په چين کې يو متل شته چې وايي، خوراکي توکي د خلکو لپاره د اسمان په شان مهم ارزښت لري. کرنيزې چارې د بشريت د پرمختګ او د غلو دانو د امنيت ساتنې بنسټ دی. تر ۲۰۳۰م کال پورې د ملګرو ملتونو د پر له پسې پرمختګ اجنډا په ۱۷ پرمختيايي موخو کې د شهېدې لوږې له منځه وړل، د غلو دانو امنيت ساتل، د خلکو د غذايي حالت ښه والی او د کرنۍ د پر له پسې پرمختګ پياوړتيا شامل شوي دي. بېلا بېل هېوادونه دغو موخو ته د رسېدلو لپاره ډول ډول تدبيرونه نيسي، څو د کرنيزو تخنيکونو پرمختګ يې چټک شي، د غلو دانو حاصلات يې زيات او د خوراکونو امنيت يې وساتل شي.
د ساينس او تخنيک له پرمختګ سره سم، د بشريت کرنيزې طريقې هم ورځ په ورځ عصري کېږي، چې په کرنيزو ځمکو کې د غوايانو او اوسپنيزو الو له لارې د غلو دانو له کرلو څخه د فارم په خونو کې د انټرنيټي شبکې او کمپيوټر له لارې د ډول ډول نباتاتو روزلو ته ګرځېدلې دي. د ساينس او تخنيک په رڼا کې د کرنيزو چارو لګښتونه د پخوا په پرتله ډېر ټيټ شوي، جوړښت يې ډېر مناسب دی او د لېږد رالېږد سيستم يې لا اسانتياوې برابرې کړې دي. د دې ترڅنګ، خلک له طبعيت څخه لا روغتيايي، پاک او دواملرونکي خوراکونه او توليدات اخيستلی شي. د بېجينګ د جنګ هه يوان جن په نوم د کرنيز ساينس او تخنيک شرکت د تخنيکي پلټنې مسؤل ډاکټر لي يوان وايي،
( د کرنيزو چارو په لومړۍ دورې کې مو د لمر د وړانګو له لارې په کرنيزو پټيو کې غلې دانې کرلې وې. د دوهمې دورې په موده کې مو په شنو خونو کې نباتات روزلي وو، مثلأ، د چين په شان دونګ ولايت کې د شنو خونو شمېر ډېر دی او د شنو خونو پيمانه د سمندر په شان ناپايه ده. موږ دغه شان شنو خونو ته ( د چين شنه خونه) ويل وايو. په درېيمې دورې کې مو ګرځنده شيشه يي شنې خونې په کرنيزو چارو کې وکارولې او د څلورمې دورې په موده کې مو د مصنوعي وړانګو له لارې د نباتاتو د روزنې فارمونه جوړ کړل. له دې څخه عصري تخنيکي پرمختګ څرګندېږي. )
چين به د پرمختګ د ۱۴م پنځه کلن پلان له مخې د کرنيزو چارو د کيفيت د لوړتيا او په نړيوالو بازارونو کې د سيالۍ ځواک د پياوړتيا لپاره هڅې وکړي. دا په راتلونکي کې د چين د کرنې پرمختيايي لوری لارښوونه کوي. د چين د پلازمينې بېجينګ د شون يي سيمې د نباتاتو د روزنې په يو عصري فارم کې ليدل کېږي، چې کارګر له لمريزو وړانګو او خاورو پرته د عصري تخنيک له لارې سبزي روزي. دغه سبزۍ پاکې دي، غني غذايي مواد او ښې ګټې لري. ډاکټر لي يوان يې په اړه وايي،
( د دغه شان عصري فارم تخنيک لومړی په جاپان کې رامنځته شو. وروسته بيا د چين او امريکا په شمول زياتو هېوادونو کې خپور شو. په امريکا کې د نباتاتو د روزنې په برخه کې څو عصري فارمونه شته، چې پيمانه يې لويه ده او ښې پانګونې پکې شوې دي. د دوی توليدات په عمده توګه په عصري سيوپرمارکټونو کې پلورل کېږي. اوس په چين کې د دغه شان فارمونو شمېر ۲۰۰ ته رسېدلی دی. )
۲۱مه پيړۍ د کرنيزو چارو له څلورمې دورې سره برابره ده. د انټرنيټي شبکې، ځيرک ترانسپورټي سيستم، د لويو شمېرو تخنيک او انلاين سوداګري به په کرنيزو چارو کې ستر رول ولوبوي. په دې مناسبت به پر کرنيزو چارو د طبيعي مصيبتونو منفي اغيزې کمې شي او د کرنيزې ځمکې د کمښت له امله رامنځته شوې ستونزې به هم ليرې شي. ډاکټر لي يوان وايي،
( په عصری فارم کې د سبزيو کيفيت او روغتيايي مواد خوندي ساتل کېږي. له دې لارې په سختو طبيعي شرايطو کې د خلکو خوراکي اړتياوې پوره کېدای شي. دغه شان فارم زياتو خاورو او اوبو ته اړتيا نه لري، زموږ په فارم کې د اوبو د کارولو اندازه د دوديزو کرنيزو چارو په پرتله پنځه سلنه ډېره ده. زموږ ټولې اوبه په سيستم کې په پر له پسې توګه کارول کېږي. غذايي مواد هم لري. داسې مواد ښه کارول کېږی. )
د بېجينګ د جنګ هنګ يوان جن په نوم عصري فارم کې ليدل کېږي چې د دغه فارم د روزنې خونې پراخوالی يوازې ۵۰۰ متره مربع دی، خو د سبزيو د روزنې چوکاټونو عمومي پراخوالی يې ۱۲۰۰ متره مربع ته رسېږي. په دې فارم کې د سلاد سبزيو، د مسالو سبزيو او د ګلانو په شمول کابو ۳۰ ډولونه نباتات روزل کېږي.
که څه هم د کرنيزو چارو د څلورمې دورې په موده کې د عصري فارم د تخنيک خپرېدا او پرمختګ لا هم له ځېنو ستونزو سره مخامخ دي، مثلأ، عصري او عالي ساينسي او تخنيک شرايطو ته اړتيا لري او د فارم د جوړولو لګښت يې لوړ دی، او داسې نور. خو عصري فارم او ځيرک کرنيز ساينس او تخنيک د کرنيزو چارو د پرمختګ لوری دی. د کرنيز ساينس او تخنيک د پرمختګ په رڼا کې به د خلکو ژوند لا ښه شي.