د مسکو کنفرانس په درشل کې د افغان حکومت یو پلاوی نن روسیې ته ځي. د راپورونو له مخې، دغه شپاړس کسیز پلاوی به د مسکو په غونډه کې ګډون کوي او پر افغان سوله به بحثونه کېږي. طالبانو هم دغه غونډې ته د خپل لس کسیز پلاوي د لېږلو خبره کړې ده او په وینا یې، دوی هم په غونډه کې ګډون کوي. د افغان حکومت په پلاوي کې د ملي مصالحې عالي شورا او سیاسي ګوندونو استازي هم شامل دي. بلخوا ولسمشر غني یو ځل بیا ټینګار کړی، چې سوله یې ستره غوښتنه ده، خو پر اساسي قانون معامله نه کوي.
د روانې میلادي میاشتې په ۱۸مه په مسکو کې د افغان سولې په اړه کنفرانس جوړېږي. دغه کنفرانس د روسیې په کوربه توب او د امریکا، چین، افغان حکومت او طالبانو له ګډون جوړېږي. د روسیې د بهرنیو چارو وزارت په دې اړه ټولو اړخونو ته بلنلیکونه استولي دي چې د بهرنیو چارو وزارت هم په دغه غونډه کې د ګډون لپاره د خپل پلاوي د لېږلو خبره کړې وه. د ملي مصالحې عالي شورا وایي چې د مسکو په غونډه کې به یو شپاړس کسیز پلاوی ګډون وکړي.
د ملي مصالحې عالي شورا یوې سرچینې ویلي چې د پلاوي مشري به ډاکټر عبدالله عبدالله کوي او د پخواني ولسمشر حامد کرزي په ګډون ګڼ سیاسي شخصیتونه په دغه پلاوي کې شامل دي. سرچینه وایي، د ملي مصالحې عالي شورا رییس ډاکټر عبدالله عبدالله، د ولسي جرګې رییس میر رحمان رحماني، پخوانی ولسمشر حامد کرزی، مارشال عبدالرشید دوستم، د حزب اسلامي مشر ګلبدین حکمتیار، د پخواني ولسمشر مرستیال کریم خلیلي، د ملي مصالحې عالي شورا مرستیال بابر فرهمند، د سولې په چارو کې د دولت وزیر سید سعادت منصور نادري، د افغان حکومت د مذاکراتي پلاوي مشر محمد معصوم ستانکزی، د مذاکراتي ټيم غړی متین بیګ، د مذاکراتي ټیم غړی احمد نادر نادري، د مذاکراتې ټیم غړې حبیبه سرابي، د مشرانو جرګې مرستیال محمد علم ایزدیار، د سولې په چارو کې د دولت وزارت مرستیال عبدالله خنجانی، د حزب اسلامي غړی عبدالستار خواصي او د حزب اسلامي بل غړی غیرت بهیر د مسکو په غونډه کې د ګډون کوونکي شپاړس کسیز پلاوي غړي دي.
سرچینه وایي چې دغه پلاوی به نن مسکو ته ځي او د مارچ په ۱۸مه به په جوړېدونکې غونډه کې ګډون کوي. بلخوا د بهرنیو چارو وزارت بیا په یوه خبرپاڼه کې ویلي چې د مسکو او ترکیې غونډې د دوحې د غونډو او مذاکراتو بدیل نه دي، بلکې په دوحه کې به مذاکرات په خپل حال روان وي. بهرنیو چارو وزارت په یوه اعلامیه کې ویلي چې دا دواړه جوړېدونکي کنفرانسونه د دوحې د بهیر بشپړوونکي دي او تمه ده چې د سولې هڅې ګړندۍ شي.
بهرنیو چارو وزارت دغه راز د سولې په برخه کې د سیمې د هېوادونو له هڅو او همکاریو هم مننه کړې ده او وایي څومره چې د افغان سولې په اړه د سیمې د هېوادونو همکاري او اجماع ډېرېږي دومره افغانان سولې ته نږدې کېږي. د سرچینې په وینا: «موږ د افغان سولې په برخه کې د نړیوالو او سیمه ییزو همکارانو له مرستو او همکاریو ستاینه او مننه کوو».
ددې تر څنګ ولسمشر غني بیا تېره ورځ په بهرنیو چارو وزارت کې یوه کنفرانس ته د خبرو پر مهال ویلي چې د سولې ملاتړی دی خو ددې ملاتړی نه دی چې له ټاکنو پرته دې واک بل چا ته وسپاري. د ده په خبره، که طالبان وغواړي څومره ژر چې کېږي، ټاکنو ته تیار دی، خو له ټاکنو او د خلکو له رایې پرته واک چا ته نه سپاري. د ده په وینا: «که طالبان وغواړي، همدا سبا هم ټاکنې کېږي. خو د اساسي قانون پر بنسټ له خلکو د رایې حق باید وا نه خیستل شي».
د ولسمشر دريځ د امریکا د وروستیو اقداماتو په تړاو تر پخوانیو دريځونو یو څه نرم ښکاري او داسې تمه شته چې دا ځل به د افغانستان د جګړې پای ته یوه معقوله لار پیدا کېږي.