د ولسمشر لومړی مرستیال وایي د غیر مسوول وسله وال عليپور له لوري د افغان پیلوټانو وژل ښکاره جنایت دی او باید پر وړاندې یې اقدام وشي. نوموړي تر څلور ورځنۍ چوپتیا وروسته نن د عليپور د وروستي جنایت په اړه څرګندونې کړې دي. هغه ویلي چې افغان ځواکونه به د پېښې اصلي عاملین په نښه کوي او د خپلو اعمالو په سزا یې رسوي. دده په خبره دې مسئلې ته باید قومي رنګ ور نه کړل شي ځکه افغان سرتېري یوازې د هغو کسانو پر ضد په عملیاتو بوخت دي چې افغان پیلوټان یې وژلي او دا نه بښل کېدونکی جنایت یې ترسره کړی دی. هغه ټینګار کړی چې د افغان ځواکونو وروستیو عملیاتو ته دې قومي رنګ نه ورکول کېږي او په خبره یې سرتېرو ته د خاص قوم او ځای پر ضد د عملیاتو امر نه دی شوی بلکې د پېښې اصلي عاملین به په نښه کوي.
