ولسمشر غني پرون ګواښ کړی چې که څوک د جمهوریت په صف کې نه وي، نو په دولت کې ورته ځای نشته. ولسمشر غني ویلي: «یو د جمهوریت صف دی او بل د دښمن؛ هغوی چې د جمهوریت په صف کې نه ودرېږي، نو ورته په دولت کې ځای نشته». ولسمشر غني په داسې وخت کې دا خبرې کوي چې نه یوازې د دولت او سیاستوالو ترمنځ د سولې او نورو لویو مسایلو په اړه پراخ اختلاف شته، بلکې په دولت کې دننه د چارواکو تر منځ هم پر سوله او اساسي مسایلو ژور اختلاف دی.
لومړی خو دا خبره ناسمه ده چې یوازې دوه صفونه دي، هغه هم د جمهوریت او دښمن؛ ځکه چې د افغانستان لویه برخه خلک په دې یوه صف کې هم نه دي. د افغانستان لویه برخه خلک نه د دې مفسد او وراسته حکومت برخه دي چې ځان جمهوریت ګڼي او نه هم د افغانستان دښمنان دي چې د خپل هېواد په ورانولو کې له پردیو سره کار وکړي. اشرف غني ولې تل نظام او حکومت سره ګډوي!؟ ولې باید جمهوریت او دا وروست، مفسد، ناکاره او بې کفایته حکومت سره ګډ شي!؟ د افغانستان هېڅ وګړی د نظام مخالفت نه کوي او نه غواړي چې بیا بېنظامه او بېسیستمه شي، خو هېڅ افغان اوسنی ظلم، فساد، خیانت او ناوړه حالت هم نه مني. که اشرف غني او نور حکومتي چارواکي یوازې خپله واکمني جمهوریت ګڼي او خپل هر کار ته د جمهوریت پوښ ورکوي او فکر کوي چې خلک پرې نه پوهېږي، تېروتنه کوي. خلک نظام او غله او مفسد واکمن سره بېلوي. خلک پوهېږي چې څوک د جمهوریت په نوم، د جمهوریت خلاف دریځ لري او هره ورځ د دې وطن شتمني لوټي او بهر ته یې وړي. خلک د جمهوریت او له بهره د څو راغلو مفسدینو او غلو ترمنځ توپیر کوي، چې نه د افغانستان په تاریخ او ارزښتونو پوهېږي او نه هم ورته ژمن دي. له همدې امله د دې ګډول تېروتنه ده او د خلکو په سترګو کې د خاورو شیندلو هڅه ده. دا تصور باید اصلاح شي چې دوه صفونه دي، د مفسدینو او مظلوم ولس صف هېڅکله نه سره ګډ و او نه ګډېږي. عام ولس سوله او امن غواړي، نه د ظلم، فساد، خیانت او غلا ملاتړ کوي او نه هم غواړي چې یو ځل بیا بېسیستمه او بېنظامه شي.
له بله اړخه دا د جمهوریت اصل دی چې هر څوک کولی شي خپل غږ ولري او دا د جمهوریت په قوانینو کې صراحت لري. هر څوک حق لري چې د سولې او نورو لویو مسایلو په اړه متفاوت غږ او نظر ولري او آن د اساسي قانون د حکم پر اساس کولی شي چې د نظام د ډول د بدلون غوښتنه هم وکړي. هر څوک کولی شي چې له چارواکو جلا او متفاوت غږ ولري او هېڅوک دا حق نه لري چې دا غږ د دښمن صف وګڼي او غلی یې کړي. د متفاوت او مخالف غږ او نظر غلي کول او هغه د دښمن صف ګڼل د جمهوریت خلاف عمل دی. هېڅوک دا حق هم نه لري چې نور خلک له ځان سره په هغه فساد او ناقانونیو کې شریک وګڼي، چې یوازې دوی کړي او خلک ورسره مخالف دي. له همدې امله د حق او باطل دا کرښه ایستل د منلو نه دي او دا یوازې یو دېکتاتورانه، ناقانونه او د جمهوریت خلاف عمل دی.