایلې تر لاسه کولو لپاره ښه فکر وکړو! په ذهن کې ښه انځور جوړول تر خیالونو غوره دي، د انځور جوړونې لپاره باید تمرین وکړو، کوم واقعیتونه چې موږ یې غواړو باید په خپل ذهن کې په سم ډول انځور کړو، یا په بله وینا، تر بریا د مخه یې باید د لاسته راوړلو حس وکړو.
۸- په دعا کولو کې غفلت مه کوئ
څېړنو ښودلې چې معنوي فعالیتونه د ناروغیو او فزیکي ستونزو په درملنه کې مؤثر دي. له همدې امله، لمونځ او دعاګانې کولی شي له راتلونکې د وېرې کمولو کې مرسته وکړي. د هغو کسانو لپاره چې د مخه یې دا ډول شیان نه دي ازمویلي؛ کېناستل، تمرکز، دعا او د ژورې ساه اخیستل کیدای شي ورته بې ځایه خبره ښکاره شي، مګر پوهیږی چې په پټو سترګو سره د ژورې ساه اخیستل ډېر اغیز لري. دا ستاسو د نا آرامۍ په لرې کولو کې زیاته مرسته کوي.
۹- دا خبره (تاسې کولی شئ) هر وخت په یاد لرئ
موږ ټولو د ماتې خوړل تجربه کړي دي، زړورتیا په دې مانا نه ده چې هره لحظه د ماتې خوړلو احساس ونه کړو، زړورتیا یانې هغه څه چې موږ یې د سرته رسولو وړتیا لرو او له سرته رسولو یې نه وېرېږو. ممکن د زړورتیا تر ټولو مهمه ځانګړتیا دا وي چې حس کړو هېڅ څوک هم نه لرو؛ مګر کولی شو چې دا کار سرته ورسوو. موږ باید پخپله ځان ته جرئت او زړورتیا ورکړو! لومړی ګام زموږ پر ځان باور کول دي! له راتلونکې د وېرې پر مهال موږ باید پر ځان باور ولرو او داسې حس کړو چې موږ دا کار په ښه ډول تر سره کولی شو. هېڅوک له راتلونکې خبر نه دي چې څه به پېښېږي، له راتلونکې وېره د دې لامل نه کیږي چې وخت به حتمن خوشحاله در باندې تېر شي؛ باید قدم واخلو او مخته لاړ شو څو ووینو چې څه پېښېدونکي دي او ایا هغه په وېره ارزي؟ ښه دا ده چې خپله هڅه وکړو څو په دې لاره کې له غوره کړنلارو ګټه پورته کړو، تر ټولو مهمه دا چې په دې باور ولرو چې له سختو سره به مبارزه کوو او ځان به خپلې موخې ته رسوو.