رسنیو ته د امریکا د بهرنیو چارو د وزیر هغه لیک لاس ته ورغلی، چې ولسمشر غني او د ملي مصالحې عالي شورا رییس ډاکتر عبدالله عبدالله ته یې لېږلی دی. نوموړي ویلي، چې د افغانستان په اړه د امریکا تګلاره تر کار لاندې ده، خو افغان چارواکو ته یې په ځينو مواردو کې ګوتڅنډنې کړې دي. ده له ولسمشر غني او د ملي مصالحې عالي شورا له رییس ډاکتر عبدالله عبدالله غوښتي چې له نورو سیاسیونو سره په ګډه په افغانستان کې د جګړې د ختمولو لپاره هڅه وکړي او که د دوی تر منځ اختلافات دوام وکړي، نو ښایي د نویمو کلونو تېروتنه بیا تکرار شي.
سره له دې چې په دې وروستیو ورځو کې په کابل کې د سولې او نوي حکومت د جوړېدو په تړاو راپورونه خپرېدل، خو دا ځل رسنیو ته د امریکا د بهرنیو چارو وزیر نوی لیک لاس ته ورغلی دی. دغه لیک د امریکا د بهرنیو چارو وزیر انتوني بلېنکن ولسمشر غني او د ملي مصالحې عالي شورا رییس ډاکتر عبدالله عبدالله ته لېږلی دی. بلېنکن په دې لیک کې ټینګار کړی، چې امریکا له ملګرو ملتونو د افغان سولې په تړاو د مرستې او همکارۍ غوښتنه کوي. د ده په خبره، واشنګټن له ملګرو ملتونو غواړي چې د افغانستان د سولې په تړاو د امریکا، روسیې، چین، پاکستان، ایران او هند د بهرنیو چارو وزیرانو یا ځانګړو استازو یوه غونډه راوبولو او په ګډه د افغان جګړې د حل لپاره یوه لار پیدا کړي. د امریکا د بهرنیو چارو وزیر همدا راز ویلي، چې ژر تر ژره دې د ترکیې په کوربهتوب د افغان حکومت او طالبانو ترمنځ د مذاکراتو لپاره زمینه برابره کړل شي او دواړه لوري دې د سولې په برخه کې یوې وروستۍ پرېکړې او هوکړې ته سره ورسېږي. د بلېنکن په خبره: «موږ دا قصد لرو چې له ملګرو ملتونو وغواړو، څو د امریکا، چین، روسیې، پاکستان، ایران او هند د بهرنیو چارو وزیرانو یا ځانګړو استازو یوه غونډه راوبولي او په ګډه د افغانستان د سولې لپاره پر یوه واحده تګلاره سره سلا شي».
د امریکا د بهرنیو چارو وزیر دغه راز ټینګار کړی، چې دوی به د افغانانو ترمنځ هم د ستونزې د حل لپاره له ترکیې د یوې غونډې د کوربهتوب غوښتنه کوي: «موږ به همدا راز له ترکیې هم وغواړو، چې د دواړو لورو (جمهوریت او طالبانو) ترمنځ راتلونکې اونۍ د سولې د یوې غونډې کوربهتوب وکړي».
له دې ورهاخوا د بلېنکن په لیک کې ځینې ګوتڅنډنې او خبرداري هم وو. نوموړي د خپل لیک په یوه برخه کې ویلي چې دوی لا هم تر مې میاشتې پورې د سرتېرو د ایستلو پرېکړه نه ده لغوه کړې او په خبره یې، که وضعیت همداسې روان وي، بهرني ځواکونه له افغانستان وځي، نو د دې احتمال شته چې طالبان جګړې شدیدې کړي او د امریکا له مالي مرستو سره سره، په افغانستان کې لا ډېرې سیمې د دغه ډلې په لاس سقوط شي.
د امریکا د بهرنیو چارو وزیر د خپلو خبرو په ادامه پر افغان سیاسیونو او چارواکو غږ کړی، چې د خپل دریځ د پیاوړي کولو لپاره باید په خپلو کې یووالی وساتي او له خپلمنځي اختلافونو ډډه وکړي. امریکا ویلي، که د افغان سیاسیونو اختلافات روان وي، نو د دې احتمال شته چې په افغانستان کې د نویمو کلونو تریخ وضعیت بیا تکرار شي او دغه هېواد د جګړو پر ډګر بدل شي.
بلخوا افغان حکومت بیا تر اوسه پر دې لیک په واضح توګه خپل دريځ نه دی روښانه کړی. د ملي مصالحې عالي شورا رییس ډاکتر عبدالله عبدالله بیا په تازه څرګندونو کې ویلي، چې له نوې طرحې وېره نه ده په کار. د ده په خبره، پر دغه طرحه باید بحثونه وشي او افغانستان په اوسني وضعیت کې بحث او خبرو ته اړتیا لري. عبدالله له ډېرو جزیاتو پرته ویلي، په دې کې شک نه شته چې د افغانستان په اوسني دولت کې به ستونزې وي، خو ټینګار یې کړی چې هره ستونزه د خبرو اترو له لارې د حل وړ ده.