په افغانستان کې د سرتېرو د حضور او یا وتلو پر سر د امریکا او طالبانو ترمنځ ناندرۍ راپورته شوې دي. تازه د امریکا ولسمشر جو بایډن، امریکایي سناتورانو، د امریکا استخباراتي ادارو او ځینو امریکایي څېړونکو ویلي چې له افغانستان د بهرنیو ځواکونو د ایستلو لپاره شرایط نه دي مساعد شوي. بلخوا طالبانو بیا تازه خبرداری ورکړی چې که امریکايي ځواکونه پر ټاکلې نېټه له افغانستان و نه وځي، نو دوی به خپلې وسله والې مبارزې ته ادامه ورکړي. نیویارک ټایمز بیا وایي چې د سرتېرو د وتلو، مشارکتي حکومت او یا ورته مواردو په اړه د طالبانو ترمنځ د نظر اختلاف شته دی.
وروسته له هغه چې په دوحه کې د طالبانو او امریکا ترمنځ د سولې هوکړه لاسلیک شوه، نو تر ټولو مهم موارد یې دا وو، چې امریکايي ځواکونه به تر مې میاشتې په بشپړه توګه له افغانستان وځي، طالبان به تاوتریخوالی کموي، له بهرنیو ترهګرو ډلو سره به اړیکې پرې کوي او بین الافغاني مذاکرات به یوې پایلې ته رسول کېږي، خو اوس چې په امریکا کې نوی حکومت رامنځ ته شوی او په ډېرو مواردو کې یې د پخواني ولسمشر ډونالډ ټرمپ تګلارې او فرمانونه لغوه کړي، نو امریکايي حکومت د دوحې له هوکړې هم ناخوښ دی. نوی حکومت د دې ملاتړی دی چې د سرتېرو د ایستلو پر مسئله لا ډېر فکر او غور ته اړتیا ده.
د امریکا ولسمشر جو بايډن په وروستیو ورځو کې وویل چې تر اوسه له افغانستان د سرتېرو ایستلو ته شرایط مساعد نه دي او په خبره یې دا به ګرانه وي چې تر مې میاشتې پورې دې بهرني عسکر له افغانستان و ایستل شي. د ده په خبره: «د تاکتیکونو له امله دا سخته ده چې سرتېري دې په ټاکل شوې نېټه له هغه ځایه را و ایستل شي. زه او د بهرنیو چارو وزیر له هغو هېوادونو سره ګورو چې په افغانستان کې یې سرتېري دي او که مناسبه مو وبلله، په منظمه توګه به له دغه هېواد خپل سرتېري وباسو».
د بایډن دې څرګندونو له ځان سره د طالبانو غبرګون درلود. وسله والو طالبانو رسنیو ته په یوه استولې اعلامیه کې ټینګار کړی، چې امریکايي او نور بهرني ځواکونه به په ټاکلې نېټه له افغانستان ووځي. وسله وال طالبان وایي، د دوحې د هوکړې مطابق امریکايي عسکر باید تر مې میاشتې له افغانستان ووځي او دلته دې د سولې پرمختګ ته زمینه برابره کړي، خو افغان حکومت هم بیا د بایډن له دريځ ملاتړ کړی دی. د افغان حکومت د ملي امنیت سلاکار حمدالله محب په یوه خبري غونډه کې ویلي چې که امریکایي عسکر بې وخته او د شرایطو له مساعدېدو مخکې له افغانستان ووځي، دلته به کورنۍ جګړې پيل شي.
بلخوا امریکایي ورځپاڼې واشنګټن پوسټ بیا له ځینو طالب مشرانو او قوماندانانو سره خبرې کړې دي. دغه ورځپاڼه وایي، سره له دې چې طالبانو په ځینو مواردو کې خپل یووالی ثابت کړی او دا یې ښودلې چې د یوه فرمان تابع دي، خو د سولې او حکومت پر سر د دغه ډلې د قوماندانانو ترمنځ د نظر اختلاف شته دی. ورځپاڼه وایي، په طالبانو کې منځلاري قوماندانان د سولې له لارې د ستونزې د حل په لټه کې دي، خو داسې قوماندانان هم شته چې دوی نه غواړي مشارکتي حکومت جوړ شي، بلکې د یوه نوي اسلامي حکومت د جوړېدو په لټه کې دي. یوه طالب قوماندان د نامه نه ښودو په شرط واشنګټن پوسټ ته ویلي: «موږ یو مستقل حکومت جوړوو، موږ شل کاله د اسلامي حکومت د جوړېدو لپاره مبارزه کړې ده، که داسې نه کېږي، نو موږ باید خپلو جګړو ته ادامه ورکړو».
بلخوا د امریکا استخباراتي ادارو هم د بايډن حکومت ته خبرداری ورکړی، چې که امریکایي او نور بهرني ځواکونه له افغانستان وځي، نو په دغه هېواد کې به ترهګرې ډلې پياوړې کېږي، طالبان به په دوو کلونو کې د افغانستان ډېره برخه نیسي او نړیوالې ترهګرې ډلې به دلته ریښې ځغلوي چې نړیوال امنیت ته به ګواښونه جوړ کړي.