د طالبانو او امریکا ترمنځ د سولې هوکړه یو کلنه شوه، خو دواړه لوري یې پر یو بل د عملي کولو غږ کوي. امریکا له طالبانو غواړي چې پر خپلو ژمنو عمل وکړي او طالبان بیا له امریکا غواړي چې هوکړه د دوی په څېر عملي کړي. افغان حکومت بیا وایي چې د سولې د خبرو په نامه یوازې وخت ضایع شوی دی، د سولې هوکړې افغانانو ته ګټه نه ده کړې او یوازې یې د امریکایانو لپاره ګټه لرلې ده.
تېر کال د ټرمپ د واکمنۍ پر مهال د کب یا حوت په لسمه په دوحه کې د طالبانو او امریکا ترمنځ د سولې هوکړه لاسلیک شوه. ټاکل شوې وه چې د هوکړې تر لاسلیک وروسته بین الافغاني خبرې پيل شي، دایمي اوربند ته لار هواره شي، بهرني ځواکونه له افغانستان ووځي او طالبان به له بهرنیو ترهګرو ډلو سره خپلې اړیکې پرې کوي، خو د دې هوکړې له لاسلیک پوره یو کال کېږي بیا یې هم په افغانستان کې جګړې نه دي کمې کړې او افغانان لا هم نسبي امنیت او سولې ته په تمه دي.
په همدې مناسبت تېره ورځ د طالبانو د ویاند له لوري رسنیو ته یوه اعلامیه هم لېږل شوې ده. په دغه اعلامیه کې راغلي، چې طالبانو له خپل لوري د سولې هوکړه عملي کړې او امریکا ته هم په کار ده چې پر خپلو ژمنو عمل وکړي. په اعلامیه کې راځي، چې د سولې هوکړه د افغانستان د روانې جګړې د ختمولو لپاره یوازینۍ حللاره ده او په وینا یې، که له دې پرته بله هره حللاره وړاندې کېږي، نو سر له اوسه به له ماتې سره مخ شي. دوی پر امریکا غږ کړی چې ژر تر ژره خپل سرتېري له افغانستان وباسي او پر هغه ژمنه یې دې عمل وکړي چې ویلي یې وو، د روان میلادي کال تر مې میاشتې به ټول سرتېري له افغانستان وباسي.
طالبانو همدا راز له امریکایانو غوښتي چې د مشرانو نومونه یې له تور لېست وباسي، پاتې بندیان یې خوشي کړي او د دوحې هوکړې ټول اړخونه دې عملي کړي. دوی ټینګار کوي چې د افغان جګړې د ختمولو یوازینۍ لار د سولې هوکړه ده او امریکا ته په کار ده چې پر دې هوکړه عمل وکړي.
بلخوا افغان حکومت بیا په دې باور دی چې د سولې هوکړه یوازې د وخت ضایع کول وو او افغانانو ته یې ګټه نه ده لرلې. د افغانستان د ملي امنیت شورا د دفتر ویاند رحمت الله اندړ له رسنیو سره په خبرو کې ویلي، چې دې هوکړې د سولې په نامه یوازې وخت ضایع کړ، بله کومه ګټه یې افغانانو ته نه لرله. د ده په خبره، د سولې هوکړې باید په افغانستان کې جګړې کمې کړې وای، بین الافغاني خبرې چټکې شوې وای او دلته یې یوه دایمي اوربند ته لار هواره کړې وای. اندړ وایي چې د سولې هوکړې له امریکایي ځواکونو سره د اوربند زمینه برابره کړه او له افغانانو سره یې جګړې نه دي کمې کړې.
د سولې هوکړې له کلیزې سره هممهاله امریکايي چارواکي بیا په دې باور دي چې طالبانو پر خپلو ژمنو عمل نه دی کړی. په وروستیو کې ګڼو امریکايي او د ناټو ځينو چارواکو په خپلو څرګندونو کې ویلي، چې طالبان خپلو هوکړو ته ژمن نه دي او باید د سولې پر هوکړه بیا کتنه وشي. د دوی په خبره، طالبانو له القاعده شبکې سره اړیکې نه دي پرې کړې، تاوتریخوالی یې نه دی کم کړی او د سولې په خبرو کې پرمختګ نشته دی.
بلخوا د ولسي جرګې رییس میر رحمان رحماني بیا وايي، چې د سولې لپاره د خلکو هیلې له منځه تللې دي. د ده په وینا، طالبانو تر سولې پر جګړې تمرکز ډېر کړی او د دې احتمال شته چې جګړې پيل کړي او په دې سره د افغانانو هیلې نورې هم له منځه یوسي.